الوقود العاطفي

الوقود العاطفي

انا اول مرة ادخل على المنتدى العنايه بالطفل قرات والله مواضيع شيقه بس في مرة اخذنا محاضرة عن كيفية التعامل مع الطفل خصوصا بالمراحل الاولى وكيفية تنمية شخصيته وصقلها وممكن نحكي ايضا عن التربيه والعب معهم لانها عنجد امور مهمه وبتحدد طبيعة الطفل سواء الجسديه او العقليه رح امر على نقاط معينه في مراحل معينه لتسليط الضوء عليها.
خلينا نبدا من الطفل ببطن امه ومرحلة الاحتواء ع قولة دانا والعلاقه اللي بتنشا بينهم لمدة تسع اشهر كام وجنين الحوام هو عبارة عن نقص ببعض العناصر التي يحتاجها الجنين وتنتقل للام بطريقه او باخرى فتشعر بانها هي من يحتاج ذلك " سبحان الله" .
بعد الولادة اجى الصبي وصلينا ع النبي هاي الامور للنساء بعرفوا اكتر من تنظيف ورضاعه وتنويم والامور هاي بس فيه شغله انا مخنوق منها اللي هي "التقميط" واللي ما بعرف شو معناها اللي هي اللفه بلفو هالولد لا بقدر يتحرك ولا يتنفس وبصير عنده ضمور بالنمو من قليل اطول واحد فينا طوله 175 سم من هاللف طبعا علميا وانا متاكد من هالحكي الطفل بكون بمرحلة نمو خلينا نحكي سريعه نسبيا ف لما نربطه احنا قاعدين بنمنع ان الاطراف والجسم يوخذ المساحه اللي بتناسبه بالنمو والدليل على هالحكي في الصين بنات الجمباز بلبسوهم وهمه ضغار احذي حديد ف ما بتكبر رجلها معناها انه هاي الحواجز تقف عائق امام النمو الصحيح للطفل وللعلم حركة الطفل ايضا بتقوي العضلات عنده مثل الحبو على الارض او اللعب او اي حركة يقوم بها.
نأتي الان لمرحلة بداية الحركة والكلام عند الطفل من الاخطاء الشائعه اولا بالنسبه للحركه:هي التحكم بلعب الطفل تضييق المساحه عليه خصوصا في البيت معلومه مهمه وانا متاكد انه ما ناس سمع فيها "الوقود العاطفي" بعد راسات علماء النفس والطفل اكتشفوا ما يسمى بالوقود العاطفي وهو ما يحتاجه الطفل من امه كل فترة زمنية معينه يعني بروح بغيب 5 دقايق او10 او ببعد مسافه وبرجع لو يلمس امه بعدين بروح يكمل لعب وللامهات جربوا وشوفوا كلامي لذلك بنحكي للام لا تخافي ولاتضيقي على ابنك المساحه خليه يلعب بس ابعدي عنه الامور الخطيرة ورح يرجعلك في اشي اسمه الوقود العاطفي سبحان الله, اما بالنسبه للاخطاء التي تتعلق بالحكي عند الطفل وهو انه بنحاول نلفظ الكلمات بطريقه صبوية لتقريبها للطفل وهذا خطأ لانه في حالات كثيرة من الاطفال ضلوا بحكو هاي اللغه لمرحله متقدمه ديروا بالكم : "اتلت" بدل "اكلت" وهيك امور.
اهم اشي بموضوعنا اللي هي هاي المرحلة التي يكون فيها الطفل قادر على الاستيعاب نسبيا قابل لاستقبال اية معلومه خارجيه وبتكون بين السن 4-12 تقريبا بكون فيها الطفل كتاب ابيض يعني بنكتب فيه اللي بدنا اياه وبنحدد شو طريقه تفكيرة وبنصقله زي ما بدنا ف بتمنى انه كل اللي بنحكى للطفل بهاي المرحله امور طيبه جميله بعيده عن اشعاره بالنقص او الغباء او عدم الفهم او التقليل من هيبته وشخصيته امام الاخرين يعني اذا بتضل على الرايحه والجاي انت غبي انت غبي انت غبي خلص برسخ براسه انه غبي والله عوكش ما اقنعه ورجعه يفهم طول حياته بضل غبي مع العلم ان ما كان هيك بس خلص ركزت هاي المعلومه بعقله الباطني وصارت تحركه من غير ما يعرف ودايما شو ما بسال جاوبه الجواب الصحيح لانه قاعد بتعلم وبحتاج انه ينمي فكره وانشالله هيك اتوقع بطلع عنا عبقري زمانه وفهمان وصحته ممتازه.

هاد اللي بعرفه واتمنى انكم تستفيدوا منه خصوصا الامهات.......

