×××ألا ليت الزمن يرجع×××

×××ألا ليت الزمن يرجع×××

بسم الله الرحمن الرحيم
دائما نندم على الاشياء اللي راحت منا وماحسينا فيها او بوجودها الا لمن فقدناها
هالقصه بعض احداثها حقيقه والبعض من نسج الخيال اتمنى ان مضمون هالقصه يأثر في كل من يقراها واذا كان في شخص ميبس راسه راح اقله الحق قبل مايفوت الاوان وتتمنى ان الزمن يرجع فيك ولو ثواني راح تفهمو كلامي لمن تقرون القصه اترككم معاها واتمنى انها تنال ذائقتكم

كعادته رجع البيت وهو متذمر ومافي شي عاجبه
خالد:سلام
مها ::وعليكم السلام اجهز العشا
خالد::اكيد انتي وش شايفه اعوذ بالله
قالها وهو ماشي لغرفته
مها::استغفر الله العظيم الله ما اقول الا الله يصبرني
من غرفته خالد::قلتي شي
مها::لاسلامتك
وقامت تسوي له العشى بدل ملابسه وجى للصاله
حطت مها العشى
مها::تبي شي والا اروح انام
خالد::ابي شاي وبعدها اذلفي براحتك
مها::انشالله
سوت له الشاي وحطته قدامه وهو مو معطيها اي اهتمام
مها::تصبح على خير
خالد::ليه وانت يجي من وراك خير
مها::الله يهديك
خالد::ليه قالولك مجنون
مها::لا اسفه وراحت
كعادتها ماتبي تسوي مشاكل وتصحي ولدها تعودت مها على هالاسلوب من خالد اللي مو عارف
قيمة هالانسانه اللي عنده كانت طيبه وحنونه وتحبه وتتحمل منه اي شي لجل ما تخسره الا انه انسان ماينطاق بغروره وعجرفته اللي ما لقت له مها سبب
اليوم الثاني صحت مها لصلاة الفجر
مها::خالد حبيبي قوم صلي
خالد::اقول ضفي وجهك ولا صحيت بصلي
مها::خالد مايصير انت صاحي قوم صلي وارجع نام
خالد::اقسم بالله اذا ماقلبتي وجهك يا ان بيجيك شي ماشفتيه طول عمرك
مها::انا اللي علي سويته
وقامت توضت وصلت وبعد ما انتهت من الصلاه رفعت يدها لارحم الراحمين ودعت ان الله يهديه
ويصلح حاله وكانت تبكي بحرقه على الشي اللي تشوفه من خالد ومعاملته لها وتشكي للي عينه ماتنام
ان الله يهدي سرهم ويصلح حال زوجها
انتهت من الصلاه وراحت تشوف ولدها عزام شافته نايم مثل الملاك حست بغصه لان ابوه مايشوفه الا نادرآ
عمره مالعب معاه او حتى عطا له ريق حلو رغم ان الولد عمره ثلاث سنوات الا ان ابوه مايطيقه لانه مايطيق امه
صحى خالد الساعه عشر ودخل الحمام وهو في الحمام بكل صوته
ياست هانم جهزي الفطور انا مستعجل
مها::انشالله قامت وجهزت له الفطور وكانت تفكر في حل خرج خالد من الحمام
جلس على السفره فطر وقام
مها::صليت
خالد::انا ابغي افهم شي واحد انت وش عليك مني وجع
وراح لغرفته بدل ملابسه وطلع
جلست مها تفكر في حل في طريقه تقدر توصل في لحل مع خالد ماتبي تخسره لانها رغم كل شي الا انها تحبه وبنفس الوقت مو متحمله الي يجيها منه لقت الحل وهو انها تنتظره على العشا بس مو مثل كل مره
