احكي اللي عندك

صح كلامك بس في ناس بتحكي حكي معين بس مع بعض لانو في ناس تاني لو يقرأو ما رح يفهمو متل الناس المعنيين فيه وبتكون الصوره مختلفه جدا بالنسبه الهم صح ؟؟؟؟؟

كلامك صح ميه بالميه وانا ليش كتبت فشة هالغل عشان هيك
وكمان الانسان المستقبل اظن لازم يدافع عني وبين للناس بطريقته العفوية ( بالعقل ) شو كان المقصود هذا في حال انه المستقبل فهم علي
بس المشكلة حتى المستقبل ما فهم علي وفهمني غلط شو العمل

يلا الله بعين

اليوم العيد فحبينا نطلع انا وخالتي وماما وابن خالتي (بكون اخوي برضاعه يعني بمون عليه من الآخر ) ماشيين بجبل الحسين وعين الله علينا وما لقيت غير بنتين اما شو بنتين من اللي بحبهم قلبكم بتلاقي الحجاب هيك ملفوف لورى والرقبه مع الحلق شو حلال الحلال مبينين لانه الدنيا شتى والبلوزه مع القبه العاليه بتغطي الرقبه كتير من الآخر....
المهم هلأ... البنت مستعجله خبتط فيي والله انها خبتط فيي انا ... قعدت نص ساعه تعتذر بس المشكله ان ابن خالتي هو اطول مني فهي بتحكي معي بس عيونها فوق : اوووه سوري ما كان ءصدي(قصدي) انا بس مستعجله شوي بجد بجد سوري انا كتير منحرجه مو عارفه شو اءول (اقول) .... وعيونها ما اجو بعيوني قلتلها هاااااااااااااي انا هون مش فوق على اساس انو ابن خالتي اطول مني والمشكله انو الشب صدق حالوا وهات يصحى من الغيبوبه اللي عاش فيها بسبب عيون الاموره شو رأيكم من الآخر صح !!!!!!!! وانا الشب اسحب فيه سحب وهو من الأخر هي البنت حلوه بيني وبينكم وابن خالتي امور شوي يعني كتير المهم صبايا من الآخر

والمشكله لما حكيتلو مادام عاجبتك البنت شو رأيك اعمل شالي متلها عصب علي طب ليييييييييييييييييييش بدي اعرف ؟؟؟؟؟
مع اني انا ما بحب هاي اللفه بس كنت حابه الف مخ الولد بلكي يصحى بتعرفوني يعني لازم انكش مخي .... ومن هون لحد ما يموت ما رح يخلص مني انا بفرجيه ...

على فكره صحيح انا بنتقدها بس انا كمان بحكي بالآل بس بشد تمي وانا بحكي مو برخيه وبتركوا سايب وعلى رأي بعض ناس : أف أف أف أف أف أف أف أف

صح ولا لأ

اولا كل الشكر لك اخت دانا للطرح هذه الموضوع .

