خربشات على جدار الواقع

خربشات على جدار الواقع

الفترة هاي حاس في خربطة يعني في اشي بصير كنت دايما خايف انه يصير زي ما بقولوها اللي بتخاف منه بطلعلك بس انا خوفي ما كان زي ما انتو متصورين خوفي من الفترة يعني الوقت والمكان سبحان الله لازم يجي يوم ع الواحد ويلاقي اللي ربنا اختارله اياه كيف وليش ما بنعرف بس بنشعر بهالاشي ولازم الواحد يكون عنده يقين انه ربنا رح يختارله الصح ف اكيد ما لازم نهكل هم ونحسبها كثير بس اللي مستغرب منه واللي ما لازم استغربه لانه هاي مشيئة ربنا انه ليش هسه ليش مش من زمان كان اتغيرت حسابات كثيرة بس برضو يمكن هلا احسن لانه لو ما صار اللي صار كان ما صار اللي هلا بصير المهم انا ما رح اقعد احسبها زي ما حكيت اللي كاتبه ربنا بصير وانشالله رح اتقبل الامور واكون عند حسن ظن الغير وما رح اكون "ذلك" ورح احافظ ع هاد الاشي لو بدفع كل عمري عشانه لانه الانسان بتجي فرصه وحده واذا بضيعها ما رح ترجع بس بنفس الوقت لازم هاي الفرصه تكون بقدر ذلك الاهتمام وتحافظ على نفسها قبل ما انا احافظ عليها لانه هي كمان ما رح تلاقي ناس احق مني يحصل عليها لانه هي على اسمي فاذا عملت غير هيك بتكون ظلمتني وظلمت حالها ويمكن اكون انا الفرصه اللي لازم انملك .
التاريخ يعيد نفسه واكيد انه هاد الحكي صار مع غيري زمان ولا ما كان صار معي بس بوقت غير وقتي وشخوص ومكان غير بس المهم انو نوصل لنفس النتيجه المنتظرة .
"كسر الولد الزجاج" ولربما عاد مرة اخرى ليكسره فعل وفاعل ومفعول به فمن الفاعل ومن المفعول به الله اعلم نلتقي باناس ونخسر اناس فرح و حزن ف الذين خسرناهم لابد من ان اناس اخرين فرحين بلقائهم والاناس الجدد الذين التقينا لا بد من ان غيرنا حزنو على خسرانهم معادله متوازنة ليعمر الكون فلابد من وجود حزن حتى نجد السعاده ولا بد من وجود السعاده لنجد الحزن .
الانتظار اصعب من ان يوصف فهو لا يكتب ولا يلفظ وانما يسرقنا لفترة ويشغلنا عما نحن فيه ويمزجه قليل من التعب والقلق والحيرة ولكن هل يا ترى سيأتي من ننتظره؟ وان اتى هل سيخبرنا بما جاء فيه؟ هل سيطمأن قلبنا المتلهف ؟ هل سيفرحنا بقليل من الكلام الجميل؟ اتمنى ذلك فكلي شوق لسماع ذلك.
الحنين الى لا شيء الى شيء بعيد لا نرى منه الا السراب لم نسمع منه الا الصدي
يمتهنون ويتصنعون الصمت وهم لا يعرفوا من الصمت الا احرفه الصماء يسمون سكوتهم بالصمت " الصمت" "اذا كنت تستطيع ان تغيير اسلوب صمتك فلا داعي للكلام"وهم يغلقون افواههم ويسمونه صمت يتكلموا القليل المفسد يتكلمون بلا كلمات بلا معنى مجرد احرف صماء يسمونه كلام جميل اراء لها تاثيرها وهي مجرد زبد بحر ليس له اي قيمه. يبحثون عن الحب بين رفوفهم العفنه يعتقدون انفسهم بانهم عاشو اجمل قصص الحب والعشق الازلي مجرد اشخاص وجدوا انفسهم يفتقرون كل الاحاسيس المرهفه فما هم بقيس وما هن بليلى مجرد اشخاص يحاولون ان يعيشو قصص لا تبت لهم بصله فهم لا يمتلكون مهارات الحب ويحاولوا تقليد غيرهم الفاشلين ف اكيد رح يفشلوا والمشكله انهم بيستغربوا وبزعلوا انهم فشلوا بتجاربهم وهمه عارفين قبل ما يبدأو انهم رح يفشلوا مجرد محاولة لاقناع نفسهم بانهم همه انظلموا وبعلقوا اخطائهم ع الزمان الله يعينك يا زمن شو بدك تحمل لا تحمل من غباء هالعالم الفاشل.