قامت وراحت لدولابها واتنقت اجمل فستان عندها كان ناعم ولونه مناسب لها دخلت اخذت دش
وطلعت استشورت شعرها وحطت ميك اب خفيف ولبست الفستان وجهزت العشا وكانت معطره البيت ومنومه ولدها وحاطه على السفره شموع ومشغله ميوزك هادي ومتأمله خير جى وقت رجوعه سمعت الباب ينفتح ما قامت جلست على الطاوله منتظرته دخل خالد وهو رامي الشماغ على كتفه والعقال فوق الطاقيه ومرفع اكمام الثوب وحالته حاله
خالد::وش هالمهرجان اللي مسويته
مها::خالد حبيبي تعال ابي اتكلم معك
خالد::خير ياطير وش عندك اكيد تبين فلوس
مها::الله يسامحك تعال ابيك اجلس
جلس وهو يتأفأف ومو عاجبه شي نعم هاه خلصيني ابي اتعشى وانام
مها::خالد ياقلبي انت ليش تعاملني بها القسوه انت تدري اني احبك واغليك وما اشوف بالدنيا غيرك
رغم كل اللي القاه منك الا اني عمري ما ضايقتك بشي
خالد::انتي الحين مسويه كل هذا لجل تسمعيني هالكلمتين طيب بالمختصر المفيد انتو الحريم المفروض ماتنعطون وجه
مها::ليش ومن قالك هالمعلومه
خالد::كل اخوياي يعاملون حريمهم بنفس الطريقه
مها::خالد انت وش عليك منهم انت رجال انت اللي تحكم تصرفاتك مو اخوياك وبعدين هذا تخلف
قام وعطاها كف::يعني انا متخلف
حست مها ان الدنيا ضاقت بعينها رغم كل شي سوته ورغم كل محولاتها الا انه مو حاسس بشي لا ونهايتها ضرب قامت مها وناظرته بكل حزن
مها::خالد رغم اني احبك الا اني ما اقدر استمر معك اكثر من كذا روح خل اخويانك ينفعوك
ودخلت مها ولمت ملابسها واغراضها وطلعت اخذت لدها واخذت اغراضه وراحت لصاله لقت خالد جالس
يمكن يكون ندم بس ما حب يبين لها
مها::ابيك توديني بيت اهلي يمكن تكون محتاج انك تعيش لوحدك يمكن تلقى راحتك في بعدي عنك وعن حياتك
خالد::ابركها من ساعه
كانت الكلمه زي الرصاص على نفس مها دمعت عينها الا انها ماحبت تبين له ضعفها وانكسارها
راحت عند اهلها بس مابينت سبب جيتها بيت اهلها يوم سألوها قالت لهم انها اشتاقت لهم وتبي تقضي معهم كم يوم
رجع خالد البيت قعد يتأمل كل شي دخل المطبخ وشاف انها كانت محضره له اكله كان يحبها حس بالندم الا ان غروره وكبريائه ماسمحله حتى انه يناقش الموضوع بينه وبين نفسه تعشى ودخل ينام
مرت الايام ومها في بيت اهلها كانت مشتاقه لخالد بالحيل بس شايله بقلبها وساكته وحتى اهلها لاحظو ان خالد حتى مايكلف نفسه ويجي يزورها وفي يوم من الايام قررو اهل مها انهم يسافرون اسبوع يرفهون فيه عن نفسهم وعن بنتهم اللي حاسين بحزنها وحسرتها رغم سكوتها دقت مها على خالد تستأذنه
اول ماشاف الرقم فرح وجى في باله انها تبي ترد البيت
خالد::نعم
مها::السلام عليكم