الواحد نفسو يفش غله في هذه الحياة كلها ومن مشاكلهاوصعوبتها بس بعين الله على كل اشي والحمدلله دائما وابدا...
وبما انك فتحتي بدايت الموضوع عن النتائج لي ذكرة هنا.
اتذكر عندما كانت النتائج التوجيهي كنت ايامها سهران وللصبح ما نمت والنتائج اتاخرت للظهريومها...
وبعدين حكيت خليني انام وبعدين بفرجها الله....طبعا النوم سلطان اخذت غفوة وانا .
غفوتي يعني عشر ساعات هذه غفوة الله لا يوريكم اذا بنام بدهم مدافع رمضان علشان اصحه....
طبعا كله من التعب الله لا يتعبكم جميعا...وما صحيت الا على صوت الوالدة ربي
يخليها ويحفضها وهي تصرخ وتصحي في مبروك مبروك.....طبعا الوقت المغرب صار....
وعمك نايم ما معه خبر في اشي زارق في مكان مخفي وموخذ راحتة.... وهم بفكروني
رايح اجيب النتيجة وبستنو.... غير ابن عمي الله يسهل علية كان جايب النتيجة وجاي يبشر في .
المهم صحيت على صوت الوالدة...وهي تهني في بعد ما لاقتني منزوي في زاوية ونايم...
قوم يمة ابن عمك جاب نتيجتك وانت نايم وهي بتضحك حسيت انها هي الي ناجحة مش
انا..وصحيت وما شفت غير مطق البوس على خدي يمين وشمال الله يوفقك الله يخليك....
فرحتني قبل ما اموت...بعيد الشر ... طبعا انا اول واحد عندها صار توجيهي.
قمت وانا شايف الديك ارنب... وما بسمع غير مبروك مبروك فكرت حالي متزوج لانه ....
ايامها كانت احب شي على قلبي ان اتزوج على البكيربدل التوجيهي وهمومه.
سالتهم طيب مين جاب النتيجة... ابن عمك يمة اجى وحكى بلال جاب 85 طبعا ا
نا كنت طالب مجتهد ومثابر في المدرسة وناهيك اني شاعر المدرسة كمان, جبت 85 في الفرع
الادبي...طبعاالوالد الله يخليه ....اصر انه يعمل الي غدا ويعزم الاقارب...طبعا كلهم اجو مش

علشان يباركو اكيد علشان المناسف وما ادراك ما المناسف( والله اجى على بال علما تعشيت منسف قبل شوي).
وراحت ايام التوجيهي واجت ايام الجامعة... ودخلنا الجامعة الا ردنية تخصص علوم سياسية..
وتخرجنا الحمد لله وصارت حياتنا ماشية على التعشيق الله وكيلكم.
بس والله بصراحة اول سنة وثاني سنة في الجامعة..... كنت هامل وصايع وراء البنات....ا
ذا في اشي اسمه دراسة ومحاضرات ما بعرف عنهم...لاني في ايامه كنت متعرف على بنت
الله يسهل عليها...الحين سافرت مع والدتها على روسيا .....وكنت مجنون فيها للاخر ومش عارف ليش ..
بجوز علشان هي حلوة او شيطنة وخبل.... وهي والله كمان كانت هيك
وسالته شو معجبك في ...وحكتالي شخصيتك جذبتني الك... ساعته يا ارض شدي ما عليكي قدي.....
طبعا تعرفت عليها بعد ما رميتها في بيت شعر... وانا متاكد لو تجيب كل عائلته ما حدا
بعرف شو معناتة...لانه يا طويلين العمر والسلامة من تبعين بابا وماما....وسنكرز وبلاوي زرقة....
وخوف الله لو وريتها خبز طابون او شراك راح تحكي عنة برجر جديد....لاني ما
بشوفها الي بتاكل شوكلاتة فطور وغدا.....وحكيت الها انتي عايشة على الشوكلاتة كلي اشي مفيد يا بنت الناس...
هذه كلة اكل فاضي...انا شو مابئدر غير اشتري سنكرز..طبعا هذه مصطلح غريب عني شوي سنكرز
لاني مش تبع هيك شغلات...لو سالتني عن المناسف والفتيت ,والرشوف, والسمن ,والغبيبة ..كان جاوبتك بسرعة
لاني ملم في هذه المصطلحات جيدا...وبس اخيرا انتبهت علىحالي....وعلى دراستي وقلت يا زلمة فكك
من اكلين الاسنكرز وانتبه لحالك بلا بنات بلا هم...لانو بدا الفصل الثاني من السنة الثالثة وحبيت اشد حالي ..
والحمد لله شديت حالي اخر سنتين بعد ما كنت احمل مواد في السنة الاولى والثانية....
وحصلت على تقديرجيد جدا في تخرجي..... وتخرجت معي( نادين)وهي روسية من اصل لبناني
وسافرت مع والدتها...وانا حزمت امتعتي نحو الجنوب ... الجنوب المنسي كما اسمية انا وغيري....
نحو الطفولة ومسقط الراس... نحو بلدتي العزيزة الحسا ونحو محافظتي الغالية طفيلتي الحنونة...
التي نساها بعض من ابناءها او تناسوها في الاصل....واخذتهم غفوة كغفوتي عن نتيجتي....
في سبات عميق... طفيلتي الحنونة لها الحق علينا جميعا وعلى كل من ترعع واكل من خيراتها..
وجعلتهم بناة هذه الوطن ان يرعوها كما رعتهم وربتهم....هذه هي احدى ذكرياتي البسيطة والعفوية..
ذكريات الثانوية والجامعة
اخ لو تعود تلك الايام... ويعود وقت الصبا....نعم هنا انتهى بي ..
المطاف في محافظتي الحنونة التي تضم في قلبها اسم هذه الصرح الغالي علينا ( صدى الحجاج) هذه الصرح الذي
جعلني اكتب لاول مرة قصة غفوتي عن النتيجة.
لي عودة في كتابة غفوات اخرة
تحياتي للجميع.

