العقــ☺ــل زيــنـــ☺ـة !

العقــ☺ــل زيــنـــ☺ـة !

☺ مـــ ♠ ـــع زيـــ ♠ ـــاد رحبـــ ♥ ـــاني ☺

- اقتباسات .
- أغاني .
- خَبْريات .. منوعات .
~.~.

زياد الرحباني / في سطور :
فنان لبناني ، سنّ خطا فنيا فريدا بالفن المعاصر ، الساخر بحنكة ،
ناقد سياسي .. ناقد للمجتمع ، بلهجة يرتفع سقفها اللاذع ،
المرح .. الدقيق !
مواليد الـ 1956 ، ابنا للفنانة الأسطورة الصباحية ( فيروز ) ،
ابنا للمبدع الأشهر من الأخوين الرحباني : ( عاصي الرحباني ) ...
بذرة وخلاصة لعملاقين من عمالقة الفن اللبناني !
والده الذي خلق خطا فنيا جديدا عامّة ، ولبنانيا خاصة ،
هو من وهب لعالم الفن ، جوهرة الفيروز ..
فــلـ عاصي ، الفضل في اخراج صوتها إلى العالم ، واقناعه به ايضا !
زياد الرحباني ، استطاع أن يفرض نفسه على العالم
بأنني موجود .. ببصمتي الخلاّقة الخاصة
لا لأنني ابن فيروز وعاصي ، وفقط !
موسيقى .. كتابة .. مسرح .. اذاعة ونقد ، فرض نفسه وبقوة ، وثبّتها .
كان أول لحن قدمه لوالدته ، أغنية غنتها فيروز لوالده ، " سألوني الناس عنك يا حبيبي " ، كان عمره حينها ، لا يتجاوز السابعة عشرة .

♣ هنا .. سنكون مع جنونه ، الحكيم ! ♣

المصدر: شبكة ومنتديات صدى الحجاج

ـ
كل ما تسألني كيفك ، بتزكر إني مش منيح
يعني بتعرف ..؟ لو بلاه هالسؤال !
اوميلي بإيدك بس تلتئي فيّ ، بكون ممنونك !
يعني لإنه صراحة .. أنا مش منيح
بس معئول تئلّي كيفك ، وئلّك مش منيح!!؟
... بدك موضوع من غيمة إنت !
إزا سمعت إني مش منيح بدك تسألني ليه
وخود بئى إزا خبرتك ليه
ما بعود بس مش منيح
بتصير حالتي تتدهور أنا وعم برويلك
تركني خيّي ..
أنا بيني وبين حالي ماشي
ع أساس إنّو : يالّلا منيح ماشي الحال

ماشي أنا والحال
كيف الحال .. كيفني أنا
وأكيد مش منيح
بس أنا مزبّطا مرغلجها
وما بفكر فيّا
ولا مرة سألت حالي ع العالي
كيفك منيح
وهالأيام ماشية.. سيبا بهمها يا أخي
وخلينا نسلم بالوما
ــــ

ـ
" نص الألف خمسمية / كاملة - زياد رحباني "
انشالله بينعاد عليكم من الألفين وستة، للألفين وستين.. سبعين.
لأنو في قصص، بتضلها هيّ زاتها.
مثلاً
كلمة بينعاد عليكم. هلق مش مقصود ينعاد عليكم السنة اللي فاتت ، للجميع.. لأ طبعاً.
بينعاد عليكم بس ، الأشيا اللي ما بتتغير.
متل مثلاً " نص الألف خمسمية ". موافقين ؟ شكراً.
ليك : مش ضروري تضل عم تشرح شي لناس معتبرين حالهم بيعرفوه.
لا بل بيعرفوا كل شي.
مش ضروري تحاول تترجم لأشخاص موضوع مش هاممهم بلغتو الأساسية.
مش ضروري تضل تعمل إشارات لعالم .. عم يتطلعوا على غير محل يا خيي..
ليك: مش ضروري تضل سهران على جماعة ناموا من زمان في واحد منهم قشط راسو بصحن التبولة بالعلامة .
روح. ضهار، تمشّى..أستأجر بسكليت ...
بكرة بيكبروا الولاد وبيخففوا تدريجياً الكاتشب بإذن الله .
فحاج تخوتي عليهن وتسفقي فيهون يا ماما.
بكرة بيكبروا الولاد وبيعرفوا انو الهمبرغر الطيب داخللو كاوتشوك : حاج تفنجري فيهم!
بكرة بيكبروا الولاد وبيعرفوا أنو البطاطا أحسن وأطيب من الفريت.
وبيعرفوا انو بعد ما في شوكولا ع لوبية ورز.
وأنو اللوبية تعتبر غداء ، والشوكولا رح يضلوا شوكولا.
ونص الألف.. خمسمية.
بالنهاية بيعرفوا إنّك بتحبيهون وانك أمهم ومش مرا مهسترة ع الكاتشب، وساحبة عليهم الحنجور ومحتجزتون بالمطبخ. يعني لوقتها.
هلق عم قلك كل شي انو بكرة بكرة.. يعني أيه مش انو بكرة بكرا يعني
حاول عموماً انو تبتسم للناس معليش. هيدي لا ع الكهربا ولا ع البطارية.
لا ع البنزين ولا ع المازوت. شغلة ما رح تزيد شي ع مصروفك.
مصروفك عم يطلع من شي تاني. أكّد عليه.
أنا مش كل مرة خبروني نكتة وضحكت، كانت النكتة بتضحك.
أنو طيب شو؟ بدك تعمل مشكل ع نكتة بايخة؟
في عندك مشاكل كثيرة صدّقني، واهم.
أضحك . أضحك لأّنا بايخة !
في واحد إلو بيطلع ع الراديو وع التلفزيون من وئت ما خلئت .. انا
وأنا مش مهم ، من وئت ما هوي خلئ أو حتى ئبل يمكن
كان عم يطلع ع التلفزيون ، عم بيطلع ويئول :
نحن نحذر ونشدد على بناء لبنان على أسس متينه وجديده
شو العمل ؟؟ بيشغل الفكر هادا
خاصة انو على فياء المتواصل عليه ما عم يلمح ايمتى بدو يبلش ، وخاصة ازا بيشدد
يعني لو بيئول يوما ما .. يمكن ما حدا بيراجعو !
بس " ابدا " .. انو شو بدو فينا هادا ؟؟ لشو بيطلع يؤلنا هالاشيا !
وشاعر شكله بهالمسؤولية الضخمه اللي ما مأشعرنا فيا !
دخلك كل ما طلع نحنا كمان .. شو بدنا فيه !
انو معئول الله اللي خلئنا هوي زاتو اللي خالئه ؟؟
كل شي معئول ! سبحانه بملكه .. بس هاي غلطه !
قلتلي مش عم تفهم شي من الوضع حتى ولو قريت الجريدة.
إيه نكبة .. مش هم.
خليك عم تقرا الجريدة حتى ولو مش عم تفهم شي بالوضع.
خليك.. ثابر ع الجريدة لأنو هيدي وسيلتك الوحيدة لما ما تفهم شي وحجتك معك.
يعني بتكون مواطن متابع رصين راصد كل التفاصيل بأدق الأمور وما عم تفهم شي. طبعاً.
هيدا مصدر قوتك. في ناس بعدن لهلق وبعد الألفية اجلّك،
بيدفعولك وما بيعرفوا ياخدو منك وصل.
وإذا ذكرتون بيقولولك " خلص يا شيخ ". أنو شي منيح؟ لأ... بس هنّي مناح.
تصور انو حضرتك تجي يوما ما تتزعرن على هولي بالذات تـ تعلمون الأصول، تبع الوصل ..
لـــــــــــــــــه !!
في ناس أصولون اهم من الأصول ، الأصول انعملت على أصلن.
الخمس دئايئ بيسيروا سته ، ازا في شي بالنسبه لإلك راح

