من حاراتنا !!!.....

لما أجا أوباما على الحكم، كل العرب قالوا: "أجا زلمتنا وهو ما راح يخذلنا, والرجل ملسن وملحلح".
لف لفة على دول العرب وروّح بسيف بلمع ونعجتين عساف وعدد من الجاجات وصقر, وحرمته ميشيل نالها من الحب جانب من مجوهرات وملابس تراث والوضع كان منيح.
العرب صح أعطوه كل هالهدايا، بس هم قالوا : "مش مشكلة يا أوباما اسمك منا وفينا وخيرك سابق, ما في طوشة إلا بتدخّلنا فيها وما في فايدة إلا بتبعدنا عنها والله انك محترم, المهم خلصلنا موضوع الفلسطينيين والصهاينة عالسريع، وبدناش فوضى زهقنا طباعة بيانات".
أوباما دق على صدره, هو لا يلام في حينها "لأنه مثل بدوي نازل عالسوق", وفكر انو السياسة الأمريكية شوربة وميزاجية, مش عارف أنو اللوبي الصهيوني ماسكها وفش لف ودوران عند مصالحهم.
شاشت مع اوباما وراح لعب في عقل الفلسطينيين، وقلهم انتو "تيسو" وما توافقوا على المفاوضات مع الاستيطان وصار الكل "يصفقلوا" وشوي كان حطوا صورة كبيرة إله في المؤسسات الحكومية .

أهبل يا بتتهبل؟

سمعوا في الخبر أسياد اوباما وبلشوا يعملوا اتصالاتهم على جماعتهم هناك, ولحظات دغدغة وتهديد وإغراء صار الفلسطيني على الشجرة مثل" المعلّقة لا مجوزة ولا مطلقة", وأوباما سكر تلفونه, وقعدوا اليهود معه وفهموه مصلحته، وقالوا له شكلك "أهبل يا بتتهبل", خليك في حالك وما تسوي فيها أبو علي, غيرك سواها ومونيكا أهديناه اياها.
قعد وفكر اوباما وقال ما إلي إلا اللي أعطوني السيف والنعجة والجاجات, بطلب منهم يشكلوا هيئة ومن خلالها بنفذ القرارات وهيك بضل مكيف على العرب وفي نفس الوقت اليهود ما بزعلوا.
وبالفعل، العرب قالوا إله: أجاك يا جاك وصار شي اسمه لجنة المتابعة العربية المنبثقة عن جامحة الدول العربية وصار اللي بدو يعطس يرجع إلها وهي بتوقع قرار جاك وبعقدو مؤتمر والعبي بتشتغل وعمرو موسى بغرد بالعبارات المكررة والبيانات, بس هاي اللجنة فقط تختص في قرارات حول القضية الفلسطينية أما اغتيال الحريري وطوشة لبنان ومسخرة السودان هذي كلها إلها لجان أخرى لضمان الشفافية ووحدة الكلمة وبعيدا عن التشتت والانقسام!!!!.
وهيك صار شيء اسمه مفاوضات غير مباشرة, وبعدها مباشرة وبعدها يطرح موضوع الاستيطان للنقاش في هذه اللجنة عشان تعطي الكشاف الأخضر للفلسطينيين بالاستمرار وصار فرص مرة ومرتين لأمريكا وأخرى شوي لسرلنكا وبعدين للسنغال، طبعاً.. هدفها إرضاء العالم " كريمة هاللجنة", ومش مشكلة الاستيطان والهدم والقتل كله كرمالك يا أوباما "يابو حسين هالنشمي".

عباس : إيش نقعد نسوي بدون مفاوضات؟





في مكان ما وفي وقت ما تمكن مراسلنا سعدون الأهبل، من الحديث مع سيادة رئيس الولايات الفلسطينية المتحدة، محمود عباس، خلال سفره معه على الطائرة الجامبو التي أقلتهما إلى تشيلي كي يشرف سيادته بنفسه على إنقاذ عمال المنجم المحبوسين من شهرين تحت سادس أرض.
اللقاء كان صريحا صراحة سكر زيادة، و و و زهقت من الكتابة ..وهي الحوار قدامكم.. أف:

س: سيادة الرئيس، هل فعلا تم تجميد المفاوضات، ولا الحكاية فيها إنّ ؟!

ج: لا إن ولا لكن، الكل عارف أن النتن ياهو مش راح يعطينا حاجة، فوقّفنا..

