يا ترى شو صار مع مدير المنتدى عند ما راح يخطب....؟؟؟!!! ( أدخل وأنت راح تعرف )

يا ترى شو صار مع مدير المنتدى عند ما راح يخطب....؟؟؟!!! ( أدخل وأنت راح تعرف )

كان مدير المنتدى مرتبط بموعد مع العروس وأهلها
ليتقدم إليها ولكنه لم يشأ إغلاق المنتدى لمدة ساعه هى مدة اللقاء
مع الأهل فأخذ اللابتوب معه وشحنه على آخره وتابع الردود على
الأعضاء فى صفحة الشكاوى وهو فى طريقه للمنزل راكبا التاكسى

بمجرد وصوله إلى العروس سأل عن أقرب فيشة كهرباء لأن الشحن شارف
على الإنتهاء

والد العروس: أهلا يابنى ... ....إزيك !!

المدير(وهو مشغول بلوحة مفاتيح اللابتوب): أهلا بيك يا عمى .....

أنا يشرفنى إنى أطلب إيد بنتك مها .....موافق ولا لأ؟!!!!

تبادل كلا من والد العروس ووالدتها وأخيها نظرات الدهشه

والد العروس(مستغربا): حضرتك بتكلمنى ولا بتكلم حد على الإنترنت !

المدير(مازال منشغلا بلوحة المفاتيح): لا يا عمى أنا بكلمك إنت هو معقوله
أتكلم مع حد غيرك وأنا قدام حضرتك!!!

والدة العروس: طب يابنى طالما بتكلمنا بصلنا طيب..!!

المدير(لم يرفع عينه ويديه من على جهازه):ليه يا حاجة هو أنا هتكلم بعيني ولا ببقي؟!!!!

إقترب الولد الصغير(8سنوات) من العريس مبهورا بالابتوب(الجهاز المحمول) وهو يقول

الصبي: عمو .....هو الجهاز ده فيه ألعاب كتير زي الأتاري الي عندي؟!!

العريس(مازال منشغلا بجهازه): أيوه يا حبيبي وأحلى من الي عندك كمان

الصبي: طيب ممكن ألعب شويه .. ...عشان خاطري يا عمو

(هنا فقط رفع العريس عينه من على جهازه لأول مره وتوقف عن الكتابه
وهو يوشوش فى أذن الصبي)

العريس: لو خليت أبوك يوافق عليا هلعبك كتير قوي

طار الصبي فرحا وهو يقول
بابا بابا أنا موافق إن عمو يتجوز أختي الكبيره أبله مها!!!!!!
ثم إلتفت إلى العريس وهو يقول
ألف مبروك يا عمو!

الوالد(صارخا): أمشي ياد خش ذاكر . .... مبقاش إلا إنت يا أبو رياله الى هتوافق ... ومتوافقشي؟؟!!

(مشي الولد باكيا ولم يهتم به العريس وقد عاد إلى جهازه منشغلا)

الوالد: إنت يا حبيبي إنت كمان .....إنت إيه حكايتك ؟

العريس: حكاية إيه يا عمي .....أنا معنديش حكايات إنت عندك؟!!!

الوالد(بضجر): إنت جاي تهزر

(لم يعره العريس أي إهتمام وقد ظهر مشغولا بموضوع ما على جهازه)

فإقتربت الأم من الوالد وتكلمت هامسته .!!
الأم: إلا قولي يا حاج .....هو الجدع ده بيعمل إيه على البتاع الى معاه ده ....
.وإزاي بيكلمنا وهو بيحرك إديه الإثنين على الزراير دي كلها؟

الوالد: والله معرفشي يا تفيده..... يظهر والله أعلم إنه بيكتب الكلام الى
بيقوله لنا فيطلع من بقه!!!!!!!


الأم: يا ندامتى !!!..... معقوله دي يا حاج ؟!!