وهنّي زاتن بسيروا اربعه وهني عم يسيروا سته ، ازا في اشي بالنسبه لالك جاي
بس هيّ الساعه لا عم تروح ولا عم تيجي
والوئت كل الوئت عم يبرم من الشمال صوب اليمين
هلا انت بتشوف السته اربعه والسبعه تلاته
هيــدي : انطبــاعـــات !
ما ني ئادر فيدك على هالصعيد ، بس فيّ اضمنلك انو دائما : نص الألف خمسمية
لاحظ إزا في واحد عم يكتب شيكات ئديش مسلا .. شيك بيئول مبلغا وقدره
مائة وخمسة وسبعون الفا وستمائة وتسعة وثلاثون ليره لبنانية فقط
ئيه هادا مثلا اطول من شيك بيئول مبلغا وقدره مليار ليره لبنانيه فقط
أكيد يعني ازا شايف الشك الأول من بعيد انتِ بتهيأ الك انو كتب الك
ثروته كلها واملاكه كلها ، بينما لأ
التاني مليار ليره لبنانيه .. وو تنيناتهم : فقط !
أصيله كتير : كل ما تزيد المصاري كل ما يئل الكلام ، وبعد فتره بيسير يئل التعاطي
بعدين بتلحئهون الأخلاء ، وآخر شي بتسير تئل الكريات الحمر
مهي الأرئام ئئصر من الكلام ئد ما تكون كبيره ..
لاحظ اللي معون كتير مصاري ئديش بيئل حكيون وتعبيرن
بيسيروا يشبهو المبالغ اللي هنن مجمدينها بالبنوكه وداير عليها التبريد
امشي معي يا اخي في محل الهوا نضيف بدون لا تجميد ولا تبريد
آآآه مدام لور: أرجوك وما تفهميني غلط ، مدام لور:
انت عم تاكلي بالسر صحيح ، بس.. عم تنصحي بالعلن!
بليز افهميني... كلي ع راحتك مدام لور: شو فيها؟
وقدامنا. له يا خيي مزبوطة هلق الحكيم ع راسي الحكيم،
بس انو شو بيتمنالك الحكيم؟ انو تضلك متل النمر يعني؟ ما في ما بدو يشتغل هوي كمان.
والمستشفى شو بالله؟ انو المستشفى بتتمنى تظل فاتحة ليل نهار وهالعالم عم تتغندر حولها مثل الأحصنة؟
ما.. أيه
أذا بتشلي امك ع جنب بيطلع آخرة النهار انو ما في إلا هول جماعة التأمين هني اللي بيتمنولك كل خير.
ما تدقك شوكة. شو بعملك؟ بس مزبوطة.
طيب انو هالختيار يا بيي اللي ميطأ كل النهار بزاوية بالمطبخ: طيب ما بيخصّنا هيدا يا بيي؟
ما جدك هيدا شو باك وله! وانو إذا كل يومين أو تلاتة رمى لو حكمة
او شي على وعظة عن الاخلاق. شو فيها ولا بيي؟
أسمعها. حط لها كاتشب واسمعها. كلها ع بعضها مع صفناتو بين كلمة وكلمة بتطلع لها دقيقة.
يحرق سماك ما بتحضرلك مية دعاية ونصيحة بالنهار. هلق دعاية جدك ما فيها إخراج بعرف ولا نسوان عم تلمح ولا سيارات عم تفرقع.. وناقصها ألوان
طيب... بس بالمقابل هالزلمة ما بدو يشرّيك شي أو يغشك بشي.
عم يحكي عموما بالأخلاق ومن المطبخ لنقول.
شو انو هوي وكيلها الحصري؟ لأ. انو حيطلعلوا عليها شي أذا مشيت؟. لأ.
أسمعلو انت وأنت وماشي لوين ما كان. بكرة بيموت جدك وبتبقى انت والدعايات.
بعرف ئديه ئضيت لتأمن على بنك ، وئدّي سألت لأعتمدت على بنك
تتعامل معو وبالنهايه انت كاين داحشهن تحت البلاطه او بحشنا وحطيناهن بالجنينيه
بالنهايه اهم بنك اعتمدت عليه
وما كنت مسدئ بس فتت تفتح حساب شو هيدا !! شو هيدا !!؟
يعني ما لحئت تستوعب عدد الموظفين من الكمبيوترات لماكينات الحساب والعد لسنتريلات التلفونات
وللكراسي الصحيه اللي كلها بتبرم للشاشات للرواء المتلج يعني شي متقدم وخيالي ومش مهم ، المهم انصرعت
هلأ اول مره طلبت كشف حساب اجاك الكشف مكتوب عليه هيك ع جنب : ما عدا السهو والغلط