س: طيب لماذا لا تعلنوا عن فشل المفاوضات بدل ربطها بالاستيطان، ما دام النتن يا هو مش راح يعطيكم حاجة على كل الاحوال؟
نعم..نعم.. وإيش نقعد نسوي بدون مفاوضات؟
س:طيب وبعدين؟ لوين راح توصلوا؟
ج:لآخر الشارع هاهاهاها حلوة ليش ما بتضحك ؟ أوعى تكون انقلابي ؟
س:لا عن جد يا أبو مازن، خلينا نحكي جد شوية، لوين راح تودينا؟
ج:انا ايش يعرفني..هينا ماشيين وربنا يستر.
س: لكن ألا يجب ان تكون لديكم كقيادة رؤية وخطة و...
ج: (عباس مقاطعا بحدة) يعني وقفت علي أنا، ما هي كل بلادنا ماشية على البركة.
س:طيب وايش قصة المصالحة مع حماس..
ج:العكاريت المحللين السياسيين كشفونا، يعني الحكاية مش محتاجة ذكاء، احنا بنعمل خط رجعة، اذا فشلت المفاوضات والنتن ياهو وأوباما أعطونا زبمة-على رأي أبو علاء-بنميل على حماس، واذا مشيت المفاوضات بنطقع لها هاهاهاها ...
س:لكن حماس اليوم ليست سهلة والتجارب علمتها..هل هي بهذه البساطة، كي تخدع بالجزرة اللي رميتها لها؟
ج:والله هم المشايخ فعلا صاروا اليوم مش سهلين، واحنا صراحة كنا بنفكرهم بهاليل لكن طلعوا "دهاقنة سياسة" –على رأي أبو علي.
س: أبو علي مين يا سيادة الرئيس؟
ج:أبو علي شاهين يا راجل، هذا اكثر واحد من فتح بيكرهم هاهاهاها
س:ماذا بالنسبة لغزة، هل ستعملون على فك الحصار عنها؟
ج: أيوة أيوة..علشان حماس تعمل لها دولة هناك، وعمرها ما ترجع للشرعية، وأبو العبد ياخذ راحته على الآخر.
س:طيب ما دمتم خايفين من استقلال حماس بغزة، انجزوا المصالحة معها؟
ج:هم راكبين راسهم وبدهم مصالحة ند بند، وراس براس، وهذا مستحيل، ما بنقبل الا ان يكون وضع حماس في غزة، زي وضع حماس في الضفة، بعدين هل أنا مجنون أقيد نفسي سياسيا في هذه المرحلة، ويقعدوا يرفضوا دخولي في المفاوضات!.
س: طيب يا سيادة الرئيس، أنا صراحة زهقت وبدي أنهي الحوار، بدك تضيف شئ؟
ج:آه طبعا، بدي أقول لشعبي :أوعى تخاف أو تمل أو تزهق أو تقرف، احنا راحين للدولة المستقلة عن طريق المفاوضات وبس، وأوعى تردوا على أبو العبد وتصدقوا كلامه عن المقاومة والتحرير ومش عارف ايش ..وسلمولي على أبو تحسين.

عبد ربه يا كايدهم !




طل القمر في عز الظهر وصار يحكي, الكل نصت للكلام, المتحدث ياسر عبد عباس (عبد ربه سابقا) أمين سر منظمة "الدح الدح نبو", مش مشكلة شو بحكي بس لازم يطلع بموقف.

الكاميرا شغالة، قالوا له من جوا "اطلع احكي" قاللهم "شو؟", قالوا له "أي شيء", قلهم أنا بطلع بشوت الكرة في ملعب نتنياهو.. وطلع زلمتنا نسي حاله ولا على باله.


عبد ربه قال "بنعترف بالدولة اليهودية"، شو هالتألق السياسي.. كبير يا ياسر، ولما سمع نتنياهو الطرح صعق من فهلوة عبد ربه اجتمع مع كبار قادة الموساد والشاباك وقرر اغتياله على هالحنكة السياسية.

العقدة في الموضوع آلية الاغتيال، أحدهم قال "مثل عرفات" نط غيره قال "محروقة عند عبد ربه هاتوا غيرها", أجا آخر وقال "اغتيال بالطائرات" رد رابع وقال "ما بستاهل"، ضل التفكير شغال إلى الآن وكل دولة الاحتلال منشغلة بالتخلص من عبد ربه.

يا عم خبرة وكنز سياسة, أصلا من كل هالموضات مفاوضات مباشرة وغير مباشرة وريفيرس لغير المباشرة هاي أحلى موضة, جعيرات استحى يسوّيها.

والآن يجب على عبد ربه أن يحافظ على حاله من يد الغدر الصهيونية أن تطاله من شطارته, ومن النصائح التي يجب أن يأخذها بعين الاعتبار عدم التنقل بالسيارات اللي عنده, ويجب أن يحول رصيده في البنك باسم غيره للتمويه ويقلل من المقترحات النارية اللي مثل هيك, أحسن إسرائيل تستفز وتسحب الفي أي بي منه أو تستوقف سيارته عالجسر الأردني وتصادر جوالات أو ملابس تجارة وهيك رزقته تروح .