ههههههههههههه بلال لا تخلو غفوتك من الطرفه والضحك
بس ممكن سؤال مالهم اهل السنكرز والباونتي ليكون مو عاجبينك

احم احم

بس انا مشاركتي ما راح تكون متلك

والا مثل باقي الاعضاء

انا راح اكتب عن اصعب لحظه عشتها وبكتني بكاء حست بطعم مرارة الموع

وقت نزلو اهلي على الاردن وقتها كانت الوالده انجبت طفل حكولي اجاكي اخ تالت اسمو فيصل

اقسم بلله ما شفت اخويا غير وقت سار عمرو سنتين

وقت شفتو وحكولي هادا فيصل جد حضنتوو وبكيت وصرخت صوت لهلاء مو ناسيتو

جد شعرت دموعي طعما مر مو مالح


بس الحمد لله على كل شي
هي اخويا فيصل صار عمرو اربع سنوات وبشوفو كل سني مرتين
وقت اشوفو بيحكيلي انا بس نسافر بضل متزكرك وصورتك دايما فوق راسي على التخت

بس طبعا بس طبعا بلهجه الخليجه مو الاردنيه بيحكي معي

ورغم انو عندي غيرو اخين واربع خوات بس هوي بحبو اكتر من كل خواني وخواتي

لانو وقت ينزل على الاردن بيجيبلي معو جلاكسي وسنكرز مع انو ما بحبهن بس كرمالو باكلهن هههههههههههههههههههههههههههههههههههههههههههه

فيصل يا اغلى واعز اخ على قلبي

هبة

صبر جميل والله والمستعان

بتهون
.
.
.

.
.
.

بعد يوم بصير الك 6 اشهر وانت في القبر كيفك شو اخبارك ان شاء الله مرتاح
انا بخير ومو ناقصني غير شوفتك وطلتك علي وانت لابس النظارات السود والجاكيت الاسود وماشاء الله مع الطول خزاة العين عنك
زمان ما سمعت منك " الله يقطع شرك يا ابو زغيب " "just like that " "هلا ياشيخ" " عليك مردود النقا " "انا وانت يا احمد بنختلف عن الناس احنا مكانا مش هون " " يا احمد انت وصلت للقمة مافي داعي تطلع لتحت يعني مادة بتجيب فيها a بتعيدها ؟؟"