اي نعم .. انو كان فكرك انو حترتاح من الغلط والحساب ومراجعة الحساب اللي مراجعينلك ياه تتراجع من وراهن تلات مرات
لأ طبعا ..
الغلط هادا يا حبيبي ، كيف إزا معو سهو !
طبعا السهو ممنوع بالبنك ، بس مطبوع ع كل معامله
يعني ليك وينك ..
بس تبئى تمرؤ ع دكان أبو احمد، طبيعي يعدّ الأغراض مرتين
ويقلك خمس أغراض أحدعشر ألف وخمسمية.
ليك لا قَوّْى تتمسخر ع أبو احمد.
17 هلق. مع انو بس يموت الواحد ما بياخد معو شي: هيك علمونا.
في ناس ما زالوا عم يخبوا ويضبوا. الأرجح مش قاطعين الامل.
وبرأيي أنو أكيد مش بسبب الإيمان يعني . هني رأيون ربما أنو هلق
وع مضض بعد ما بيقدر ياخد معو شي الواحد. بس من هلق ولوقت ما هني يتوفوا،
إلا ما يلتقى شي طريقة بالعلم بالتكنولجيا ياخد الواحد معو مش بس شي، ياخد معو كل شي.
بس لوين؟ وكيف؟ وبأي طابق هالجماعة؟ شحن ما شحن تخليص بوالص.
ولشو رح يعوزوهم؟ وبأي منطقة؟ ما بعرف.
ما هو اللي بيبقى هيك منو قاطع الأمل.. هوي مفروض يعرف.
انت بهالوقت عيش. وإذا معك قرش، قرش واحد، أعمل جهدك تصرفو خلال هالحياة الجارية.
مالقرش نصو نص قرش..
كل حياتي كنت علق اهمية كبيرة على صلاحية كل غرض أشتريه.
كثير مهم هالشي بالنسبة لألي. من فترة بطلت.
بطلت لأنو لاحظت انو كل شي عم أشتريه تاريخ صلاحيتو أبعد بكثير من تاريخ صلاحيتي أنا ... انا والبلد.
يعني شاري اجلّك مرهم صالح للألفين وتسعة! عم فوت عالأوضة طلعوا بوجي بطاريات عم يضاربو عليه هوليك طالعين للألفين واتناعش!
أووووف. كثير. كثير كثير. يعني صاير عم جيب أشيا تاريخ صلاحيتها مؤسفة فعلا!
مادي منيح لأنو ألها مستقبل.
تعا نفكر بتاريخ صلاحيتنا خيي شو رأيك؟
مش معقول نظل نفكر من هلق لشهر وشهرين لقدام ماكسيموم.
علبة اللبنة صالحة لشهر وله !
واحد وتسعين. لحظة خليك معي: أيه مدام لور.. والله سمعتك.
عم تقوليلي ما عم يزبط معك ولا حكيم. وانا عم قلك أزبطلك
يعني بليز ما تفهميني.. مش مصدقتيني؟ ما عم يزبط معك ولا حكيم... الله بيحبك بيكون. انجح شي انت مدام لور بتكوني بالسوسيتي!!
رايح جايي بهالمكتب، وفي ورقة واقعة بين طاولتين، وع الرايح والجايي، اللي هوي انت، عم تشوفا وعم تنسّم.
طيب ما.. شيلها. هلق مش انت موقعها، عال. بس ما حدا عم يشيلها.
وصار إلها يومين وهاليوم بيصيرو تلاتة. يعني رأي: شيلها وارتاح.
لأنو اولا: لو حدا بدو يشيلها كان شالها.
تانيا: هيدا بيأكد انو إذا سألت مين موقّعها؟ ما حدا رح يقول.
تالتا : أكيد ما حدا بهيك مكتب مسموم من الورقة قدك.
رابعا : مين ما كان موقعا الله لا يردو، الله لا يقيمو. منيح هيك.
خامسا : وقفلي هالموسيقى يا خيي. مش ضروري الواحد ما يلم ورقة إلا إذا هوي موقعها. خاصة إذا سامتو وما عم يشيلا ورايح جاي.
سادسا : بهيك مكتب في احتمال كبير انو ما حدا يلاحظ أن حدا شالها. ولا حدا يعلقلو وسام برتبة كوماندور مجهول او مقبول.
سابعا: بهالوقت اللي عم نحكي فيه.. كنت شلتها.
وبعدين انا عم يخبروني،
ثامنا أذا بدك، انو انت مع التغيير ومع تطهير الأدارات وأعادة الهيكلة والبناء وحرية الراي وحرية وسيادة واستقلال واشيا كثيرة،
وموعود بمساعدات دولية للبنان. هلق اوكي ما دخل..
شيلك من هالاشيا.. بس بالأول (تأهّب) شيلها.. الورقة الورقة..
ـ

