من حاراتنا !!!.....

من حاراتنا !!!.....

صفحة " حارتنا " الهزلية








عباس يهاتف مشعل ...المكالمة مسجلة؟!





رن.. رن ... رن ... رن .... رن... رن .... "تشك" فتح الخط
عباس : "شلوم" أي قصدي "مرحب" , " أهلين " الله يخرب بيت نتنياهو .... أبو الوليد معي؟
مشعل : السلام عليكم, مين معي؟
عباس : "هههههه" ما عرفتني يا أبو الوليد أنا " محمود عباس" "أبومازن" يا راجل !
مشعل : عباس _ عباس, عباس ...... ما غيروا ؟
عباس: أه هوا عباس تاع فياض...! شو ؟ إتوقعت اتصل عليك من رقم ميرس!, ولا مخشير!, ولا أورنج!, ...
مشعل : لا مش قصدي, بس غريبة إنك تتصل من جوالك مباشرة !؟
عباس : لا غريبة ولا حاجة ما غريب إلا الغريب!... خلينا نخش في الموضوع .. بدناش نتصالح؟
مشعل: كيف يا راجل ؟ أنتو دوختونا..! من مصر, لمكة,لليمن,لمصر, لسوريا, وفي الآخر مش عاجبكو سوريا ! إيش القصة؟!
عباس: والله هيك شوية خلافات ...عبد ربه مش عاجبو الوضع؟! والجماعة بعدين جربو الأكل السوري, حبين يجربو شي شغلة تانية ؟!
مشعل : في مكة كنا مع بعض, إلي شاف دحلان وهوا بيصيح (يبكي) في الكعبة بيطنب عليه, ويلي بشوفكو بتحلفوا آلاف الأيمان بيصدق أنكو حتوقعوا المصالحة, ... وفي اليمن نفس القصة,..وفي مصر, من الآخر أنتو بدكو مصالحة ولا لا ؟! إنهونا؟
عباس : "ههههه" "كحكحكحكح"
مشعل : صحة ...! مالك ... إتكلم بالراحة .
عباس: خنقني "الحمار الخدام إلي عندي مزود العيار شوي في الدخان " غريبة ؟! مع أنو دخان كوبي ممتاز _عباس يحدث نفسه _ ثم يعود لمشعل .... دخلت عليك قصة دحلان يا أبو الوليد ؟!..."يخرب مطنك يا أبو فادي أما إنك ابليس" بيني وبينك يا أبو الوليد .. أصلا دحلان لما صلى في الكعبة ما كانش معاه وضو (وضوء) "هوا قلي" , بعدين... يمن مين والناس نايمين؟!.. بس اليمن يحل مشاكلو بالأول ؟ ومصر , مصر لو بدها مصالحة كان بتفتح إلكو المعبر ... مالك يا أبو الوليد .. إفهمنى عا الطاير !
مشعل : إيش أفهم ؟
عباس : بالراحة علي, أنتو بدكو مصالحة, وإحنا كمان!!!... بس إحنا مربوطين بشوية مصاري مع شوية إلتزامات, وديون للبنك الدولي !! بعدين وينك ... إحنا بعتنالكو "فتوح" لغزة ...صحيح بدكو جوالات" أي فون 4" أخليه يبعتلكو أكم من نقلة ؟! كيف سعرهم عندكو ؟! بيربحو؟! عارف إيش نغمة جوالي يا خالد ؟
مشعل : أكيد إنا باقون ما بقي الزعتر والزيتون ؟!
عباس : زتون.. ؟! زعتر؟!.. لا ياحبيبي , جوالي نغمتو " بابا تليفون , روحي فتوح مو هون هاهاهاها ؟!
مشعل : سيبك من القصص هذه وحلنا .. خليننا أندور علي مكان نتصالح فيه, ونتصافى عن جد؟!
عباس : إنتا قولك مكان وإحنا مــــــــــــــــوافقين يا حـــــوت ؟! إيش بدك أحلى من هيك0 ؟!
مشعل : ممتاز وين ما بدكو , مصر, الأردن, قطر, السعودية, موزنبيق, الواق واق, الصومال, البارغواي, أقلك سطح القمر ..!
عباس: "هههههه" حلوة هذه سطح القمر عجبتني علي الآخر نكتة 2010, سفينة الفضاء أمريكية, السواق إسرائيلي, والبنزين عربي, والمصاري أوروبية . وإحنا حنوقع.... أنا موافق؟

مشعل: يا راجل إنت مش هامك حاجة في الدنيا, بأقولك البلد بتخرب قاعدة, أسرى, شهدا, حرب, قدس, عودة , وإنت بتتمسخر .. هي المصالحة علي كيفك وكيف أمريكا وإسرائيل؟!.

عباس: خازوق دق ولم يقلع, من شرم الشيخ إلى سعسع, كيف العودة يا مشعل ؟ والعودة تحتاج لمدفع, والمدفع يلزمه كف ! والكف سيلزمه إصبع ... والأصبع في الضفة لاهٍ في .......... له مرتع ؟!!!
مشعل : " ما دامك عارف الصحيح ... إيش الحل ؟
عباس: "طعمي التم تستحي العين" يا أبو الوليد...... بدون تحزير!, ولاتفكير!, ولاتكفير,! ولا تدبير!, ولا تنظير,الحل مش خطير, أكون صريح معاك .... وأعطيك المختصر المفيد ؟!

مشعل: قول أشوف هات ماعندك ؟!!!!

عباس: بنقعد في تل أبيب وفدنا وفدكو!؟ بأتصل علي فياض, يجيب صدرين بقلاوة نابلسية, مع صدرين مسخن, من تاعون موسوعة جينيس؟! وبنجيب مسكرات, ونهفات, وحجات قلق...