الأب:طبعا يا تفيده معقوله ماهو إحنا فى عصر التكنولوبيا!!!
إنتي مش شفتي إزاى كان ملهوف على أي فيشة كهربا أول ما جيه لأن
الشحن بتاع الكلام بتاعه كان هيخلص!

الأم: يا خويا الى يعيش ياما يشوف!!!
على كده يا حاج لو النور قطع هيبقى أخرس؟!!!!

الأم: طب يا خويا لازم لو وافقت عليه نشتري للبنت كرتونة حجاره قلم
عشان تبقى عامله حسابها فى أى وقت!!!

الأب(صارخا): هو أنا معقوله أوافق على الآلة دي .....ليه من قلة الرجالة يعني

العريس: حضرتك بتكلمني يا عمي

الأب: لأ يا حبيبي أنا بكلم تفيده

العريس: تفيدة مين ؟

(دخلت العروسه فى هذه اللحظه مكسوفه وهى تنظر إلى الأرض
وبيدها أكواب العصير ولكنها لم تلاحظ فيشة الكهرباء فإنقلبت
على وجهها أرضا وإنفصلت الفيشه )

العريس(صارخا): إيه الى هببتيه ده .....إنتي إزاي تفصلي الجهاز!!

الأم(بصوت خافت): يا حلاوه .....أهو بيتكلم من غير كهربا أهو يا حاج

الأب(بصوت خافت): ماهو كان شحن على الآخر يا تفيده .....افهمى بقى

ثم إلتفت إلى العريس قائلا

الوالد: إيه يابني قله الذوق دي إنت بتصرخ فى عروستك وإنت جاي تتقدملها؟!!
ده بدل ما تساعدها إنها تقوم وتودها بكلمتين بعد ما فيشتك الهباب دي وقعتها

العريس: يعني أساعدها تقوم ولا ألحق أشغل الجهاز عشان المنتدى ما يتعطلشي؟!!

الأب: ده جيل إيه ده.....هو جاي لينا منين ده!

العروسه : من النت يا بابا.....من النت

الأم: الله يقطع النت والى شغالين فى النت !
يا رب تيجي عاصفة تسونامي على النت والي فيه!!!!!

الأب:ممكن بقى يابني تقفل المخروب ده وتكلمنا شويه

العريس: خلاص يا عمي المساعد بتاعي جه بدالي دلوقتي

إلتفت الجميع حولهم يبحثون عن ذلك المساعد فضحك المدير ...
العريس (ضاحكا): لأ يا جماعه أنا اقصد إن المساعد بتاعي أخذ مكاني
فى الشغل دلوقتي يعني أنا دلوقتي جاهز لأى إستفسار لمدة ربع ساعة

الأب: لا حول ولا قوة إلا بالله .....طيب يابني طالما مش فاضي ليه حددت المعاد ده مش كنت تحدد معاد تكون فاضي فيه

العريس: يا عمي خير البر عاجله

الأب: طيب..... إحنا لسه متعرفناش بإسمك ولا شغلتك
ولا سنك ولا شهادتك ولا أي حاجة خالص!

العريس: أنا اسمي موديراتور ...ده الإسم المستعار!

قامت الأم تحوم حول العريس وتنظر إلى يديه تبحث عن شىء ما ثم مسكت
يده فجأه وهي تقول
ممكن تشمر إيدك يا عريس الهنا؟!!

العريس(وهو يشمر): ليه ياحاجة إنتي هطعميني و لا إيه !!! أنا إطعمت قبل ما آجي عندكوا ‍‍‍‍‍

الأب:ليه قالولك إننا عندنا كوليرا !!!

العريس: لأ يا عمى أصل أنا قاعد ليل نهار فى غرفتي المكيفه
الصحية فلما بروح أى داهية تانية لازم أطعّم

الأب(بصوت منخفض): داهية لما تخدك يا شيخ!!!