بلا ولا شي

بحبك..
بلا ولاشي
و لا في بهالحب مصاري
ولا ممكن في ليرات
ولا ممكن في أراضي

ولا في مجوهرات
تعي نقعد بالفـي
مش لحدا هالفي
حبيني و فكري شوي
بلا ولا شي
وحدك..
بلا ولا شي
بلا كل أنواع تيابك
بلا كل شي في تزيين
بلا كل أصحاب صحابك
الثقلا و المهضومين
تعي نقعد بالـفي
مش لحدا هالفي
حبيني و فكري شوي
بلا جوقة أمك، بيّك
و رموش و مسكرات
بلا مالنسوان تحيّك
بلا كل هالمسخرات
تعي نقعد بالـفي
مش لحدا هالفي
حبيني و فكري شوي

،
شو هالأيام اللي وصلنالها
قال إنه غني عم يعطي فقير

كأنه المصاري قشطت لحالها
عاهيدا نتفه وهيدا كثير
حلوة دي، حلوة دي ، تعجن في الفجريه
بيقولوا لك من عرق جبينه
طلّع مصاري هالإنسان
طيّب كيف هايدا وكيف ملايينه
وما مرّه شايفينه عرقان
مش صحيح، مش صحيح، الهوا غلاّب
الغني من تلقاء نفــسه
حابب يوزّع ورق المال
ما انّه بخيل أبدا على عكسه
تذكركن يا ولاد الحلال
ليل يا لال ، ليل يا لال، وحوّل
كل واحد منّا عنده ستيلو
ما بمينع إنّه يصير تنسيق
جيب لي لامضي لك قلم ستيلو
كل الشعوب بكره حَ تفيق
يا سلام ، يا سلام،سلّم
كل المصاري اللّي مضبوبة
اللّي ما بتنعد وما بتنقاس
اصلها من جياب الناس مسحوبة
ولازم ترجع عً جياب الناس
هي دي هيّ ، هي دي هيّ، الأصليّه
،

،
الحالة تعبانة يا ليلى خطبة ما فيش
وانتِ غنيّ يا ليلى ونحنا دراويش
انتِ في وادي .. ونحنا في وادي
وكل لحظة تبعدنا زيادة

أرض العنّا بلا سجادة
وانتِ معوّدة تمشي عالريش
احتاروا فيكي وحيّروكي
وضلّوا حتى غيّروكي
لبّسوكي تاج ملوكي
وانسيتي أهل الطرابيش
رزق الله لمّن .. كنتي وكنّا
نجي لعندِك وتجي لعنّا
تاري العاش حدّك وتهنّا
صعبة يرجع وحدو يعيش
،

ـ
العقل زينة : برنامج اذاعي بُثّ من إذاعة صوت الشعب
عبر من خلاله زياد الرحباني وبطريقته الساخرة ، عن مواقفه السياسية
مما كان يجري على الساحة السياسية اللبنانية .

♠ العقل زينة : الحلقة الأولى ♠

اذاعة صوت الشعب تقدم :
شو بدك .. العقل : زينة !
الموسيقى الصامتة الواردة في البرنامج من تلحيــم زياد الرحباني
اما الاغاني الغربية فهي غربية و قد تم تجميعها في المنطقة الغربية المعزولة عن العالم و المجتمع الدولي
هذه الاغاني من تأليف و تلحين و غناء السود
قتلوني عيون السود .. اي يا ليل ماله حدود
و قد خرقت جدار الصود فوق العاصمة بيرود
العقل زينة ، برنامج تقدمه صوت الشعب في مثل هذا الوقت و هذه اللحظات في الذات .
~~
حمد الله ما بقى عنا شي .
لا بقى في موسيقى نألفها و لا قصيدة ننظمها و لا موقف ناخده و لا بلد من النوع انه يعني تتمسك فيه بدون ما تفطسه.
ولاه عمي ما دام نظمنا بيت شعر اجو مهجرين قعدوا فيه. قلنالهم هايدا نظم يا جماعة. قال لا هاد مصادر.
اخدنا موقف ما بقي سيارة ما اجت صفت فيه ايا فيه صفت عليه والله .
و ياريت .. كلها سيارت مش للي نزلوا منها.

اقتنعنا بانسان صار انساني مدري شو صارله عمل جراحة يمكن نقص هرمون انا باعرف؟
ما بتعبق طيب؟ عبّقنا, طلينا على البلكون, قشط البلكون اجى على الطريق والله ستر ما كان مارق حدا من العباد.
يعني بين المزح و الجد كان صار مجزرة جديدة.
قمنا نفضنا تيابنا جمعنا هالبالكون على الرصيف و قلنا ما راح نستلسلم بدنا نكفي الطريق .
سكروها عن راس الشارع . ليه؟ قال في تشييع؟ تشييع عال و مش بس هيك شيلوا كل السيارات الصافة على الملتين و شيلوا البلكون كمان.
سالنا اي ساعة بيخلص التشييع؟ لانه بدنا نكفي الطريق نحنا.
قال التشييع ما راح يخلص بقا . خلص مشي على طول. لانه اليوم بده يموت غيره و بوكرا باذن الله كمان راح بده يموت غيره.
رجعنا ردينا طلعنا على البيت دقينا ما كانوا يفتحوا المهجرين نسيتهم انا.
اخخخخخخخ
حملنا حالنا و قلنا يالله على المطار, طار قبل ما وصلنا.
فتنا على البرية سألنا المطار الجاي اي ساعة بيطير؟ قالولنا هداك ما بيغط اساسا طاير كل الوقت .
منيح هيك؟
طيب انت محلي, انا عم اعرضلك قصتي انت محلي شو بتعمل؟
هي النا احد عشر سنة منروح و بنجي و بعدنا بنفس المحل
ايه معليش بوكرا بيفجرولك ياه
بكل العالم و التاريخ القديم و المعاصر كان في شي اسمه الانصار
انصار الجيش ربما ، الجيش الحاكم الجيش الثوري ..
انصار البيئة انصار الثورة
يعني انصار من جميعه ،
هدوله بيجهم وقت بيعبروا عن دعمهم و بيستلموا كل واحد بارودة
بارودة بارودة على الماشي
هلأ كل بارودة الها رقم هلأ بس يخلص الجيش او تخلص الثورة او البيئة
بيجوا يا خيي ورا بعض بيوقفوا يالي بقيوا منن, بيوقفوا و بيردوا البواريد
شو عاد بدهم فيها شو بدهم يروحوا على الصيد؟ هاي مش بواريد صيد
هون بالعشرة الاف و اربعمية و تنين و خمسين بعد ما حدا رد شي
و ايا .. عم بيخبوا ! شو حاجتهن فيهم بالله انو الثورة ما خلصت
ما هي مش ثورة
انصار للجيش ؟
مش هيك بيكون الجيش و العالم ناطرة الجيش ، يا ولد !
شو حاجتكم بكل هي البواريد بالله
شو حاجتكم بهي البواريد غير الاشيا يالي ما حدا بحاجة الها !!
حماية ذاتية ؟
من شو؟ من مين ؟
ما صايرة الحماية من الناس متل حكايتكم ما ردوا بورايد استلموها
من بعد ما خلصت القضية
انت خايف ترد بارودة لانه يالي بوشك بعد ما ردها