مشعل : "مقاطعا عباس وبنبرة عصبية" إيش ..إيش.. إيش؟

عباس : بأضحك معاك ياراجل, عارفكو ماإلكو علي المسكرات, خلاص بنجيبلكو عصير برتقان "تبوزينا" ؟ وبنقعد! وبنشوف الحل, مصاري.... بنعطيكو؟!, جولات, سيارات, بدل, كرافات, تصريحات, إلي بدكو إياه.... وبنشوف إيش الأخوة الأعداء يبقرروا وبنوافق, وبعدين الجو بدنا إياه هادي, في انتخابات في مصر في الطريق؟

مشعل : حلم إبليس في الجنة... شكلكوا ما بدكو مصالحة ؟!... بس بدكو اتضيعوا وقت ... سلام يا حوووت , علي العموم بدي أسألك هالسؤال : كيف إنت عرفت رقمي ؟!!!!

.. طوط, طوط, طوط, طوط, "فصل الخط" إنتهت المكالمة


راقت لي
فلسطين الان

المصدر: شبكة ومنتديات صدى الحجاج

أبو إردينة والإف ستة عشر




ارفع راسك إنت في رام الله ... جيشنا جاهز والحافظ الله ... والهمة عاليه والمراجل ما تنهد والله ... نتنياهو فل بريشك جايك الموت هذا العهد والله . ..

هذا الموشح العريض أنتجته منظمة التحرير بعيد اجتماعها الحامي في مدينة رام الله ، للرد على نتنياهو الذي قرر استئناف الاستيطان واستغفال السلطة والعربان ، والقمة والألمان .

بعد مناقشات ، ومداولات ، وجيب وهات ، قرر الحاضرون الرد على إسرائيل .

محافظ القدس قرر مقاطعة الملبّس الإسرائيلي (نوع من الحلوى)، وشداد العتيلي بدو يوقف استيراد الماء من الشركات الصهيونية (يعني متنا من العطش).. أما فياض الهمام أمر الرابطة الجمركية باعتقال كل صاحب سيارة دجاج بلا رخصة فلسطينية .

أبو إردينة في تصريح صحفي مثل النار قال " يوجد في جعبتنا ما سنفاجئ به إسرائيل " .

غرفة التحرير في صفحة حارتنا بشبكة "فلسطين هالحين" اتصلت بمراسلها الفهمان أبو الجديان ... جواله خارج التغطية ... قرايبه ما بعرفوا عنه حاجه ، زوجته زي الأطرش في الزفة .

بعد ساعات وإذا الفهمان أبو الجديان برد من "العقبة"، وبكشف سر الاختباء المفاجئ ، وإغلاق الهاتف المحمول .

القصة وبصوت منخفض ، وما حد يسمع لنأكل هوا (يعني نتبهدل بلا مؤاخذة)، السلطة مدخلة مجموعة طائرات إف ستة عشر ، و9 رؤوس نووي ، و3 جرثومي ، والأخطر إنه الساعات المقبلة ستشهد تصعيد كبير .

خبر أبو الجديان، طير الظبان، ولع في الرأس الكوابيس والأحلام ، حتى نزل الأمّان (أمّان الكهرباء يا إخوان)، إللي ما قدر يصلحه كهربائي فنان .


هذا التصريح لأبو ردينه صمد نصف ساعة .. وإذا بالإعلام قبل دقيقة بخبط خبر عاجل تصحيح لتصريح أبو إردينه " المقصود أن (إخيارنا) عفواً ...خيارنا الوحيد هو الطلب من الأمم المتحدة الاعتراف بدولة فلسطين سواء ( ميديم ، ولا نص لارج ، حتى لو خزق ) والمهم موافقة الأمريكان .

في اتصالنا الثاني على أبو الجديان ، رد وهو خجلان ، قال فكرت إتغيروا جماعتنا ، والحمية وصلتهم ، أثريتها مثل كهرباء غزة في السنة مره حتى يمشي حالها .

الحاجة فرحة بعد ما اشترت النايلون ، والكمامات الواقية للنووي وخسرت إلي خسرته .

رفعت إيدها للسماء وقالت ... يا ريتك يا سلطة إتبنشري (ينثقب عجلها يعني)، و تتمسخي ، وفي كل ساعة تتبهدلي ، وعلى أقرب بائع خردوات تتسلمي ، وعند المكبس تخربي ، ولما يصلحوك بالنار يكووك ، ولما يكووك، يفلقوك .

بيان هام.. الآذان في الضفة " SMS"




إلى جماهير شعبنا البطل في الضفة المبسوطة، نعلن لكم البرنامج الذي وضعه وزير الأوقاف محموق البلاش، سهراً على راحتكم، والذي يقوم على أجدد أساليب الدعوة للدين, حول المساجد والصلاة والخطب والمواعظ وغيرها, حيث جعل من الدين "إشي روعة" وصارت الناس من كثر ما هي مبسوطة تصلي في منازلها.

يا جماهيرنا.. إن من أبرز ما ورد في البرنامج خطب الجمعة, كان زمان كل خطيب على كيفه يحكي, بس اليوم لأ تغيّر الوضع, بتكون القدس مولعة وسلوان مشعللة وخطباء الضفة بتحدثوا عن الولاء للرئيس أو عن الميراث أو الإفطار في أيام النوافل، أو الحيض والنفاس.

وهيك ما بنعطي الفرصة للاحتلال إنو يهيّج شعبنا ويروح لانتفاضة ثالثة واللي بتدمر مصالح السلطة، قصدي المشروع الوطني.