اصبر واتحمل يا ياسر, كل الانتقاد لطرحك عبارة عن حسد عشانك بتطلع عالكاميرا.

بفهموش بدهم قرون لما يصيروا بشطارتك, صح انت على حالك من يوم ما شفناك على الكاميرا بس مش مشكلة, صح أنك بتعرف شو صار مع عرفات بس مش مشكلة, صح انك لا تمثل إلا نفسك بس مش مشكلة, إنساك من كلام العزّال وقلهم بالبونط العريض "الوقت للهامل" وأنت قدها وقدود.

بتعرف لو السلطة بتقدّر اللي مثلك, لازم يجففوك ويعملوك تمثال في نص رام الله والكل يتصور عندك.

يا رجل والله إنها خطوة منيحة على طريق السلام, بس بتعرف لو يعملوا هيك مع كل الفهلوية اللي زيك كان المقاطعة كلها تماثيل, وشو عليه؟ بنصير داخلين كتاب غينيس في المناسف والمسخن والكنافة والتماثيل!.

اسعدك الله دوما ابو علي الغالي
ولا احزن لك قلبا ولا ادمع لك عينا

ودمت لنا ابدا
ولا عدمت ردك ورأيك وحرفك
حقا شر البلبة والمصيبة ما قد يضحكنا
رضي الله عنك وارضاك

" أبو العز ".. و " زهرة " وجوازها الخمسة



في مكان ما من غزة الحبيبة، دار هذا الحوار بين زوج وزوجته
أبو العز: يا أم العز، إلحقي اغسلي لي الجلابية قبل ما تقطع الكهرباء..وإلا حأخليكي تغسليها على ايديك ها.
أم العز: يوه (حركة نسائية مشهورة في غزة) خوفتني والله، وايش بدك في الجلابية يا بعد عمري؟ بدك تروح على ديوان رئاسة الوزراء يا خي ؟
أبو العز: ديوان رئاسة الوزراء ؟ إتمسخري إتمسخري، بكرة بتعرفي أنا مين وايش بأكون في البلد
أم العز: طيب؟ وايش بدك بالجلابية .
أبو العز: بدي أروح على ديوان العيلة، المختار عزمني علشان ياخذ رأيي في كذا موضوع
أم العز: بالله ؟ مواضيع ايش يا عينية؟
أبو العز: احم احم ، هو صراحة موضوع واحد..هذا يا ستي أبو توفيق اشتري ماتور قوة 10 كيلو علشان يحضر مسلسل "شيخ العرب همام"، وطبعا بتعرفي الراجل، بيشغل الماتور ليل نهار، واخواته والجيران كلهم مش عارفين يناموا من صوت الماتور وريحته، وهو "مطقع " للكل ورافض "يرشد" استخدامه ..حلوة "يرشد" صح؟
أم العز: طيب وانت ايش دخلك ؟
أبو العز: والله صراحة، بس بيني وبينك ها، أبو توفيق وعدني اذا وقفت في صفه، راح يمد لي خط كهرباء من ماتوره، علشان أحضر مسلسل "زهرة وجوازها الـ .. لا قصدي مسلسل القعقاع بن عمرو..
أم العز: أيوة.. وكيف راح تقف في صفه؟
أبو العز: حأقول ان وضع البلد هيك ..كل البلد شغالة ليل نهار على المواتير، ومش من حق حد أنه يشتكي
أم العز: طيب، بس ما تنساش انك ما بتعرف تنام من صوت ماتور جارنا ابو محمد اللي فوق، وانك ناوي تروح تشكيه في الشرطة بعد ما رفض يرشد استخدام ماتوره ..حلوة "يرشد" صح ؟
أبو العز: ممممممممممم والعمل..ايش هالمصيبة
أم العز: أنا بأقول أغسلك البجامة، علشان تنام أحسن
أبو العز: طيب وزهرة وجوازها الـ ..قصدي القعقاع بن عمرو..كيف بدي احضره، ما عرفت احضره في رمضان وانت بتعرفيني، بأموت في التاريخ..
أم العز: أبو العز ..على فرشتك ..بلاش أخليك أنا عبرة للتاريخ..لأني لسة مخلصة حضور مسلسل تاريخي برضو..بس اسمه "ريا وسكينة".
أبو العز: ريا وسكينة ؟! احم احم.. طيب طيب ..أنا حاسس حالي تعبان شوي، والظاهر أني لازم أتوجه فورا ..إلى الفرشة ..إذا اتصل أبو توفيق..قولي له أني سافرت على الصين علشان أجيب شحنة مواتير صيني ..بس بدون صوت..تصبحي على خير.