ماهيك ؟
طيب يا خيي ما هو خايف لانه انت بعد ما رديت
خود بئى تعى قيمني هلئ !!
ايه يلعن فخامتك بعزى فخامته
كل هالسلاح مش زينة و لا رجال
و لا مراجل ،، شو هو لكان ؟
هايدا خوف قال !
ايه هي تسطيلة ، مش تسطيلة الحشيش تسطيلة .
كل ما تسألني كيفك بتذكر اني مش منيح
يعني بتعرف لو بلاه هالسؤال وميلي بايدك بس تلتقي فيني
بكون ممنونك يعني لانه صراحة انا مش منيح
بس معقول تقلي كيفك و قلك مش منيح؟ بدك موضوع من غيمة انت
اذا سمعت اني مش منيح بدك تسألني ليه و خود بقى اذا خبرتك ليه
ما بعود بس مش منيح بتصير حالتي تتدهور انا و عم ارويلك
تركني خيي انا بيني و بين حالي ماشي, عأساس انه يالله منيح ماشي الحال
ماشي انا و الحال كيف الحال كيفني انا
و اكيد مش منيح بس انا مزبطها مركلجها و ما بفكر فيها
و لا مرة سألت حالي على عالي: كيفك منيح؟
و هي الايام ماشية سيبها بهمها يا اخي
و خلينا نسلم بالومى
شكرا !
هلأ يا إخواتي كل انسان لبناني منا
اذا سمع رئيس الجمهورية عم يقول ..
اي رئيس .. مش هالرئيس الحالي بالذات
اذا سمع رئيس الجمهورية عم يقول: انا مش راح استقيل لانه بصير في فراغ دستوري مش ممكن اترك البلاد رايحه صوب المجهول او شفير الهاوية
اي زلمة بيناتنا باي منطقة من لبنان بيسمع هالتصريح اجمالا بيصدق الجزء الأولاني منه
يعني لحديت ( لانه ) اي (انا مش راح استقيل) .
لهون بحسها اللبناني صادقة .
حدا بيستقيل ؟
مافي حدا بيستقيل !
بس من عند (لانه في بيصير في فراغ دستوري و مش ممكن اترك البلاد صوب المجهول و شفير الهاوية) او شفير الوزان او شفيرة القبطية
هايدي كلها هايدي قصص هايدي
مدري ليه نحنا كشعب لبناني
هي المواضيع ما بيعود فيها مناطق يعني مدري ليه فردا فردا كلنا
بنحس انه هي الجزء هايدا يعني ها ما كتير بيتصدق مدري ليه
يمكن لانه اللبناني انو هو بدأة
ملعّب مشخشب بكل شي لانه بحاله بيتشخشب بيقسها على حاله
مقطع موصل و اخو شحطة وما شايف الثقة بحياته قد ما بيحكي عنها و بيستعملها كل النهار :
و لو ما عندك ثقة فيّ !
كنت روح اقعد عبنك خشب مضلع او مقطع ما باعرف كيف بيقولوله ..
يعني خشبة بعدين فراغ بعدين خشبة ومبروم ظهره برم متل كاتشوفال
و لونه اخضر متل لون الحشيش
بنك بجنينة "الصنايع"
يا الله احلى شي بالعالم جنينة "الصنايع"
وهالبنك يالله ما الذه على هايدا البنك مقضي ايام عحالها
دوام العادي
و كان يرن الساعة 6 للعالم انه بدنا نسكر تفضلوا ضهروا
وتبقى الصنّاع هونيك مواعدة مع عشاقها
لانه بالبيوت عند معلمينهم ممنوع الحب كمان
واقعد اتفرج على الولاد عم ينطنطوا بالبركة النصانية بنص الجنينة.
مافيها مي بس اسمها بركة و كلنا مصدقين
ووحدي كون وما احكي مع حدا قاعد على هالبنك
و حس الوقت قصير و الشجر يالي فوق البنوك طويل
ايه .. عم يخبروني مبارح و تضايقت كتير
انه هالبنك هايدا و كل بنوك جوا , افلست !!
كل البنوك الصغيرة بدها اتفلس بدها تضل بس الكبيرة !
لتعمل ثورة ع النظام لازم اول شي يكون في نظام
لتعمل ثورة ع النظام لازم تاني شي يكون في نظام
لتعمل ثورة ع النظام لازم تالث شي يكون في نظام
لتعمل ثورة ع النظام لازم اول عآخر يكون في نظام
ولك لتعمل ثورة ع النظام لازم اول عأخر يكون في نظام
اه ههههه
حيالله نظام بس نظام شي نظام
اي نظام بال او سيكام بس معروف ربه مثلا انه معيّن هـ النظام
ليك اذا عملت ثورة عشي مش موجود كيف بتزبط معك ؟
طب مافي نظام كيف عملت ثورة عليه ؟
اي ساعة عملتها ؟ وين كنت انا ماشفتك ؟
اول ثورة بدها تصير من اجل النظام ، وتاني ثورة لتغير النظام
يخليلي عينك ... / الله يرد عنك ،
انا ما عم جرب غير شي و بسحب كل اللي قلته
انا عم جرب غير البلد ؟!
يا عيب الشوم شو هالحكي هايدا !
انا ما عم جرب غير البلد ولا عم جرب غير شي .
انا عم جرب بس ما خلي هالبلد يغيرني .
هيدي واحدها اذا بتزبط معي : يعني انتصار ، انتصار لنفسي اولا
وبعدين عشوا ما بدك : على الرجعية وعلى الامبريالية و على الرأسمالية و على الاقطاعية
وعلى اول معادي للتطور و التقدم و الحرية و الديمقراطية
هايدي البلاد هي اللي بتغير ما حدا بغيرها
و اذا الجماهير نفدت بريشها تتحسن العيشا
بتصبح احلى عيشة