وبعدين صار لت وعجن في موضوع سماعة المسجد واطية ولاّ عالية, يا خوي الدين بقول ما تزعج غيرك, وإحنا وطينا الصوت في سماعات المساجد مش عشان في اتفاق إسرائيلي فلسطيني لا لا لا لا يا حبيبي إلعب غيرها.

إحنا أصلا ما غلبنا جيراننا وخليناهم يطلبوا منا، إحنا فهمنا على الطاير وشغلتنا نلبي النداء والرسول وصى بسابع جار "مش أصحاب الدار" وبصراحة سماعات المساجد عالية كثيير لدرجة طلاب التوجيهي ما بعرفوا يدرسوا والله.

وما إلكم علينا يمين أجانا مطرب ورقاصته وقلنا يعني الأغنية والرقصة بتتخربط في الحفلات لما بطلع صوت الآذان.. يعني هموم الناس كثيرة .


ومنو بنبطل نزعج المستوطنين وهيك ننفذ برنامجنا اللي من أهدافه "أسلمة المستوطنين"، بكرة لما ببطلوا يسمعوا صوت الآذان ويعرفوا انو عشانهم بهجموا على منازل وأراضي وزيتون الفلسطينيين معلنين إسلامهم مثل اللي في مستوطنات آرئيل وكريات أربع وغيرها ..ما شاء الله كثار المستوطنات، يعني المسلمين رح يكثروا.

كل إشي مخطط إله، وحسب خطة كبير شلة الضفة لإقامة الدولة المستقلة عام 2011 بكون كل المستوطنين مسلمين وما في مشكلة مع اليهود, وفي الأيام الجاية عشان نضمن عدم إزعاجهم أكثر رح يصير الآذان عبارة عن مسج على الجوالات بس نرجو إنكم تخلوا جوالاتكم "صامت" وهيك بنوفر في ميزانية السلطة وبنجمع كل سماعات المساجد وبنبيعها على اليهود في أعيادهم لأنهم كثير بكونوا مبسوطين وبحبوا يسمّعونا احتفالاتهم.

أما الصفقة بخلّصها إلنا "البلاّش والدحدح "هذي شغلتهم, وهيك بندخّل على السلطة ميزانية كبيرة وبنحولها كوبونات بنزين، ولاّ كيف بدنا نحرك سيارات الأمن عشان تحافظ على مجتمعنا من تسلل المستوطنين لأسواقه وخمّاراته المرخصة.. "إحنا رايحين لدولة مش مسخرة.. بدها تخطيط".

وفي المستقبل رح ننزل مناقصات لبيع سجاد المساجد لانوا إحنا بدنا نسحب البساط من تحت كم مستوطن مراهق بيجوا يحرقوا سجاد المساجد وهيك بشوفو البلاط وبنفلموا فيلم أخو أخته.

ومش هون النهفة لسه، لما يلاقونا جمعنا المصاحف من المساجد وبعناها على الخليج وهيك ما بلاقوا إشي يحرقوه ولا صوت آذان يدلهم على مكان المسجد.

وإذا بضلوا مصرين على فضولهم في البحث عن المساجد إحنا بنقرر انو تكون الصلاة في البيوت وبنهدم المآذن, يعني بدكم العالم يتفرج على مشاكلنا مع اليهود والمفاوضات تنهار عشان كم مسجد وكم قرية ؟

مش لهالدرجة يعني قلة الفهم! بدها لحلحة واطّمنوا كل اشي مخطط وإذا بتضلكم معنا في الخطط أي والله لتنسوا إنكم مسلمين .

ومعا وسويا للتقليل من المساجد .... من أجل ضفة خالية من الآذان

أبو خالد يفتتح أكبر بلوعة مجاري في الشرق الأدنى




في احتفال مهيب حضره العشرات من مناديب السلطة وحرس عمي أبو خالد (فياض ما غيرو) وبعض دوريات جيش ولاد عمنا نتنياهو في بلدة نائية أقصى غرب شرق رام الله، افتتح معالي رئيس وزراء ولايات الضفة الغربية المستقلة الديمقراطية أكبر مصرف لمياه المجاري .

وبدأت الحفلة بكلمة لرئيس بلاليع البلد أبو صفوان الذي أكد أنه هاي البلاليع أكبر نموذج على تطور خطة عمي أبو خالد في كم سنة لإقامة دولة جديدة، وإنها راح تكون مفتوحة بالليل وبالنهار لكل من يريد أن يدخل التاريخ من أضيق أبوابه برئاسة عمي أبو خالد .


ومن ثم ألقى عمي أبو خالد كلمة طلب خلالها من الحضور إغلاق أنوفهم (يعني مناخيرهم) وأذانهم إن أرادوا، وخلال كلمته التي ألقاها وهو يلبس جزمة نمرتها 44، أن هاي البلوعة ستكون مجرى لحكومته نحو السلام الذي ينتج دويلات في أي بقعة .

وأحيا المطرب الوطني أبو الليف الضفاوي حفلة غنى فيها لبلاليع أبو خالد وحمّس الجماهير حتى تدافع بعضهم لافتتاح البلاليع، كما شارك في الحفلة رغم أنه جاء متأخرا شيخ المشايخ هباش الحيران الذي دعا أن يرزق الله المواطنين بالإمساك وأن يرزق أبو خالد بالإسهال .

وفي نهاية الحفلة دخل أبو خالد إلى حمام (شغل إفرنجي) ليعلن من داخله افتتاح البلوعة الأكبر على مستوى موسوعة غينيس للشغلات البايخة .