بتذكر كيف عرفنا بعض كانت هوشة صح؟؟؟
بتذكر لما سويت عزومة ؟؟
بتذكر لما تهاوشنا مع 3 شباب عشان واحد دخل علينا ؟؟
وبتذكر لما بهدلنا الشباب الي في باص الجامعة لما صاروا يحكوا كلام وسخ قدام البنات ,, كانوا كثار صح بس طلعنا من خرجهم وسكتناهم وقتها كيفن علينا البنات "
بتذكر لما زعلت مني لما رفعت صوتي عليك وكنت متضايق منك ؟؟
بتذكر لما درستني ع الكالكولس 2 ,, جبت 23 من 25 وقتها ؟؟
بتذكر لما كنا في مركز اللغات لما كنا بنوخذ دورة التوفل وانت كنت بتحب بنت واخوها دايما معاك ,,؟؟
بتذكر مقهى الديرة ؟؟ ولبناني سناك ؟؟
بتذكر لما كنا في شارع الرينبو جبل عمان ومضيناها بنحكي انجليزي ؟؟
بتذكر اخر شي ,, كنت بدك تشتريلي طقم على حسابك ؟؟
وبتذكر اخر مكالمة معك لما حكيت معك واول ما سمعت صوتك كنت تعبان حكيتلك شو مالك كانك موات يازلمة ( حسيت فيك ) ؟؟ وقتها كنت محتاج احكي معك افضفضلك ووعدتك اجيك بس ثاني يوم والله العظيم مات خالي وماحكيتلك لاني بعرفك غير تيجيني تعزي حتى وانت تعبان وبعدين انت حكيتلي فلونزا والدكاترة كمان حكولك فلونزا واخذت ابرة , وحكيت انا للشباب يزوروك عني
انا لو بعرف انك راح تموت وانها ماكانت فلونزا كان جيتك بس ماتوقعت لاني كنت معك قبل اكمن يوم ومافيك شي وماشالله عليك بتهد جبال !!
فايروس من وين اجاك الفايروس ؟؟ ما انا الي عرفته بعدين بجوز انت ما عرفت انه هاذ المرض من بين 4 مليون في العالم بيصيب واحد على ذمة انس صحيح بسلم عليك كمان !!! مشيئة رب العالمين اختارك ... الفايروس كان سبب
كيف عرفت انا انك توفيت , بتسأل ؟؟
السبت الصبح , بس فكرتها لعبة منك لغاية ما وصلنا اهلك وشفت بيت العزا ما كان فيه ناس غير اهلك لانك كنت ميت قبل ساعات
بس عيب وانا محسوبك زي ما بتوصيني دايما خليك قوي واذا هاجمك الزمان يوما فتذكر انك الاقوى
مثل ما علمتني ما بكيت وضليت حاصرها في قلبي لما دخت ووقعت على الارض لا تزعل والله ما قدرت اتحمل بس وقفت على طول
ورحت على السيارة لا تخاف ما ناس شافني الا الشباب وتركوني على راحتي بدك الضحكة صرت اضرب راسي في القزاز واحكي كان بده يشتريلي طقم !!
اسكت مش انا رجعت ادخن وقتها ومارلبورو احمر كمان الي كنا ندخنه قبل ما ابطله
حملوني الشباب وانا بنتق نتق بالله عليك لا تزعل علي ماقدرت اصبر ,, مش بحكوا الحر مايخسر دمعة لو قسا الزمن عليه لكن يذرف دموعه لا فقد حر يهابونه صناديد الرجالي وانا ذرفت دموع ودموع
حملوني ورجعنا على بيت انس ونزلنا بعدين عالعدسية هناك دفنوك كنت ماشالله عنك طويل وعلى ذمة واحد قال :فتحت عن وجهوا وبدي اسكر عيونه كل ما اسكرهم يرجعوا يفتحوا مثل الصقر . صقر والله انك صقر حتى وانت ميت صقر

يارب انك تكون مرتاح في قبرك ويكون وسيع عليك ومنير ويكون روضة من رياض الجنة
واطمن لاحقينك كلنا انشالله بنلتقي في الجنة يارب بس هناك مافي هوشات دير بالك . ...
.
.
ياليتني في قبره اليوم موجود وهو على المخدة الوسيعة بدالي ......... لكن حكم الرب ما عنه مردود امنت به ربي عليه اتكالي


يا معاااااااااااااااااااااااااااااااااااااااااااااااا اااااااااااااااااااااااااااااااذ
الاماكن كلها مشتاقة لك

الاماكن الي مريت انت فيها عايشة بروحي وابيها بس لكن ما لقيتك