نفدت بريشها يحرق حريشها ، نفدت بريشها يحرق حريشها
قدمنا لكم دخيل اسمك يا سيدة حريشا
لااه !
بتقوم انت ركيض
يالله لوين يا با
نازل اشتريها هلأ
هلأ القرار الحاسم و المناسب هي اللحظة هي
لقطة اتوفقنا توفيقة بنت كلب
اشترينا
اشترينا ووفرنا 10 الاف ليرة والله هيك على الواقف
مش هي التوفيقة .. انت التوفيقة يا ولدي
ولاه حبيبي طيب ما قشط اخو الشرموش 10 ليرات من اصل قديه ؟
قشط 10 ورقات من دفتر وراق 100 صفحة يا ولدي
قشط ؟ بس فايق انه قشط ؟ ناسي انه طلع بعمل قبل ما قشط ؟
طالع مية ليرة الدولار و قشط عشر ليرات يعني خلص زهر اللوز واستوت الشمس فوق الاكدنيه يحرق حريشك ما اذكاك
ليك يا ولدي.. وفرت 10 الاف ليرة بس انقرطت بتسعين الف ليرة
اه انت عارف.. لا !
انت نسيت انه الدولار طلع مية و نزل عشرة
نسّوك هبلوك سطلوك واستلموك
شو بعد في كلمات بيخلصوا بالـ " اوك " !!؟
يالله هيجوا على بعض
وضجوا ع بعض
واحكوا فوق بعض
و عمرو ما حدا يفهم شي
منظرك قدام الصراف
والذعر المسيطر انو هلأ هي اللقطة
يحرق دينك شو لقطة !
بيأس شي بيأس .. !
شي بيقطع الامل و النسل سوا
بيقطع الامل من احتمال جيل واعي بعدو ولو لحظة بهي الطوشة
شو عم بيعملوا فيه
نادى وما حدا سمع
بتقول في البداية : المهم الصحة
وبتقول : يلا بسيطة الله لطف حديد بحديد
بتقول يلا منيح اللي سلم الزلمة عمرو ما يرجع البيت ...
وفجأة , ما بدها تفك هالعجقة هيدي؟
وهالناس اللي المجمعة بدا تدرمل على بيوتها
والمصلحين والمرشدين رح يسربون يا رب ..ياكبير
وبدها تبرد القصة ...مثل ما بتبرد الطبخة ...
وبتبلش وحدك تكفي العيشة ، طيب ما اول شي راح تلاحظو
انو الصحة اللي هي اهم شي ...الصحة تمام منيحة
بس ما بتطعمي خبز وحدها ، وانت اللي بدك تأمنلها الخبز ...بدك تطعميها للصحة
بتكتشف انو يعني, شو يعني حديد بحديد بالله ؟
هي كلمة هيك حافظها ابا عن جد انت ، بلا وعي
بلا مخ ...
شو يعني حديد بحديد؟ ، يعني كارثة ، يعني حديد فات بالتاني راحو الاثنين بدك حديد ثالث جديد ...
بتكتشف انو كمان لأ... مش عمرو ما يرجع هالبيت
لازم باسرع وقت يرجع البيت ...
سلم الزلمة وعمرو ما يرجع البيت ..
طيب الزلمة وين بنام ؟بما انو سلم هلق شو منعمل فيه وين بيقعد ع قلبكم ؟؟
ما معقولة حساس الزلمة ما بدو ...
المختصر سلم الزلمة ويا ريتو ما سلم ع شو سلم
شو سلم يعمل؟
الله يلعن كل واحد بيجي بنت وبسميها سلم ...
انو عشو كان معوّل بس سلم ؟
هات لشوف ، انا ما عم شوف
دخيـــلووووك
مستمعينا الاعزاء ...اعود لاذكر واكرر انو حلقتنا بهالترم بعرف عم يجي عليها كتير اعتراضات
لانو يعني مفهومة مين فيه على التنتين وربع,
نشرة اخبار صوت لبنان.
وطبعا الها كتير مستمعين, يعني عم بروّحوا اخبار اذا بدن يسمعونا ...
بس عفوا معلش ...
فينا نقول كلمة بخصوص هالموضوع...
انو شو هي الاخبار اللي عم بتروحها بالله عليكم ؟؟؟!!
طيب ما قولوا هيك من الاول بدكن اخبار
ما نحنا بدنا خبرية بالناقص مثلا
بعدين اذا مصرّين بدكن اخبار ...نحنا منقلكم شو في اخبار
سلمى
نعم
قوليلن شو في اخبار
بالنسبة للاخبار الاخبار هي هي وبعدنا محلنا
وفي حرب تقريبا عكل بقعة بالاراضي اللبنانية .. طبعاااا
بتظبط من ميل وبتنفخت من ميل
وبعدين هاي ما عاد اسما حرب
هيدي هي البلاد بحالتها الطبيعية
وشو كمان وما راح تظبط من هلق لميت سنة
والطوايف ما بطيقو بعضن ...
اساسا اللي قسموا حاسيين حالهن مرتاحين اكتر بلا الطوايف التانية
باسثناء كم واحد بحششوا وبيحكوا انو دايق خلقهن بدويلات
ولازم يقتح لبنان على بعضوا
يعني وكل واحد من اذاعتو ...بخبر الناس الحرب على طريقتو
فبيضهروا بيسهروا انو هني اللي ربحوا
هيدي هيك يعني En gros يعني وغير غير هيك ما بعرف سلمى اذا نسينا شي
لأ ...
بس بعد في العملات وقصصن الدولار والين والاسترليني ... وهيك
ايه ...الدولار مقرر يصيف بالباروك السنة
ووصفولو المناطق العالية ..بسبب مناخا ...ما ناخا وناخنا معها هوي
والين يعني ....باليان ...عليان ...مليان ...كيف ما اخذتي مليان
والسترليني ...يعني غمريني بحنانك وسترليني بعطفك
الله يستر على عرضك , عرفتي كيف؟
يعني هيدي هي كانت هذه الاخبار