أبو العريف.. خبرة في كل اشي




طفشان..زهقان..شايف الدنيا شاشة كمبيوتر كبيرة، بعد 8 ساعات من الشغل المتواصل أمامها، دخلت الحارة وشفته.

راسه كبيرة، عبيط، شنبه أصفر أصفر زي العشب الناشف، في ايده "مق" قهوة طوله 50 سم
(طبعاً قهوة مرة علقم).
يمكن بيدخن أربع علب في اليوم، في أحسن الأحوال، فش دخان إلا بدخنه "ملبوروا"، "رويال"، "فايسرول"، لف، أي اشي، المهم يسحب، وفاضي، لا شغلة ولا عملة.

طول النهار قاعد في البيت، بيتفشش في مرته وولاده، المرة كرهته، والولاد 24 ساعة برة الدار طفشانين من خلقته، ومش متحملينه إلا عشان قبضة آخر الشهر من البنك، واللي بيقبضها، وهو قاعد، مع انو لسة شاب.
ومع الزهق، ربى جاج "إسرائيلي" فوق الدار، وشرى 25 جوز حمام، "بلدي" و"مولد" وفي "سلفر" منه –نوع غالي من الحمام حسب ما سمعت-، وعنده تلفزيون، وستاليت بأربع رووس، ونت 1 ميجا.
المهم إنه بيفهم في كل حاجة: في السياسة والعسكر، والثورة، والنسوان، والطب الهندسة، والطبيخ، والعادات والتقاليد، الملابس، والسيارات، وبيفتي بحرقة.
شغّال حلّال مشاكل، بيشبك الناس وبيروح يحل، وبياكل قتلة وبيروِّح، عامل فيها "ابو الفهيم" و"أبو العريف".
عليه لسان، ولا فردة الشبشب، ناقص بس يمشى على الأرض، قاموس من الألفاظ الحقيرة، بلوزة زرقة على بنطلون أخضر، مش راكبات على بعض بالمرة.
شغال خّريط ومزّيع: "ادريتو الخبر؟"، "اسمعتوا الخبر؟"، "مصدر رسمي .. قريته على النت !!"، "بدهم يزيدوا الضرايب" .. كل واحد بيروح البحر.. عليه 3 شيكل ضريبة"، "كل واحد بدو يزور قريبه في المستشفي عليه ضريبة 2 شيكل"، "اللي بدو يقابل رئيس البلدية لازم يدفع ضريبة كمان"..إلخ ..
وما في على لسانه غير: "غزة سجن .. نفسي اطفش .. نفسي أهج، (بالوعة من الإشاعات والأكاذيب المغرضة، وبابور فتنة مع "استيم" عفن، و"بلف" كذب).
قاعد على الكرسي، معاه ثلاث رجال، وهو في النص -الكرسي مايل طبعاً- والعنين شغالات: "فلانة نزلت" .. و"فلانة طلعت"، و"هذه ليش اطلّقت؟" و"التانية ليش تجوزت؟"..
"فلانة نزّلت (أجهضت) في التالت" و"التانيه حامل في الرابع"، "فلان نِزِل" و"فلان طلع".
"هذا في القسام"، و"هذاك اتجمد"، "هذا أصلاً سرايا، وقلب حماة الاقصى عشان الوظيفة".

"محمد" أمس نزّل عبوات، بس والله بتخوف"، ومحمد دخل بـR.P.G"، بيرد عليه صاحبه عماد بيقله: "يا راجلR.P.G مين؟ والناس نايمين؟ والله إحنا اللي صنعناهم، وإحنا اللى صنعنا الثورة تاعتهم.
رد عليه الفهلوي، وقله:"اييييييييييه .. رجعتني 20 سنة لورا، أيام ما كنا نطبش حجار، ونضرب صواريخ سكاد "Scud" على اليهود، كنت انا أطخ يا راجل في ايد وحدة...في إيد وحدة بس 600 طلق من "البيكسي".
وحكى عن المناورات الي كان يعملها من الـ 1965 لليوم، صواريخ، وعبوات، وأقمار صناعية، وطيارات بأنواعها وأشكالها، ودبابات، وكلهم ركب عليهم وساقهم.
وحكى كمان عن محاولة إغتيال "رابين" اللي نفذها لما رمى جردل "شمينتو" من فوق النادي على الجيب حسب كلامه.
وصار يفتي في العسكر، أنوه، ولا أنه أخو أختو ... أنا واقف بتكلم مع جاري علي موضوع الكهرب مفصوله عني بسبب "خلل في السلك"، وهوا قعد يتحركش فيا بده اياني أتكلم..
أنا مروح من الشغل وزهقان، وهوا طفسان وشبعان نوم, وخش الفهلوي في السياسة مباشرة، فقلت في عقلي:"الله يرحم أيام ما كان يقف علي كشك الطحل، ويشتري منه جردل سندويشات، وطشت مخلل -زي الماكينة- عشان يدب بطنو .
انقلبت الدنيا، وصار يفهم في السياسة، اسمعوا ايش قال، والكلام استفزاز:"والله يا أبو مازن، إنك فهمان كتيير، شوف يا عماد كيف بيلعب في اليهود الشلولو؟، جننهم يا راجل.

