عكازة ريما وجاجات ابو معمر ..

عكازة ريما وجاجات ابو معمر ..

ترويئــــه

في عمان, أوردي على عمان .....كل ما تشتهي انفس الفلاحين الهبل امثالي من حرمان وقيود فرضت علينا ... وراحت علينا ...وخسرناها ... وشكلنا رايحين نموت بحسرتنا ....., خلينا من فزلكات ألحكي ومقدمات ضراط على البلاط ..
بنخش بالموضوع ..... خشيت وصحبة طيبة إلى منطقة الشميساني على ايدك اليمين وانت نازل , حيث المقاهي وحيث يحلو السهر .. ويا عيني على هيك سهر .. حتى القمر كان غير شكل هناك .. حيث العالم الآخر.. والناس الغير شكل.. وعلى ايدك لشمال وانت طالع ...دشينا إلى كافتيريا أو لنقل مقهى من طراز آخر انه وبلا شك .. مقهى الترويئــه هكذا كانت تقول اللوحة المعلقة فوق صباحك وانت خاش تروء.. .... يا مامي ..
في الترويئة التي يصعب علي أن الفظ اسمها ربما لأني ما بعرف اغنج مثل ابو معمر .. أو ربما لأني غير مستعد للطعج والهبوط اكثر من الازم ... مع إني حفيت في ملاهي وخمارات ونايت كلبات.. بين ديسكو . ودحيه . وسحجة .وهلم لالي .وسهرت عند النور والزط .وسهرات صحراوية وشاطئية .. وبنت الجبل يا جبلية ... . وسهرت بثلاث ترباع المحلات الهاملة أيام الهمالة .. أيام الجاهلية.... التي عبرت وعدت كلمح البصر .. أيام ما كان عندي بصر... وقبل ما أصير على عكازه .. مثل عمتي ريما ..وقبل ما نطس بنظري مثل خالتي إسرار .. وقبل ما أصير افاحج مفاحجة مثل أبو معمر .. وهو ناتع شوال علف للجاجات الى فوق السطح ... وقبل ما انهبل .. والف بالشوارع مثل اللهم عافينا ..كامل ... وقبل ما يهتري وبري مثل غليون الحجة دانا . يعني قبل مية وتسعين اس ام ال . مع فتحة بالسقف .. ومدندشي .. وعليها صورة سميرة توفيق ..
المهم شو بدنا بالطويلة ..القصير اريح .. اترزعنا على الكرسي شلة حسب الله من شبيحة أيام زمان .زعران العصر الذي مضى .. ودبيكة عمك أبو الزلف .ولويحة أتخن دبكة صارت في الهاشمي الشمالي .. مش بالجنوبي ..لانو عيال الهاشمي الجنوبي كانوا مطسة ... ..
المكان يعبق برائح التنباك والمعسل والمعسول والعسل والغزل .ومليان لعين دينو صبايا ونسوان من كل الاعمار ..جاجات حبطرش يعني على مد البصر .. مثل جاجات ابو معمر اياهن الي حاطهن فوق السطح ... افرقت بالبيض .. جاجات ابو معمر ببيضن بيض ابو صفار .. وممكن صفارين .. لكن جاجات الترويئة ببيضن عسل.. وممكن موزز .. وممكن اسلحة دمار شامل .. عطورا أنثوية من شتى الجنائن..من كل الورود . وأزياء .. رائعة تشف وتصف... مستوردة خصيصا لهيك... فرفورات .وبيلبقلهن .. ليش الحكي ..... ازياء ومن كافة دور العرض.. وأجساد محشوره بقهر في ثنايا طرازا رفيع من تقاسيم وترية لأعذب لحن سمعته في حياتك ... .. سيقان .عارية الا من القليل كسنابك الخيل. ونهود تكاد تنفجر في قيدها... ..هذه تطلق ضحكتها .. وتلك تلف ساق فوق ساق ... هذا يداعب شعر تلك... وذاك تكاد يده تذوب في يدها... وآخرون يتضاحكون .. ويتهامسون .. ويعشقون بمرح .. وربما يكذبون .. وربما ؟؟ عالم اخر .. من كوكب بعيد . من سقف السيل .. بالتأكيد . ولكنة بعيد عن اتخن شنب ....ايام ما كان عندي شنب ...