المصدر: شبكة ومنتديات صدى الحجاج

والله كلام مفيد وصحيح جدا
والطفل منذ الولادة بتوقع انه بستقبل كل شي عشان
هيك لازم ننتبه لكل شي بدخل لعقله
وانا مع انه لازم الاهل يلعبوا مع اولادهم
ويحاولو يكونو معهم اكثر وقت ممكن
واكتر شغلة قاهريتني بهاي الايام برامج الاطفال الهابطة
والي نص الاهل ما بنتبهو
بفكرو انه الطفل بعمر 3 او 4 سنوات صغير
وما بشوفو شو عم يتفرج على التلفزيون
وللعلم لو تتركو لنفسكم الفرصة وتفتحو على افلام الكرتون تبعت الاطفال راح تنصدمو على الافكار الي موجودة

اما قصة التقميط
ستي دايما بتقول انه البيبي بس لازم يتقمط لمن يكون في ناس كتير بتحملو ورايحين جايين فيه
ليش؟؟ عشان ما يتشلتع لا نه جسمه طري ومو الكل بقدر يحمله صح
وانا بشوف انها طريقة منيحة فهاي الحالة بس
وستي دايما بتنخنق بس تشوفه نايم ومقمط
يعني افهم بالضبط شو الهدف من التقميط وانه مو بكل الاوقات ولا تيصير عمره سنة

يسلمو
وياريت نصير نعرف كيف نربي اولادنا
لانه ازا بدنا نهضة للأمة ما إلنا غيرهم

كلامك حلو كتير وحساس كتير وصح كتير كمان
هلأ فعلا الام بتكون عامله احتواء لابنها من الداخل والاب لازم يعمل احتواء اله ولامه كمان وعلى فكرة بحس انه الاب بيعرف اكتر من الام لانه الام هي في داخل الحدث اما الاب بتلاقيه متلقي وبشوف اكتر منها بس مو بكل شي طبعا بكفي ضربات القلب وضربات الرجلين لما اسمع الحوامل بيحكو ههههههههه
ومن هون بيبدأ الطفل يحس بامه واكيد يتعرف عليها


بالنسبه للتقميط عنا اسمها كوفليه ... عنا احنا الولد بيبقى بالكوفلية لمدة شهر لعدة اسباب مقنعة اولا انه المرأة الام يعني بتكون نفاس ما بتقدر تقوم بابنها كفاية فالولد بكون من ايد فلانه لايد فلانه وام الام كمان واخت الام والاب كمان وهيك لازم يحافظو على الولد طول ما هو مش مستقر
بس بصراحة انا ضد انه المرأة لما تكون بحالة النفاس انه يكون كل اهلها عندها لانه هي مو فاضية بتكون غير لابنها ولحالها بس شو بدنا نعمل بالعادات بحبو يقومو بالواجب والمشكله ما بتشوف ابنها غير للرضاعه عنجد اشي بفقع

بالنسبه للتربايه انا مع انه نجاوبه على كل شي وبطريقة صحيحة ونتركه يسأل ونجاوبه حسب دينا شو بقول مو على حساب العادات
يعني ما نحكيلو لا تعمل هيك لانه عيب لالالا نقول لا تعمل هيك لانه حرام ( ازا غلط )
ولازم تعمل هيك عشان ربنا هيك بدو او ازا عملت هيك ربنا بصير يحبك ويحطلك حسنات ويبنيلك بيت بالجنه ويخليلك في العاب واشياء زاكية انا هيك بحكي دايما للاطفال هههههههههه ( ازا عمل شي صح )

والافكار اللي بدنا نحكيها تكون بتناسب عقله وتقنعه ما نتركه بنص الطريق حاير ويخبص افكار من عنده لازم ناخده وحده وحده لما نفهمة والاهم نقنعه

وبعدين لما يكبر شوي ويصير واعي لازم نوضحلو مبادئنا كلها ونسأله عن افكاره ويمكن يطلع عنده مبادئ جديدة علشان نلحق نعززها ازا كانت خير او نغيرها ازا كانت شر

وعجبتني رامي كتير الوقود العاطفي وبعرف طولت بس ازا بدك بضل احكيلك عن الاطفال لبكرا ما بقصر وكل هاد وما فشيت غلي

حرف شكرا كتير على ردك الرائع انا بصراحه كنت حاب انه وحده ام تحكي مو احنا كل المواضيع يا نقل او ازياء يعني ما في حوار ام عن كيف بتربي ابنها او شو بتواجها مشاكل بس على الاغلب ابنها بكون افهم واحلى واحد

شكرا مرة تانيه وانشالله انه الفائدة تعم

دانا كلامك اكيد احلى من كلامي حاولت احكي عن الموضوع بس بصراحه هاد اللي طلع معي اكيد انتم بتعرفوا اكتر مني بهاي الامور وكلامك صح فوق الصح
اما بالنسبه للوقود العاطفي هو كل انسان بحتاج لهاد الاشي مو بس الطفل بس اكتشفوه عليهم لانهم ما عندهخم غير الصدق والبراءة احنا موجود عنا بس بنحاول نخبيه يمكن بسموه الاشتياق
شكرا كتير الك على ردك الرائع

أقول الكو بصراحة

كلام كبير كثير
رامي اسعد الله ايامك

شكرا أخي رامي على الموضوع القيّم
يعطيك الصحة و العافية

الله يرضى عليك يارامي كلامك درر

الله يعطيك الزوجه والذريه الصالحه امين


بدك ام تحكي عن الموضوع بينفع ام بريص؟؟؟؟؟ او ام 44 ؟؟ شو رايك ماشي حالها