حتى الدين اللي بنرجعله عشان نرتاح بنطبقه غلط واكبر مشكله انه بنرجعله يعني بس نسنتفذ كل الحلول بنرجعله كأنه الخطه البديله اللي بنستخدمها في الوقت الضائع ولما ما تزبط معنا بنقول حتى ربنا مسكرها بوجهنا هو احنا اتوكانا عليه من الاول عشان يخذلنا وبنصلي عادات وتقاليد ما في لا يقين ولا خشوع بنصوم جوع كلاب وبنمضيها نايمين لما يأذن المغرب والكارثه بندعي عند الافطار الهم اني لك صمت هو احنا صمنا احنا نمنا وبنستنى باب الحارة وبنحكي فيه من شهر 3 طقوس رمضانيه وتعبد وتهجد.
الدنيا ماشيه والكل عايش بفكر في المستقبل لما رقبته تنكسر وبنفتخر بماضي لا احنا صنعناه ولا بنعرف عنه اشي والحاضر ربنا بفرجها واحنا قاعدين وحاطين رجل ع رجل.
بنحكي عن حالنا دين التسامح هو فعلا دين التسامح بس وين احنا من ديننا عشان يكون فيه تسامح الحياه الزوجيه الرائعه ما بدي احلف يمين بس الله اعلم قدي فيه مرة بتكره جوزها والعكس صحيح بتحكي للبنت بيتك اولا فيك بتقلك لا هاد اتضهاد بدي اشتغل الله لا يردك اشتغلي واتعبي بتفكر حالها انها بتنجز, في اليابان من اعظم الدول المتقدمه المرأة لما تنخطب بشغلها بعملولها حفله مطنطنه ومكافاه نهاية خدمه لانها رح تتجوز عشان تروح ع بيتها بحكولها الله يعطيك العافيه الان دورك تربيلنا جيل جديد بفهم ولعلمكو بيتهم المطبخ بكون بابه اوطى اشي عشان الزوج لما يدخل يوطي راسه احترام الها واحنا المراة عنا بتروح ع بيتها ويلها ترتاح ويلها جوزها وويلها ولادها وويلها تشتغل وتطبخ انداري والله في اشي غلط.
الواحد نفسه يتهنى باتخاذ قرار بحياته من مصغرنا بندرس زي ما بدهم بختارولنا الجامعه والتخصص وبعديها الشغل زي ما بدهم حتى شريك حياته اللي رح يضل بخلقته طول عمرك ما بنختاره مجرد انهم بقنعوك فيه يعني همه اللي اختاره كل اشي ما النا فيه دخل بحياتنا قطع شطرنج بتحركنا ظروفنا القاسيه .
نظرة تشاؤميه بحته بالعكس والله بضحك وانا بكتب مبسوط على اللي بصير لانه ما رح نقدر نغيير اشي خرابيش كتبت علينا قبل ما ارجع اكتبها على حيط الجيران. خربشات يعني كيف ما عملنا رح انضل نخربش لحتى يجي اللي بعدنا ويقراها ويعمل فيها وهمه بفكروا انه هاد اللي صار معنا وما بعرفوا انها مجرد خرابيش كتبت حتى تنسى مجرد نظريات خاليه من التجريب والاثباتات ولربما الذي اتوا بعدنا اثبتوا صحتها او عدم الصحه فان كانت صحيحه عملو بها وان كانت خاطئة اجتنبوها فلنا الاجر على كلتا الحالتين.
فما هي الا خربشات على جدران الواقع.