للجميع.... فرافير وامورات ... قصات شعر وتسريحات وطعجات وغنجات وأهات من كل صوب وحدب .. ماركة على الموس .إلى زيرو . إلى ماركة ما رينز .. وبانكس وفرند اكس .وكربوريتر ... وبلاتين لاذع ومش لاذع ... ويا مامي . وهاي هني . وهات يا جل .. وهات يا غنج .
جاءوا لنا بارجيلة محشوة بعسل مش معسل .... بلاوي زرقا ... تذهب العقول أو ربما أن العقول ذهبت بلا رجعة .انمعست معس . وسكرت دون أن تمس الكأس...وطاش سهمك يا ابو قنوة .. طاش . وسلامة تسلمك ...
وبدأ فلم الموسم ... طبعا كما تعرفون ... محسوبكم أبو قنوة .. شديد في كل شيء.. سحبت نفس عيار 44 بار وكركعة الارجيلة كقصف الرعد... وأخرجت الدخان . وكأنك تشاهد تركتر يعفط في حقل ترابي . أو كزفير ناقة في مخاضا عسير.. عسير جدا ..عسير ملعون والدين.
الجمر التهب فوق رأس الارجيلة ... ورأس أبو القناوي أصبح فردة كاوشوك مرمية على جنب الصحراوي من عشرين سنة ...... أخذنا الحديث وانأ ابلبع الدخان وأخرجه بكثافة عالية ...لم يدر بخلدي إني أصبحت مادة للمشاهدة من الامامير والطنطات والامورات في كامل المكان .... الكل يراقب معركتي مع الدخان .. كونتينتال على الصحراوي بتغلي غلي ... وعينك ما تشوف إلا النور ...
كل من في المكان كانوا يمصمصون اراجيلهم بنعومة ونكاشة ولطافة ورئه .. طبعا فرافير .... بعكس الخنشور الذي يضن نفسه داخلا في سباق لعمل الغيوم في سماء صبايا وصبيان لم يتعودوا مشاهدة الإنسان الأول يدخل المكان ... الي عليك عليك ... ما انا جاي بمهمة ..مش جاي افرفش مثل خلق الله .....
تفقدت خاصرتي ابحث عن رفيقة .. لا أضيعها ابدا .. ابحث عن قنوتي التي حتما ستجد لها لذتها في المكان ستجد عظاما تحتاج إلى تحطيم......ستجد ما تفترسه بأنيابها .. قنوتي.أريدها إن تفغش .وتهبش وتنبش .. قنوتي .... هذا وقتها ... أن أوان الجد.فاشتدي زيما ... حيث أهش هاولاء التيوس بها .. وأداعب بها جدائل الامورات .. ولي فيها مئارب أخرى .مئارب ومشارب كثيرة .... مأرب يقول بلش هبد بالمكان وما تخلي كرسي على طاولة .... ومأرب يقول انتع على كتفك كل الامورات سبايا .. وجواري...وشدهن من شعورهن إلى مضارب أبو قنوة .هارون الرشيد مش أحسن مني ... . خلهن يتعلمن عربي.. ويتعلمن كيف حلب النوق .. وكيف نفرق الجمل عن الناقة .. مش الجمل عن الجملة .. وكيف المرياع بجر النعاج مثل أسرى اثخنهم الجراح . خلهن يشمن ريحه الزبل طالع من الطابون ... خلهن يميزن ريحه ورص الجاج من بول النوق.
خلهن يتعلمن كيف يزغردن لطلة أبو قنوة وهو راجع من الغزو راكب على القنوة وبلوح بالحصان ... ...خلهن يسرن سروه مع طلعة الشمس يلملمن حطب ويشعلن نارا للسهر على جمر الغضى .. سهرات سواريية وماتينييه من كعب الدست .. من كعب الست أم بربور .. من كعب العنز بعد ما تلد بربع ساعة ...
هاتوا ملعون الوالدين صاحب ترويئة .. لازم اسلخ جلدة عن عظمة.. مش لاشي لكن لأنه اختار هيك اسم مايص لايص .. خالص مفعوله ... مثل شكلوه .. هاتوا لهون خليني احلقلو على الصحن مش على الصفر .وأركب الو شنب مثل شنب طوني حنا .... خليني أدق عظامه دق بلكي يجمد ويصير نص زلمة .. . ملعون الوالدين قهرني .. مش لأشي بس لأنو ... لامم كل الامورات وحاطهن بجاط فواكه .. وهات خمش يا أبو الحبايب .. .. طلع مقحف ملعون الوالدين .....وطلع أبو قنوة .. هبيلة .. لا بالصدة ولا بالردة .لخمة .. اخص على هيك زلم .. لو يطلقوني يومين بالشميساني ... أبوك يالموت....لأركب البعير واعطيها مزاعطة ... خلي الجل للركب..
هالمنتدى صار مثل هالترويئة .. يعني بنخلص من جاجات ابو معمر بتطلعنا عكازة .. تيتا ريما .. الحندءة .. شايفين .. الحندءة .. على وزن ترويءة .. هي الي اجاكو ... يا مامي ...