خالد::وعليكم نعم
مها::خالد اشلونك
خالد::بخير اخلصي
مها::انا ولدك طيبين الحمد لله
خالد::الحين من سألك
مها::خالد اهلي مسافرين وابي اروح معهم كم يوم وراجعين
خالد انقهر عصب لان امله خاب::بلي مايحفظك
وقفل الخط بوجهها
كان ابوها جالس بجنبها
مها مثلت ان خالد معها على الخط::انشالله بنتبه عليه يالله فمان الله
ابوها::هاه يبه زوجك وافق
مها ::ايه يبه رضى وقالي انتبهي على نفسك وعلى عزوم
ابوها حس ان بنته فيها شي بس ما حب يسألها ويضايقها
جى يوم الرحله وسافرو كانت مها تحاول انها تنبسط وتنسى همومها في هالرحله
وهم يتمشون على جبل كانت مها تمشي ومو حاسه بنفسها لان تفكيرها كان مشغول انه لو ردت وطالت
جلستها في بيت اهلها وش تقولهم وش تبررلهم وخافت انهم يدرون ويجبرو خالد انه يطلقها وهذا اللي يبيه ويضيع ولدهم مابينهم ويكون هو الضحيه مانتبهت مها الا وهي تتدحرج من الجبل كانت تصرخ بكل صوتها انتبهوا اهلها وراحو لجل ينقضوها رغم انه المسافه اللي طاحتها مو عاليه بس كانت المنطقه كلها صخور
جى الاسعاف وشالها وهي في فاقده الوعي ودوها المستشفى وكانت حالتها خطيره
اتصل ابوها على خالد وخبره وكان الخبر على خالد زي الصاعقه عمر ما فكر انه يفقد مها او انه يجي يوم وتنتهي مها من حياته استوعب خالد كل شي وكأنه فاق من اللي كان يسويه اخذ من ابوها عنوان المستشفى
واخذ اول رحله وسافر وصل خالد المستشفى ورجوله مو شايلته حس بقيمة مها تذكر كل شي تذكر اخر يوم هي وش سوت عشانه وهو كيف ردلها اللي سوته صار يركض مثل المجنون شاف عمه
خالد::عمي مها وينها وش صار كانت دموعه تسبق كلامه
ابو مها::ادعي لها ان الله ينجيها من اللي هي فيه
خالد::هي وينها
ابو مها::توهم طلعوها من غرفة العمليات وهي الحين بالعنايه المركزه
صار خالد يبكي مثل الطفل وراح لدكتور يتوسله انه يشوفها
الدكتور::ما اقدر اخليك تشوفها بها الوقت الين تزول مرحله الخطر ونشوف وضعها كيف
خالد::واللي يسلم عمرك ابي اشوفها انا زوجها
الدكتور ::رغم ان حالتها خطيره بس راح اسمحلك دقيقتين مو اكثر
خالد::انا موافق بس ابي اشوفها
دخل خالد غرفة العنايه المركزه شاف الاجهزه على مها وشاف شكلها اللي يقطع القلب الكدمات والجروح ماليه وجهها وجسمها كله ملفوف وحالته جدآ صعبه
مسك يدها وصار يسلم عليها
مها حبيبتي ولي يسلم عمرك لاتروحين وتسيبيني لحالي مها انا بدونك ما اسوى مها قومي واالي يرضيكي بيصير بس لاتروحين انا اسف انا ادري اني ظلمتك بس واللي خلقك انا احبك وما اقدر استغنى عنك وصار يبكي مثل الطفل وهوماسك ايدها
مسكه الدكتور وخرجه من الغرفه
الدكتور::ارجوك المريضه في حاله مايسمح لها بلي تسويه انت
خالد::والي يرحم والديك قول انها راح تعيش قول ان مها راح ترجعلي
الدكتور::خلي املك بالله كبير ولاتيأس ادعيلها رحمة رب العالمين واسعه انشالله تقوم لك بالسلامه
قعد خالد عند باب الغرفه وهو ضام وجهه بيده ويبكي مثل الطفل
مرت خمس ساعات جت الممرضه دخلت الغرفه بس للاسف لقت مها فارقت الحياه على خدها دمعه
خرجت الممرضه تجري تسمر خالد مكانه مايبي يحط في باله ولا واحد بالميه ان تكون مها ماتت
صار يجري ورى الممرضه وش في وش صار مها وش فيها
الممرضه خافت تقل له وهو بها الحاله وصلت عند الدكتور
دكتور المريضه فارقت الحياه كان الكلام اللي يسمعه خالد اقوى من الرصاص
خالد بكل صوته ::انتي تكذبين مها ما ماتت مها مارح تخليني وتروح مها حبيبتي وتخاف على مارح تتركني
بلحالي وتروح صار الدكتور يهدي فيه بس بدون فايده تذكر اخر كلمه قالها لها على التلفون(بلي مايحفظك)
وحس انه كان قاسي معها تمنى لو يكون كل هذا حلم وترجع مها ويعوضها عن كل الحرمان اللي قاسته معه بس للاسف الوقت ضاع وماعاد ينفع الندم كانت جنازة طلعت جنازة مها وكان روح خالد مع الجنازه
كان يمشي وهو شايل النعش وهو يحس ان الارض مو قادره تشيله اندفنت مها وكان خالد كل يوم يروح عند القبر ويجلس يبكي الين يجون الناس وياخذونه ويرجعوه بيته بس للاسف ياليت نص هذا كله سواه وهي عايشه وقت كانت محتاجه منه حبه وعطفه وحنانه اللي ظهرو بعد موتها حس انه لو يجلس العمر كله عند قبرها مارح يوفي حقها


وهذا القصه اتمنى انه تكون تنبيه لكل انسان قسى في يوم من الايام على شخص يحبه عمر الحياه مادامت لاحد اذا كان الانسان قدام عينك اليوم باكر الموت بياخذه منك ووقتها ما رح ينفع الندم وقولت ياليت


الدنيا فانيه ومو دايمه لاحد لازم نصفي قلوبنا ونعامل بعضنا بما يرضي الله اليوم الشخص اللي تحبه ويحبك قدام عينك عطه حبك وحنانك عطه عطفك لان باكر اذا راح عن عينك بتندم ومارح يفيد الندم...





منقـــــــــــــــــــــــــــــــــــــــــــــــ ــــــــــــــــول

المصدر: شبكة ومنتديات صدى الحجاج

الحياه مادامت لاحد اذا كان الانسان قدام عينك اليوم باكر الموت بياخذه منك ووقتها ما رح ينفع الندم وقولت ياليت


مشكور كل الشكر على القصه ابو تايه

يعطيك العافية اخي ابو تايه قصة مؤثرة حزنتني

قصة محزنة
مع الاسف انه في ناس هيك
مؤثرة جدا