قلهم: "غصبا عنكو مش، بخاطركوا، لازم توقفوا الاستيطان، عشان أقبل أخش معكوا في مفاوضات".."بس الله يسلم الضفة من تاعون حماس واحنا بخير".
"عارف يا راجل بيكلمني ابو العبد من الضفة، بيقلي انه العيشة قلق، أمن وأمان، ولا حواجز ولا غلاء، والناس متريحة ومطمنة، ولا سرقات .. والدين لا قام ولا قعد، بيصلوا هناك 10 صلوات في اليوم، وبيصوموا 3 رمضانات في السنة ؟!؟!؟ -والله العظيم-ومتريحين، بيطلعوا وبينزلوا من دون أي مشاكل" .
نسي (أبو العريف) أنو قاعد .. نايم .. ماكل .. شارب....، وما حد قايله وين أنت؟ والاشكالية ما حد مدور عليه ! -بس اللهم واحد علق على مشيته- وقله:" يا ابو العريف لما تمشي، ما تخلي الشبشب يخروش في الأرض لانه صوتها استفزازي".
بصراحة كلامه ما استفزنيش، قلت في عقلي:"هذا عنده فكر معبأ أنو هوا الثورة، واللي ملك الثورة، وإنها حكر على أبوه، وعلى تنظيمه ليوم الدين.

هوا الصّح، وما في حد زيه، وايش ما بيعمل، صح، وإيش بيقول، صح، الناس ممنوع تغلط وهوا مش إشكال.
عايش علي أيام زمان، من بطولات نُصها خراريف كذب، سمعها من "مخرفاتي" من كتب الثوار السوريين مع الفرنساوية".
وخش أبو العريف في اتفاقية "جنيف" واتفاقية "كامب ديفيد" و"انابلويس" والإنجاز الي حققنو للشعب الفلسطيني -أهبل يخرف، ومجنون يسمع- وانه "حماس إيش فهمها في السياسة؟ ولا عمرها طلعت ولا عمرها نزلت !! واحنا رجال السياسية".
بعد ما خلص كلامه، اطلعت فيه هيك من فوق لتحت، لهو قلي -بصراخ-: رد علي أشوف !! ولا خايف تحكي؟، ضحكت ضحكة صغيرة مبطنة بشوية مكر، وقلتله: "أبو العريف، قلي؟ بتعرف تقرا وتكتب؟.
رد: "والله لو بعرف أقرا واكتب، كان أنا اليوم مكان دحلان، بس إنت عارف يعني، الدنيا حظوظ".
قلتله:" يا أبو العريف؟ بأنصحك بدل ما انت بتضيع وقتك ع الفاضي روح اتعلم القراية والكتابة، وإقرا الكتب معدولة مش مقلوبة، وشوف وتنور، بعدين بتجيني لنحكي".

مش هيك المقاومة يا شباب





منذ احتلال فلسطين عام 2000 من دولة الجوار "إسرائيل" والشعب الفلسطيني يعيش في سعادة مطلقة ورفاهية عالية, حتى أنه طالب الاحتلال بالتوسع ليشمل مصر والأردن وغيرها ليعم خيره على الأشقاء العرب.

وما إن بدأت الانتفاضتان الأولى والثانية عام 1987 و2000 ضد الاحتلال حتى قام الصهاينة باحتلال فلسطين عام 1948 وصادروا الأرض وأصبح الأقصى يُحرق والإنجازات الوطنية تُسلب, ثم علت أصوات الديمقراطية والمقاومة السلمية المشرّفة وحماية الشعب والهوية بالكلمة تارة وبالوردة الحمراء على جنود الاحتلال تارة أخرى.

وباشر أولئك المقاومون بعمل المسيرات السلمية التي تضع فيها سلمى يدها في يد رائد لتشتبك الأيادي وتتوحد ضد آلة البطش الإسرائيلية ساعة من الزمن, وهنا برنامج كامل متكامل أقض مضاجع الاحتلال.

حتى أن الاستيطان لم يتوسع بل وأن جنود الاحتلال أصبحوا يخافون من الورد الأحمر الذي يلقى عليهم, طبعا هي حنكة الإحراج الدولي التي اتبعها المقاومون حين أرادوا أن يجعلوا من الجندي الإسرائيلي رجل إرهاب أمام سلمية شعب منكوب.

"عشان هيك الاحتلال خايف والمستوطنين ما بنتهكوا الأرض ولا بترجّع السلطة كل شهر العشرات منهم وهم داخلين للمدن الفلسطينية.. كل هذا جهود المقاومة السلمية والمفاوضات, كبار والله في السياسة ما شاء الله عليهم".

أصبح موديل المسيرات السلمية الصامتة، حيث يبدأون بوضع العطور وتلميع الأحذية والذهاب إلى المنارة في رام الله أو وسط بيت لحم وغيرها في موقف تقشعر له الأبدان، وعند تجمع الكاميرات والمتضامنين والمتضامنات تبدأ رحلة المقاومة التي سرعان ما تنتهي عند رحيل الصحفيين.


ومن ثم تعود الجماهير المقاومة أدراجها إلى المطاعم والشوارع والمتنزهات.. هكذا يقاوم شعب احتلت أرضه بالقوة عام 1948 وقتل أبناؤه ونساؤه في مجازر دير ياسين وصبرا وشاتيلا وغيرها الكثير.

وهيك بالمقاومة السلمية بترجع الأرض والمحتل بيهرب, بس خسائرها لا يستهان بها, فالغبار على الحذاء بعد المسيرة مشكلة، وإرهاق رفع اللافتات معضلة، ورفع الصوت في الهتاف ازعاج, ولكن كل شيء له حل فهدف هذه المقاومة تسهيل سبل الاحتجاج للناس, فالغبار مشكلته تحل عبر تعبيد كل الشوارع وعدم إلقاء الحجارة على سيارات المغتصبين والجنود وبالتالي يبقى الشارع نظيفاً.