المصدر: شبكة ومنتديات صدى الحجاج

الدنيا ماشيه والكل عايش بفكر في المستقبل لما رقبته تنكسر وبنفتخر بماضي لا احنا صنعناه ولا بنعرف عنه اشي والحاضر ربنا بفرجها واحنا قاعدين وحاطين رجل ع رجل


مأساتنا عم نطالب بتجديد حياتنا والمصيبة الكبرى عم نستنى الحياة تجدد نفسها بنفسها واحنا قاعدين وبنقول الله بفرجها

ربك ما بفرجها عليك وانت قاعد ما عم تسعى (اسعى يا عبدي)

والحياة لا يمكن تجدد حالها لأنها حياة ... احنا اللي بنجدد فيها واحنا اللي بنصنع التجدد واحنا الحياة

اما نضل متكتفين وبنقول يا رب يا رب وما عم نعمل ولا عم نسعى ولا حتى عم نفكر

هيك ما بتكون حياة

هيك بتكون موت

هيك بتكون هامش ما الك معنى ..........

خربشات رائعة وبكل فقرة فيهم فيها فكرة
انا برأيي انه لكل شي سبب بس برضو لازم نحسبها وما نعشم حالنا كتير لانه احيانا بنوقع على راسنا وما حدا بسمي علينا فلازم من كل شي نعرف السبب والهدف بدون ما نتخيلهم او نتوقعهم ....

الحزن احنا اللي بنصنعه واحنا اللي بناخده واحنا اللي بنضيعه بس بدنا شوية وقت لنتعلمهم هدول الاشياء صح ...

بالنسبة للدين حدث ولا حرج والمشكله بمشوه باشياء واشياء وبعملو فيه على حسب احتياجاتهم
يعني في كتير عادات وتقاليد ضد الدين بس ولا عندهم استعداد يفكرو بتغييرها ...

انا بستغرب انه ليش البنت تدرس خمس ست سنين عشان بالآخر ما تشتغل
يعني بعرف انه الشغل رح ياخد من وقتها احكي الصبح ممكن يكونوا الاولاد بالمدرسة بس حتى لما بيرجعو رح تكون تعبانه ما رح تقدر تربيهم وترعاهم وتحرص عليهم لانه هي مو بكل قواها ... ولو انها ضلت في بيتها كان البيت كله بصير منظم ... بس برضو مو حرام تعب دراستها كل هالسنين يروح وما تستخدمو


من جهة القرار حطيت ايدك على الجرح بجد التحكم بقرارارت المستقبل من دراسة وزواج من اقصى التحكمات بالعالم ...

موضوع رائع رامي شكرا الك حاولت اعلق على كل فكرة على قد ما بقدر ...

كلامك مزبوط يا ريما وهاد اللي احنا بنحكي فيه

شكرا على مرورك

دانا يسلم كتير كلها خرابيش سواء رائعه او لا فهي مجرد خربشات وافكارها كتير لانه كنت احاول اصلط الضوء على بعض الامور اللي معاصرة النا ومو بالشرط انها تمثل رايي بهاي الامور مجرد ذكرها .
بالنسبه للحسابات وانه تكون الامور مية بالمية صح انا بصراحة ما بحب انو اخسر الخسارة بعتبرها سوء اختيار وسوء تقدير امبارح كنا بنتناقش انا وصديق الي الله يذكره بالخير بخصوص هاد الموضوع لانه في شغله كانت مخربتيتني شوي وتعامل معها بحذر ف اتهمني اني بخاف من المستقبل وما عندي روح المغامرة واني بحسبها بالارقام والزوايا الهندسيه وبحكيلي اتركك من هالحكي وخلي عندك روح المغامرة وخلي الامور تمشي لحالها بس المشكله هاد الحكي ما بزبط معي مستحيل ما بتخييل حالي اعمل شغله قبل ما افكر فيها من كل الاتجاهات بس المشكله كمان اني بدقق وبتغلب في التفكير خصوصا ازا كان الموضوع مهم بالنسبه الي صار يضحك علي وانا صرت اضحك ع حالي كمان.