المصدر: شبكة ومنتديات صدى الحجاج

وطلع أبو قنوة .. هبيلة .. لا بالصدة ولا بالردة .لخمة .. اخص على هيك زلم .. // أول مرة اشوفك عارف قيمة نفسك


هالمنتدى صار مثل هالترويئة .. يعني بنخلص من جاجات ابو معمر بتطلعنا عكازة .. تيتا ريما .. الحندءة .. شايفين .. الحندءة .. على وزن ترويءة .. هي الي اجاكو ... يا مامي ... /// فشرررررررررررررررت الترويئة

على فكرة ابو قنوة ،،، من زمااااااااااااااااااان زمان اوي من قبل ما اتولد يعني (هم الي حكولي) كلامك بنقرأ حرف حرف وازا بضيع حرف بضل دور عليه لما أقرأه صاير تحكي حكي يخش المخ يا زلمة لا برافو والله عنجد برافو

مع تحيات عكازتي اللي راح تلخمك على راس قنوتك

بالمناسبة طالما ما انت قد هالتروئية اطلع منها ولا تعتبها (اسلم تسلم )

الى الطنط والامور ابو آهه ... سابقا ابو قنوه


لا .. لن أبكيك.. فلا شيء أنت.. أنا أبكي ربيع عمري الذي لم أحياه.. لن أذرف دمعة على عِـشرة لم تقربها معاني الحب .. سأتقيؤك من كل خلية في جسدي سأطردك من ذاكرتي وأمحوك من ذكرياتي .. ليت حياتنا كتاب بين أيدينا لأنزع صفحات عدد سنواتي معك وأمزقها وأحيلها رماداُ يتطاير وكأني لم أعشها أبداُ .. سنين عمري تجرعتها منك كطفل يتجرع دواءه المر.. يشربه طوعاً كي لا يشربه...
سأتقيؤك من كل خلية في جسدي سأطردك من ذاكرتي وأمحوك من ذكرياتي لانك يا ابو قنوه مرتد .. ودخلت في دين الفرافير ..



هذه من موبايل ابو قنوه بعد نفس الارجيله الاول

يعني حتى لو المو ضوع ما بيعنيني بيجيني الطخ وانا قاعدة في الدار مش عارفة ليش يا ابو قنوة ما احنا كويسين مع بعض



ليش الحكي الموضوع حلو ومن الاخر
يعني مش ئد الغنج والدلع ليش بتدور وراه وبدور وبتوجع راسك يا خنشور
والله انا عارف عنك ليش بتحب تتعب حالك

........ بدي أغلط بس عارفه أبو معمر ........ رح يحذفه ........ بس بصراحة موضوع تافه........

والله يا ابو ئنوه انك حكيت الدغري

امبارح قاعدين انا و واحد "عدوان" بالشركة و بنحكي عن الدوام "الشفتات" فاتفقنا انه الشفت الصباحي هو الأسوء... و اتفقنا على السبب و هو " اننا بنداوم مع ناس مش ناسنا و مش من طبقتنا و لا أصلنا "


بس يا ابو ئنوة صدقني كل راس مالها انك تصير نائب و تسكن بعمان الغريبة... شهر زمان بنلاقيك داق في ابو الطفايلة و عاداتهم و تأخرهم...

طيب يا ريما .. اول مرة بحياتي بحكيلك شكرا ..

مش كرم اخلاق مني .. بس مجبرا ابن بنتك لا بطل ..

ابومعمر رضي الله عنه .. شكلك ماخذ برد مع انه مافي كهربا يعني ما في كندشن .. طيب .. خذ بندول .. اشرب معسل ..دبر حالك


اسرار خالتي العتب على قد المحبة .. وبعدين انا الله وكيلك ما بحب هيك محلات ..هوايتي المفضلة .. دقين تركس بقهوة خبيني .. يعني بسقف السيل ...

شوف يا احمد ..التخلف عادة حميدة هالايام .. يعني لولا شوية هالتخلف .. كيف بدو السواح يجو لعندنا .. خليها مستورة .. وبعدين النيابة بدها حسن سلوك .. هات دبرها ...