صرخت الأم( وهى تمسك بيده اليمين وترفعها عاليا): يعني مافيش صليب
إمال إيه موديراتور ده؟ إنت يهودي؟‍‍‍‍‍‍‍‍‍!!!!

ضحكت العروسه وهى تقول: لا يا ماما دة النيك نيم بتاعه

الأم: ال إيه يا ضنايا؟‍‍!

العريس: خلاص يا جماعة .....أنا إسمي سعيد وعندى 26 سنه يعني تأبيده‍‍‍!!!
معايا شهادات كتيره لو قلتها لكم كلها يبقى هنقعد يومين فبلاش أحسن
وشغلتى المدير عام على منتدى الفقر حشمه

نظر الأب إلى المدير وملابسه البسيطه غير المتناسقه وهو يقول
سيماهم على وجوههم‍‍‍‍!!!‍‍‍‍

العروسه (مبتسمه): بجد إنت المدير بتاع الفقر حشمه .....
ده أنا مشتركه فيه من 5 شهور

العريس: ما شاء الله....بس إنتي مش ملتزمة بقوانين المنتدى
ولابسه كويس وعايشه فى عيشه آخر أبهه

العروسه: أنا عملت كدة عشان عارفه إن فيه عريس جاي يخطبني

الأب: إنت يابني عاوزها تلبس إيه .....هدوم مقطعه

العريس: لا يا عمي خلاص مش مهم لما أبقى أتجوزها أبقى أقطع لها هدومها‍‍‍‍‍‍!!!

الأب: ومين قالك إنى وافقت عليك أصلا

العروسه : ومتوافقشي ليه يا بابا ده حتى الموديراتور أكيد هيخليني مميزه فى المنتدى
مش كدة برضه يا موديراتور

العريس: طبعا وهعينك معانا من المشرفين على قسم لوحدك

العروسه (بسعاده ): بجد..... هتعينى مشرفه على قسم لوحدي

العريس: طبعا وهديكي أسهل وأحسن قسم فى المنتدى

العروسه (فرحانه): هييييه .....هتديني قسم إيه ؟

العريس: الشكاوي!!!

العروسه (صارخه)
: لا أرجوك .....كله إلا الشكاوي

هز العريس كتفيه وهو يقول
خلاص نفتح قسم للوفيات وأعينك مشرفه عليه

الأب: يا ترى خلصتوا ولا لسه ؟!!

نظر العريس فى ساعته وهو يقول: أنا فعلا وقتى قرب ينتهى

لأن المساعد بتاعي عنده ميعاد مهم ولازم أدخل مكانه

الأب: أنا مش موافق على الجوازه دي

العروسة: ليه يا بابا دة انا.....

قاطعها الأب صارخا : اخرصي يا بت إنتي وروحي ذاكري لأخوكي

خرجت العروسه باكيه غاضبه بينما إلتفت الأب إلى العريس قائلا
شوف يابني .....لما تبقى تفضى للجواز إبقى تعالى إتجوز بنتي .....
لكن طول ما إنت فى الفقر حشمه ده مالكشى عرايس عندي......
فاهمني ..!

العريس: خلاص يا عمي براحتك .....بس إذا كان منتدى الفقر حشمه
هو الي مزعلك أنا ممكن أسيبه

الأب(فرحا): بجد يابني .....طيب سيبه هو فعلا الى مزعلني
لو سيبته أنا هسيبلك بنتي بدون أى كلام


شكره العريس ثم جاء إليه فى اليوم التالي ومعه نفس اللابتوب وهو يقول
أنا سيبت الفقر حشمه من إمبارح وإشتركت فى منتدى تانى اسمه

اللاجــئـيـن ********



سقط الأب على الأرض ميتا وصرخت الأم وبكت العروسه وأخيها الصغير
بينما جلس العريس فى غرفة الصالون يتابع منتداه الجديد....


هههههههههههههههههههههههههههههههههه
ههههههههههههههههههههههههه
ههههههههههههه

المصدر: شبكة ومنتديات صدى الحجاج