ـ

.
شو هي هالقد معقدة حياتي يعني
ب 3 اسطر بتنقال كلها
لا يخت عندي
و لا تلفون بالسيارة
و الحمد لله رب العالمين ما بلعب بوكر
بالباصرة بلخبط
و فيديو وتلفزيون ما بحضر ، ما بحضر لانه بغفى
هايدا الريون اكس يالي بيطلع من الشاشة اله علي تأثير مخدر
فما في لزوم حشش مثلا .. يعني الحشيش الله مريحني منه
هاديني على الريون اكس بداله
اذا اعتزت انسطل،
و حياتي هياها اذا كنت رايق شوي شي ليلة
بيصير في تقنين
و اذا في كهربا بعصب لانه بشوف قديش بيتي بده ترتيب
و كل شي فوق بعضه
واوووف شو ناقص اشيا و زايد اشيا
و اذا اجيت اتلقح شوي شي مرة بعد الغدا
بيتلقح واحد صاحبي بالمستشفى فبلبس وبنط لعنده

شو بعد في ..؟
بعد في البيانو
كل ما دق بيانو بشتاقلك !
و اذا كنت ما عم دق بيانو و عم بشتقبلك
بكون نايم
و هون بكون احسن شي !
ما النوم بروفا للموت
انتهينا .

.

.
يا عيني هيدا برج الجدي مش برجي انا وحدي
لتفهمي يعني ..
مش كل ما اعمل شغلي او يطلع معي شغلي
دغري انو هيدا برج الجدي !
وناتعتيلي كتابين او تلاتة عن الجدي كل النهار !
هيدا الجدي يصطفل ..
مش انا الجدي الوحيد يعني ,
مش انا المأسس للجدي !
في اشيا مشتركة بيني وبين هالبرج
كوني انا جدي ..، حقيقة صحيح .
بس في اشياء خاصة فيي ومش موجودي بالجدي
كيف خصها فيك ؟
خاصة فيي أنا .. انا !
كشي غير جدي !!
يا اختي شليلي هالكتاب من ايدك
خاصة فيي انا ككراز كدلفين كجحش ! منيح !!
كتير منيح .
كتير منيح ؟؟

.