أما اللافتات فستصبح اللوحات الكبيرة في البلد مكانها إن لم تكن مزدحمة بدعاية لليو أس إيد وهدايا الشعب الأمريكي التي تغمر نظيره الفلسطيني، أو ترويجاً لشامبو إسرائيلي لإضعاف منتجات المستوطنات, كما سيكثف من رسائل الجوال, وأما الهتاف فالشموع المضيئة والمسيرات الصامتة البديل "ليش نتعبك ونزعج غيرك".

هذه المقاومة السلمية تؤكد لنا بأن تاريخ الشعوب مزور فالثورة الفرنسية الدامية التي جعلت من فرنسا الآن دولة مستقلة عبارة عن قصص وخرافات وما مقاومة فيتنام لدولة الاحتلال أمريكا إلا أفلام كرتونية وما الجزائر إلا فبركة إعلامية, واندحار الاحتلال من غزة تمويه.

وإذا أردت الحرية لوطنك لا تنظر للتاريخ واسمع من كم ولد صاروا يفهموا في السياسة بدولارات الإنجي أوز, ولمع حذاءك وضع على ثيابك العطور وتجهز لحفلة مقاومة جديدة والتي ستكون في المستقبل عبر الفيديو كونفيرنس وفي داخل القاعات حتى لا يختنق أحد بالغاز وهيك بنقلل الخسائر ونوصل الرسائل.. وبهذا البرنامج المتكامل أقص إيدي إذا حررنا متر واحد!

" لولا " حبلى يا جماعة..وصاروا اليهود نسايبنا


بصراحة كان مشهد خطير يا جماعة .. عساكرنا المغاوير وكبار قادتنا الأشاوس من ألوية وعمداء ونسور وسيوف، متجمعين علشان يسلموا الكلبة لولا إلي هربت من مستوطنة قرب رام الله في أراضي الضفة ، ويا عيني الكلبة بيضة وكلابنا حواليها .


الكلبة لولا ما ضاعت يا جماعة .... كيف تضيع ؟

البلد أمن وأمان وناس بتخش وناس بتطلع , ومافي أي مشاكل في الضفة ...ولا أنتو ملاحظين غير هيك !!!؟ ...

بكل بساطة ليش نحرم الكلبة من أبسط حقوقها ...! هيك بيقول الشيخ الهباش ! بيفتي عن حقوق الحيوان , وانو لازم الكل , كل قوات الأمن تشاركنا في إنقاذ حياة لولا .

وعلل ذلك أن لولا راحت تسهر في أحد الكباريهات في رام الله مع كلب حبيب إلها , وإحنا ما إلنا فيها دخل ...( إلها دينها , وإلنا دين ) .

لولا يا جماعة كلبة مسكينة , ما إلها دخل في الي حصل ... لولا بيقفلها ألف راجل , وبتحل علي حبل المشنقة ولولا اليوم صارت في بلدنا , وإلى بتعدي علي حرمتها بتعدى علي حرمة بلدنا .

رجال ونياشين وسلاح وقوات وسيارات كلهم طلعوا من عربنا ومن غير عربنا , لأنو اليوم ما في فرق بينا وبين اليهود ما دام المصاري بتدخل .

صحيح هوا صار بعض الأشياء ما بتفرح، لكن عادي احنا تعودنا ..... واحنا بندور علي (لولا) , كان الجنود تاعون نتن ياهو بيحاصروا بيت في جنين في اتنين من السرايا ... وكمان في خلال 48 أربعين ساعة من البحث, كانوا أخوة المستوطن بروخي ( صاحب الكلبة لولا ) بيهاجموا ست فلسطينية معها ابنها .

لكن وشرفيا .... القصة شرفيا, إحنا هزنا الخبر لما اسمعنا بمثل هيك تصرفات من اليهود....و كنا بدنا نقسم حالنا لثلاث أقسام .... قسم في الخليل , وقسم في جنين (علشان نأدب اليهود طبعا), وقسم مع لولا , بس والله ما قدرنا لأنو الهدف الرئيسي بيضيع , خفنا ما يكفي عددنا لنقدر نبحث عن لولا ونطلعها لو من تحت الأرض ..هيك التعليمات .

الرجال شنوبها بتهز جبال وما بتهتز , والكوفية عالية , وبنلولح فيها , الرجال كلمتها وقافة , وبتغار علي عرضها وأرضها , واهلها , ونسوانها ,وبناتها .... كانت الأمثال الفلسطينية زمان حلوة كتير ....

وفي الأخر بعد ما أزهقنا بحث من حارة لحارة ,ومن دار لدار , ومن باب لباب, ومن شباك لشباك , ومن حمام لحمام ......

لقينا ( لولا )وصلناها بسلام لأهلها , وحبايبها .

صحيح أنسيت أقلكوا :- اتصورنا مع لولا قبل ما ترجع للمستوطنة .

مش مشكلة انو الكرمي والي معاه "النتشة" مات ... المهم انو لولا رجعت ....

اتصلنا بعديها لنطمئن علي صحة لولا قالوا إلنا :- لولا في المستشفي ما قدروا يروحوها علي البيت إلا بعد ما يطمنوا علي صحتها ...

راحت المستشفى , وفحصت دم وبول ... وفي الآخر أجا الخبر الأكيد وإلى كنا نستناه من زمان .

لولا حامل يا جماعة , بس 48 أربعين ساعة , صارت فيهن لولا حامل, وصرنا احنا واليهود نسايب .

احتمال يكون اشي مدبر النا حتي يضغطوا علينا في المفاوضات لنآخد ابن لولا في رعايتنا بكرة لما تولد ...
والله انا خايف الرئيس يقبل يتنازل , لأنو الولد عزيز زي ما بيقولوا ... والمرة الي بدها تركع جوزها تحرد وبس.