الدولة دايت.. والملوخية ريحاوية


متحرر قرفان
المواطن الفلسطيني حيران، وخرفانه منها النعسان ومنها الشوبان ، والعيشه إبتكرف على ذمة مراسلنا أبو الجديان .
في الرصد الأسبوعي للأحداث السياسية الساخنة والمؤثرة على أعصاب المواطن الكحيان ، قام مرسلنا أبو الجديان بإجمال المشهد السياسي في حارتنا ، وعند الجيران .
الأخبار إنتهت هذا الأسبوع بعرس جماعي في نابلس ، وبرعاية الرئيس و فياض قاطع العرس .
في تسريبات سريه إنه الرجل ولعت معاه وحلف شمال إنه كل مواسير نابلس المخزوقه ، والمطعوجه ، والخربانه ما رح يسوي لأي وحده منهم افتتاح ولا حفل
مقربون من ( فوفو ) حبيب الأمريكان لمزوا مكتب الرئيس وقالوا هناك توتير للعلاقات ، والمستفيد من هل القصة حماس ، الصلاحيات لا زم تتوزع والمهم هل حال يمشي ، وإلا خزينة السلطة بتصير عند الاتصال فيها تقول ( فياض مرحباً ، لا يمكن القبض اليوم ، يرجى فهم المقصود ،وإلا بصير الصراف الآلي يقول طوط طوط ).
مكتب الرئيس في اتصال هاتفي مع مراسلنا علق على الموضوع " سلام خربها ، وفي كل خزق حاط صورته ، حتى (البيبي فاين) ما سلم منه، لكن العلاقات متينة ... وصلت مسج البنك الدولي .
على سيرة ( البيبي فاين ) والمحارم المعطره ، ورفاهية الضفة الغربية والتسهيلات الصهيونية ، مواطن فلسطيني مع أهل قريته والقرى المحيطه رفعوا كتاب للجان التنسيق الأمني ، يريدون قطف محصول الزيتون و لحمايتهم من المستوطنين .
على إثر ذلك جاء الإذن وجاءت الموافقة وقام الناس بجني المحصول، في طريق العودة إلى بيوتهم قام المستوطنين بسرقة المحصول وضرب المزارعين ، وللخوف على الجهود الأمريكية سجلت القضية في ذمة مجهول .
في تعليق العقيد ضاحي الخلفان الفلسطيني على الموضوع قال " إحنا حطمنا الاقتصاد الإسرائيلي في هذه القضيه ، في توضيحه للمقصود ...قال إلي سرق بيلزمه مصانع لاستخراج الزيت ، المصانع بدها كهرباء ، والكهرباء بدها وقود ، والوقود عند العرب ، والعرب في عندهم أزمة ماليه ، والأزمة المالية بدها سيوله ، السيولة من إسرائيل ، وإسرائيل ما بتزكي المال ... لأجل ذلك اربحنا الحرب .
ثم ختم بنصيحة "يا إخوان بيعوا الزيتون لليهود وخربوا بيتهم " .
أحداث الأسبوع تواصلت ... على رأي مراسلنا إنه السياسية زي الموز أوله مثل آخره .
في وسط الأسبوع زاد الضغط على السلطة الفلسطينية لاستئناف المفاوضات ، الأمريكان وعدوا بتخفيف الاستيطان في مناطق الضفة الغربية ، وذكروا بأن الحدود الفلسطينية معروفة هي مناطق 67 بس مع قليل من التعديل .
القدس يمكن التفاهم عليها وهي خارج التفاوض ، الأغوار منطقه حاميه وحرارتها عاليه وحاجة إسرائيل إلها ضرورية .
الكتل الاستيطانية في الضفة الغربية فيها مشاكل بيئية لذلك لن تتحمل السلطة معالجة ثقب الأوزون الذي يقع مباشرة فوق هذه المستوطنات لذلك ستظل إسرائيلية .
التوجه الفلسطيني بعد هذا الحوار الإستراتيجي بالموافقه على تمديد التفاوض شهر .
في تعليق ياسر عبد ياسر قال " المهم في ما نريد هو دولة ، الأجمل بين النساء هي متسقة المقام ، ونحن ما نحتاجه هو وطن عامل دايت ونحيف ... إحنا بنحب الحلويين .
وعلى سيرة النساء أكد عبد ياسر أن الملوخية الريحاوية هي تحت السيادة الفلسطينية في الدولة القادمة .
وقبل ختام الأخبار ، جاء خبر عاجل ، المصالحة كانت مزحة واللقاء في الأسبوع القادم ... سلام.