.
Listen to me my friend
We are Lebanese people
يعني ما باعرف كيف بدي قلك
We are
نحنا شو شغلتنا؟
We are business
نحنا Lebanese people شغلتنا ننزع كل شي موجود و بتطاله ايدنا
ما باعرف اذا فهمت علي
اذا عندك شغلة يا اخي تخربها سلمها او طيلها للـ Lebanese people
نحنا شغلتنا ننزعها و بعدين ( نعن ) انتبه بنعن بس نخلص منها
شغلتنا نعنّ و نقعد ننعيها انه يا الله انتزعت.
شغلتنا كذلك نخرب كل شيئ و بعدين نترسّم و نقول
لم يتبقى لنا اي شيئ .
شغلتنا على مراحل، انتبه :
اول مرحلة الدمار مثلا .. الدمار شغلنا
و تاني مرحلة نظم الرادي عن الدمار
اول مرحلة مثلا الفوضى شغلنا
و تاني مرحلة النعي ع الفوضى
شغلتنا بالمختصر, يا غابة مطلقة نحنا مشجرينها نحنا ساقينها نحنا مربينها
يا ...عيطوا للسوريين .
يعني شغلتنا تخريب الامن اولا ... تانيا طلب السوريين ليعملوا الامن
و ثالثا ( على 3 مراحل صارت هلأ )
التذمر من السوريين انه يا خيي تفضل هلئ السوريين بدهم يعملوا الامن.
هيك ونحنا عفكرة لشو طالبين الامن ... نحنا طالبين الامن لنطئ حنك ...
يعني من بعد ما خربنا البلاد كلها مع شجراتها طالع ع بالنا هلأ نطؤ حنك
و الله مننبسط بطقته ... يعني ... طرق ... طرق ... طرق
طأ الحنك متل صوت الدربكه بالنسبة لالنا
بيعني شي حميم يمكن ... تراث... لأ اكيد بدنا السوريين
او اي امن كمان مرق على تاريخنا بهالحرب
بدنا اخي يعني بدنا بدنا فعلا يعني
بدنا ناس يهتموا بالامور يالي نحنا مش فاضيين نضيع وقتنا فيا مثلا
متل الامن ...مثل الاستقلال ...مثل وحدة البلاد متل الحوار ...
شو هالخبريات هي ...هيدي اشيا ثانوية ....
نحنا مشغولين يعني ...نحنا ما فاضينلها ....نحنا عنا تقييس بلاطنين ، بلاطنين مش زابطة على كروشنا كمان...
ما البنطلون الطلياني ولك خيي يعني ما تزعل مني ...
اللي ما بيساع كرشنا ... يعني هايدا شو ديفوو هايدا ...
هايدا من ايطاليا جاي ديفوا بيكون ... لانو ليفوت كرشك فيه بده يكون اجريك اطول منك بشي نص متر ...
شو هالصناعة المتحضرة ، نحنا مشغوليين يعني ، معقولة يعني هي شغلتنا يعني نضييع وقت بالبناطلين ،
نحنا مشغولين بدنا نضهر ، بدنا نسهر ، بدنا نرقص زي ترافولتا اذا قدرنا يعني ،
نحنا عنا نشرة اخبار بدنا نقدمها متل ما بقدمها الاميركان يا خيي ...مقتضبة ...مقطعة ....سريعة ...بس بفرق وحيد عنهن انها فاشلة ...وهبيلة ...وريحتها سمنة حموية بدل الزبدة وثوم بدل المايونيز ،
شو لكان ...نحنا فاضيين !!!!!!!!
نحنا مشغوليين نحنا بدنا نخرب الساعات ...والغسالات ...والبرادات ...والتلفزيونات ....هودي الغرب بيخترعن ...شو مالغرب مستعمرنا !
قال شو بيبعتلك كتالوج قال ، فاضيين نقرأ كتالوج نحنا.
بعدين it's too late ....هذا الكتالوج ما فينا نقراه لانو صار بالقظان اساسا ...
ومع انو القظان بيشتغل على الناريت نحنا مشينو على الكتالوجات ، وهذا ارقى
ولو خيي ....مادام شغلنا يعني تصور ، كابس لدرجة انو ما فاضيين نعرف شو السر
شو السبب لحتى هالحالة ما كانت تعرف تجلس من 12 سنة لليوم ، مش شغلتنا طيب ....
مهي ايادي خارجية عم تلعب بمصايرنا ، وخلصنا .... نحنا شو دخلنا هول دول كبيرة عم بيلعبوا فينا ... اما نحنا اذا بترجع لقلنا ...
اذا بتسألنا ... اذا بتحب تاخد راينا ...والله ما معنا خبر شو عم بيصير وليه عم يصير معنا هيك ، نحنا ابرياء بشرفي ،
وحياة ولادك ...
وهيدا اللي شايفو انت طالع بالعكس على الكورنيش ...مسكين الله يساعدو ....معمي قلبو ...ارهقتو الحرب صدقني ....
وهيدا اللي بنط عن الصف كلو وبيفوت راسو من طاقة الفرن
بدو خبز، ما هيدا جوعان ، جاي يأمن خبز لاولادو ...
ما شايف الصف ...ماشايف ، كدر ، حزن عميق ...وهيدا اللي بدو ينجح كمان بدون فحص ...هايدا ما تزعل منو ما فيك
هيدا يتيم ...والفحص بدو يحطو بموقف حرج ....حدا بيفحص يتيم
الله بقولها هاي ؟!...
طيب ليش انت ما تشوف انو رغم كل هالنكسات ، بعدنا قادرين نستلم اتخن مخلوق بالبشرية ، منزعبر على ... ولاه
و ما بيعرف ...
هلأ ...اطلع هاي مش فيات ( سيارة ) ركبتلها يا ريس موتور فراري .
شو رأيك؟ طلاع سوقها ، وفلت نبريش الريدياتيير لانو ما لو عازة
...ماشية السيارة فرجه بلاه ، بس هني بالشركة مدري ليش حاطينو يعني ، بيحطو يعني لانو يمكن تحما السيارة ...بس منين بدها تحمى ...ما راح تحمى ...
انا عندي طريقة ما بخليلك ياها تشوف الحماوة ، هي شغلتنا ... my dear

تخريب للموجود على اساس انو تعديل للموجود ، وتأسيس لتخريب اي شي ممكن يجي بالمستقبل ومحضرينلو تعديل نحنا ،
القانون معدل، الفيتيس معدل ، المية وعشرة معدل ، وع هالمعدل ،
واللذة ، انك اذا بتاخد هوياتنا كلياتنا ،
ما في واحد مذكور ع هويتو انو هي شغلتو ...
يمكن لانو هاالمصلحة هي بعد ما الها اسم ، هيدي خلقة بتكون هبة من الله ،
نحنا متل التلميذ البهلة والمستذكي ، او الذكي كتير وذكاه اكبر من عمرو وغلطوا وخبرو ، فهبلا ، منيح ؟
تلميذ اهم مشاريعه
و انجازاته انو قدر عمل هوووووو ومن كل قوتو بس ضهر لحظة الناظر من الصف ، وبس رجع الناظر قعد عاقل ومتل التوتو
( يالي اكيد سامعين فيه )
متل التوتو ...بس كتييييير مبسوط انو عمل هوووووووو
وهيدا الحمار يالي هو الناظر ما عرف مين عمل هووووووو
يالطيف شو هالانجاز !
اساسا شو هالمستقبل من بعد ال هوووووووووو
شو رح يصير شو بتعمل؟
والابشع من هيك لو بيعرف هايدا انو الناظر عرف مين عمل هووووو
وآفرو
وما قلو شي ، كل همو انو بس هو رجع وصار بالصف
ما حدا بقى يعمل هووووو...
يا خي الناظر مش مأيّد عقلو عليه ....
فاضيلو يا الله ...!!!!!!!!!
دخيلو ؛
( يتبـــــــــــــــــــــــع )
.