عباس " الحفيد " : عام 2105 سيشهد ولادة الدولة المستقلة

شدد على رفض المفاوضات ان استمر الاستيطان

عباس " الحفيد " : عام 2105 سيشهد ولادة الدولة المستقلة

أعلن رئيس سلطة الحكم الذاتي الفلسطيني محمود ياسر محمود عباس رفضه التام لأي استئناف للمفاوضات غير المباشرة، مع الجانب الإسرائيلي في حال استمر الاستيطان الإسرائيلي في الضفة الغربية.

جاء هذا ردا على مطالبة رئيس الوزراء الإسرائيلي ايهود اسحق بنيامين نتنياهو للجانب الفلسطيني لاستنئاف المفاوضات.

وشدد عباس "الحفيد" على أن العام القادم ( 2105) سيشهد قيام الدولة الفلسطينية على كافة الأراضي الفلسطينية "المتبقية"، مؤكدا أنه حصل على ضمانات "أمريكية وأوربية" جديدة تؤكد جدية المجتمع الدولي في قراره دعم ومساندة الشعب الفلسطيني في حصوله على الحرية والاستقلال.
وكان الرئيس الأمريكي بيل رونالد جورج بوش "الإبن" قد طالب الجانبين الفلسطيني والإسرائيلي بالعمل السريع على استنئاف التفاوض "قبل فوات الأوان".

وجدد الرئيس الفلسطيني تأكيده على أن السلام هو الخيار الاستراتيجي للشعب الفلسطيني، مؤكدا رفضه لكافة أعمال العنف والارهاب.

وندد عباس "الحفيد" بقرار الحكومة الاسرائيلية ببناء 20 وحدة استيطانية داخل مقر المقاطعة في رام الله، معتبرا القرار بأنه "خطوة استفزازية".

لكن نتنياهو " الحفيد"، شدد على أن القرار هو بمثابة خطوة اضطرارية نظرا للنمو الطبيعي للمستوطنين في الضفة الغربية، خاصة بعد امتلاء الوحدات الاستطيانية في "دوار المنارة" في وسط رام الله بالمستوطنين اليهود القادمين من كلكتا الهندية.
وقال عباس "الحفيد" في تصريح لوكالة الأنباء السيرلانكية :" لم يتبق لنا في الضفة الغربية سوى 3 مدن وهي رام الله ونابلس وأريحا، بعد أن تم تهويد كافة المدن والقرى وهدم المخيمات، ونقل سكانها إلى الأردن، وحتى تلك المدن، لم يتبق منها سوى 3 شوارع في رام الله، وحارة في نابلس، و3 أزقة في أريحا، بالاضافة الى زقاق وحيد في بلدة بيت جالا القريب من القدس.

وتابع الرئيس يقول في انفعال ظاهر : ورغم ذلك فاننا مصرون على مواصلة طريق آباءنا وأجدادنا الذين اختاروا درب المفاوضات والسلام كطريق وحيد لاستعادة حقوقنا".
لكن عباس "الحفيد" استدرك قائلا:" هذا لا يعني أننا سنقبل بأي حال من الأحوال استئناف المفاوضات دون تجميد اسرائيل لكافة أعمال الاستيطان".

يشار إلى أن إسرائيل كانت قد أتمت الشهر الماضي، بناء 3500 وحدة استيطانية داخل حي أم الشرايط في رام الله، وأكملت بناء 3 مدن استطيانية مكان مخيمات الجلزون وعين بيت الماء ومخيم نابلس.

وشدد عباس " الحفيد" على ضرورة وقف اسرائيل لنشاطاتها الاستطيانية في الزقاق الأخير المتبقي من بلدة بيت جالا، على اعتبار انها المكان الفلسطيني الوحيد الأقرب الى القدس، التي هودت بالكامل منذ 13 عاما، هي والبلدات العربية المحيطة بها.

وتابع الرئيس يقول:" ان القيادة الفلسطينية مصرة على إقامة دولتنا وعاصمتها "زقاق بيت جالا" على اعتبار انه المكان الأقرب الى العاصمة الأبدية مدينة القدس".

من جانبه شدد الرئيس المصري حسني أنور جمال محمد حسني مبارك، على ضرورة استنئاف عملية السلام في الشرق الأوسط، وعدم ترك المجال لأعداء السلام كي يدمروا آمال المنطقة في الاستقرار.


وندد مبارك خلال لقاء جمعه بالعاهل الأردني عبد الله الثالث بن حسين بن عبد الله الثاني، بالعاصمة الأردنية عمان، بقرار الحكومة الإسرائيلية باستئناف الاستيطان، مطالبا المجتمع الدولي بالتدخل العاجل لوقف الممارسات الإسرائيلية الاستفزازية.

سر إعادة السلطة للمستوطنين




صرّح مصدر مسئول بأن السلطة لا تقف مكتوفة الأيدي أمام محاولات المستوطنين تخريب أخلاق الشعب الفلسطيني في الضفة الغربية، وإنما تقوم بكل جهودها للحد من محاولاتهم إفساد أبناء الشعب.

وقال المصدر الذي فضّل عدم ذكر اسمه – خوفاً من الملاحقة الصهيونية له- إن المحاولات التي يقوم بها المستوطنون للتسلل إلى المدن الفلسطينية تنتهي بالفشل بعد قيام نشامى الأمن الوقائي والمخابرات والكل والله داير باله " ليش الحكي" بإعادتهم إلى مستوطناتهم فوراً بعد ترجّيهم بعدم تكرار مثل هذه المحاولات.