زي ما حكيت دانا المواضيع كتيرة وكل فكرة بدها حكي كتير بس بالنسبه للزواج والمراة ما بعرف الها اكتر من وجهة نظر بس الا ما يكون في حل منطقي والدين كمان ضايعين فيه جهل وبنفصله على كيفنا والاهل وكل اشي والله اشي بعل.
مشكورة مرة تانيه دانا ولعل خير .

رامي في مثل بيحكي قيس قبل ما تغيص


دائما الانسان لازم يحسب حساباته صح يدرس الموضوع بكل جوانبه

في الحالتين سواء نجح او فشل بتكون هاي مشيئه ربنا

لكن في فرق بشغله وحده لما بتدرس الموضوع بتكون متطمن من النتائج وراضي عن حالك

لكن لما قراراتك بتكون عشوائيه وبتتخبط فيها هون بيصير صراع داخلي لو اني فكرت

ولو اني حسبتها صح ومن هالسوالف الطرمه علمك انت وبتأكل اصابعك ندم وبتندب حظك

لكن لما القرار بيكون مدروس بتكون متطمن نفسيا انك عملت الي عليك حسبتها وهيك طلعت

هاد رايي انا

هلا ريماس نورت الموضوع والله شوفي ريماس انا دايما بحسبها صح الحمدلله وما عمري بحياتي ندمت ع اشي صار والله بس مرات تجري الرياح بما لا تشتهي السفن

معك حق

صديقي العزيز رامي قراة خربشاتك ووقفت عاجز امام هذه الخربشات التي تحكي كل شي فيها عن الواقع الذي نعيشه

فاني يا صديقي اقول لك لن ياتي النجاح بدون تعب ولكن القدر يلعب بنا كما هو يحلو له


واخيرا صديقي لا تياس من الحياه ما بعد كل ضيقه لا الفرج

وارجو ان تفبل مروري المتواضع

طيب يلا لملم خربشاتك وغبره من هون ما نقصنا خرابييش
ريمااس مبسوطه ع حالك ونازله تردي عليه والله انك مراقب فاشل .. كيف بتخليه يخربش ع راحته ..ما عرفتي تضربيه على ثمه عشان ما يعيدها .. اي احنا ماالنا قديش داهنين ومبيضين الصدى وهو نازل يخربش على الحيطان


ريماس بالله عليك لو انه واحد من طلابك في الصف الاول خربش على الحيط شو بتعملي فيه . معناته يلا اجراءاتك

شفت يا رامي زي ما هي اسمها خربشات في منظفات وعقوبات وفي جوائز كمان بس اذا بطلع معك خربوشه طقع .وعلى مكان مناسب كمان .. يعني لو مثلا ترسم او تخربش ويطلع معك لوحة الموناليزا
وكنت تخربش على حيط عند امي الا تخليك في لسانك تمسح الخرابيش . بالرغم من انك رسمت لوعه عالميه تحفه .. بس رسمتها في المكان الخاطئ ..
وفي كمان دهان ممكن تخربش وتخربش وتخربش وفي الاخير تدهن الي خربشته كله ويرجع الحائط نظيف وممكن العكس تدهن وتدهن وتدهن الحائط وترجع تخربش عليه وممكن يطلع حلو وممكن مش حلو حسب الخرابيش

فاهم علي يا حج ولا مش فاهم .. يجعلك لا فهمت اصلا كلها خرابيش في خرابيش