وأضاف قائلاً:" في إحدى المرات قمنا بإعادة أحد المستوطنين الذي دخل إلى مدينة رام الله، بالقرب من الخمارة تقريباً وعلى بعد أمتار من حفلة راقصة كانت بتجنّن، ولكننا قمنا بإعادته فوراً كي نقضي على أي محاولة إفساد".

وأردف معلقاً:" يعني هالمستوطنين جايين من بلاد برة بنعرفش أخلاقهم كيف والعياذ بالله، بدناش ندخل في سين وجيم, ناهيك عن تخريبهم للاقتصاد الوطني، يعني بشتروا الخمرة وغيرها من عندنا بأسعار أقل من داخل دولتهم!, كل هذا وبتّهمونا بالتنسيق الأمني, والمشكلة اللي بتهمونا ما بعرفوا أهدافنا المبطنة من هذا التنسيق, بعرفوش انو لحد الآن نمتلك أكثر من 150 بطاقة "في آي بي" والله اليهود ما سحبوها منا، وقال بقولوا عنا شو أنجزنا!.

وفي السياق ذاته طلب المسئول من مستوطني رام الله وبيت لحم أن يتقيدوا بتعاليمهم التوراتية مثل مستوطني نابلس والخليل الذين يحرقون الزيتون والمنازل ويعتدون على أهالي تلك المدن، موضحاً بأن أولئك لا تتم إعادتهم إلى مستوطناتهم عندما يدخلون القرى الفلسطينية لأنهم "متدينون" ويحافظون على الأخلاق العامة.

وتابع:" مثلاً المستوطنون الذين يدخلون بورين أو عورتا أو الخليل والحرم الإبراهيمي لا نقوم بإعادتهم إلى مستوطناتهم، لأنهم مثال للالتزام بالتعاليم الدينية وندعو جميع المستوطنين إلى التشبه بهم، وكما تلاحظون فإننا نعاملهم بالمثل ونتحلى بأذواق رفيعة ولا نقوم بإزعاجهم أثناء زياراتهم الترفيهية للقرى المذكورة بل لا نتواجد هناك أصلاً سهراً على راحتهم، حتى أننا ومن واجب الاحترام قمنا بترميم قبر يوسف في نابلس لتوفير الراحة وتسهيل دخولهم متى شاءوا.. إتعلّموا يا مستوطني رام الله وإذا شدّيتوا حيلكم بنخلّي مسجد البيرة الكبير "مقام الصدّيق شمعون" لعيونكم".

واختتم قائلاً:" وإحنا والله لو يطلع بإيدنا بنرجّع جلعاد لأهله، يا راجل شو بتفكّر، إحنا عازز علينا دموع أمه, بس شو نسوّي مش لاقيينه, لو في خمارة واحدة في غزة كان نشرنا شبابنا عندها وهيك لقطناه".

نجاد ... طول روحك




من لبنان خطب نجاد : سنهدم الاستكبار ، وسنقتل الكفار ، وسنقلب القافية والأشعار .
على رنين الكلمات الفارسية، ولع تيار الإعتلال العربي، ونعوا لبنان، ثم همس بعضهم أن طيارة الضيف القادم تحمل أطنان النار لحزب الله، وبحجم النار (مشاتيح ) الدولار .

اليهود اتفقوا مع المعتلين العرب فمنهم قال أقصفوه، وبعضهم قال خوفوه، وقسم آخر اقترح مسيرة للتحدي قبالة مارون الراس، وعيتا، وغيرها من المناطق التي بهدلت (إسرائيل ).

في متابعة مراسلنا الفهمان ، شاف العجايب على حد تعبيره.. تكبير، وتهليل ، وزغاريد لنجاد .

في سر ذلك قال أبو الجديان : قدّم في الليل بتلاقي في النهار، وقدم ذهب بتلاقي ذهب ، وضرب حجار بتلاقي نار، فلا تنسوا أن نجاد قدم للجنوب مليار دولار، أعادت بناء ما هدمته حرب اليهود.

الخبيث أبو المعتل قال : الفلوس راحت للشيعة ، (يعني من دهنوا إقليلوا ) بإختصار لا تمن علينا إيران ولا غيرها على حسب قوله .

مواطن غزاوي خربان بيته ... كل يوم بنام على الأمل، سأل زوجته: كم دجاجة في الخم عنا اليوم؟، ردت : 22 ، قال والديوك ؟، ضحكت وردت : في الدار ؟
قلها يا خبيثة :في الخم ؟ ، قالت: مفيش ديوك.. لا في الخم ولا في غيره.

المعتلين العرب مش عاجبهم زيارة نجاد، أما هم فالله لا يخلف عليهم.. أدخلوا دواء منتهي تاريخه لغزة، ولما حميت المشاعر، دخلوا شوكلاته دهن، وشكولاته حشي، وشوكلاته مص، وشكلاته برم، حتى الدايت ما نسيوها .


على رأي حمدي قنديل : الريس العربي ، "يشتري ناس ممكن، و يبيع ناس ممكن، يشتري نسوان، يبيع رجال كمان ممكن، بس ميعرفش يكذب علينا في الكرامه والشهامة، دي متنبعش في المزاد" .

والحب ما ينبعش في المزاد ، والمواقف مش كلام ، ورفح مش أحلام ، والحصار مش سراب ، والدمار مش شعار .

يا حكام العرب : مش عاجبكم زيارة نجاد للبنان؟ طيب إلي راجل منكم يزور غزة ، يبني فيها بيت ، يطعم جائعها غير الكلام .

زوبعة تاخدكم، تعصركم، وتكبسكم، وتعلبكم، أو تاخذنا ونخلص منكم.. أو غاروا من نجاد الشيعي على رأيكم ، صاحب محور الشر