مقهى الرااااااائع : هشام الجخ

مقهى الرااااااائع : هشام الجخ

..
هذه الزاوية اسمحولي أن أخصصها لهشام ..
ولن أعرف عنه .. ما دامه اختار في موقعه أن يعرف عن نفسه ، وهذا ما قاله :


اللحظة دي صعبة جدا
لما يطلبوا منك باصرار انك تكتب تعريف للناس عنك وعن حياتك
خلينا نحاول
انا هشام الجخ
اصلا من قنا .. مركز ابو تشت..ومسقط رأسي سوهاج وخوالي كمان من سوهاج
درست واتربيت في سوهاج لغاية ما دخلت كلية التجارة هناك
حولت من تجارة سوهاج لتجارة عين شمس واتخرجت في جامعة عين شمس سنة 2003
اتعينت مشرف على المركز الثقافي في جامعة عين شمس في نفس سنة التخرج وعملت دراسات عليا في ادارة الاعمال في نفس الجامعة
زمايلي وانا اسسنا المركز الثقافي في الجامعة وكانت فترة نهاية التسعينات وبداية الالفية الجديدة - بفضل الله - عصر مشهود له في تاريخ جامعة عين شمس ادبيا
استقلت من الوظيفة بالجامعة سنة 2009 لاني باختصار معرفتش اعيش حياة الموظفين التقليدية ده غير ان البيروقراطية وقتها كانت شيء قاتل لكل الانشطة الطلابية ولكل مناحي الابداع
اهتميت بمشروعي اللي بقالي 15 سنة بحلم بيه وهو زيادة شعبية الشعر في مصر واعادة الشعر على السنة الشباب والاطفال
في السكة بقى حصلت حاجات كتير طبعا
حصلت على احسن شاعر عامية من اتحاد الكتاب سنة 2008
حصلت على شوية مراكز في الشعر الفصيح والعامي ايام الجامعة
يعني .. مش ده المهم
المهم اني بحب الشعر جدا .. وبذاكره .. وبكتبه على مهلي جدا جدا جدا
ومش بقول شعري لحد غير لما اكون انا قريته 40 مرة وعجبني تماما
بحب اسمع مزيكا هادية جدا
لكن ساعات بتلاقيني قلبت وشغلت مزيكا صاخبة وقمت ارقص
باستمتع قوي قوي قوي بالرقص الصعيدي والنوبي والسمسية
اهلاوي وبحترم جمهور الزمالك وكنت بالعب باك يمين في فريق سوهاج ايام 4-2-4 لما كان فيه حاجة اسمها باك وحاجة اسمها وينج
اتجوزت سنة 2004 وربنا افاض عليا بزوجة صالحة وبنتين زي القمر
مواليد اول اكتوبر ..يعني برج الميزان
رغم اني كنت ابن والدتي الوحيد - رحمها الله - لكن ما اظنش اني عشت كولد مدلل .. يمكن لان والدتي - رحمها الله - كانت سيدة تربوية بحكم عملها كرئيس قطاع تعليمي بسوهاج ويمكن لان ابويا لم يكن يفرق في المعاملة بين ابنائه ونسائه فخرجنا جميعا متساويين في المعاملة والتربية
لما جيت القاهرة جديد كنت لسة في الجامعة اشتغلت في مجال التصميمات والجرافيك والطباعة .. تركت المجال لكني مازلت - حتى وقتنا هذا - لما باعدي على جسر السويس لازم ادخل عين شمس واسلم على صحاب المطابع والصنايعية اصدقائي
باحترم الناس جدا
واي حد بيعمل معايا موقف وحش باحط نفسي مكانه وافكر باسلوبه واحاول اتعامل مع الموقف من وجهة نظره
امتع لحظاتي لما اقف على المسرح واشوف عيون الناس بتلمع وهي بتسمع شعر
واتعس لحظاتي لما حد ميعرفنيش يتهمني بالغرور
غرور على خيبة ايه مش عارف؟؟تقولش الواد حليوة قوي؟؟؟
بكره نظام حسني مبارك جدا جدا جدا وشفت بعيني الناس اللي اتحرقت في قطر الصعيد وهي حية.. ولو النظام اللي بعده كان زيه او حتى شبهه يبقى مكتوب على هشام الجخ تفضل قصايده ممنوعة - اقصد القصايد المهمة طبعا
بحلم بالمساواة
مسلم ومسيحي وصعيدي وبحراوي وغني وفقير
نفسي الشباب اللي في سني يلقوا شقق يتجوزوا فيها ويلقوا وقت يقروا ويتثقفوا ويفكروا .. ونفسي جدااااااااااااااااا اصلي في المسجد الاقصى
تحياتي لحضراتكم جميعا

لطالما كرهت الشعر واهله مستثنية قله قليلة ..
على رأسهم المتنبي ..
ثم ، الأبنودي ..
الأبنودي هو سبب حبي واعجابي بداية ، بهشام الجخ ، فقد رأيت فيه أبنودي عصرنا !
الا انه أثبت وبجدارة بأنه مستقل تماما عن اي عجنة أخرى ،
بكل طبيعية .. بكل امتناع .. بكل بساطة القرب العالية الممنوعة المسموحة !
هذه الصفحه له وعنه .. مبادره اعلان أنني معجبة به ، بشدة !
وسأبدأ بهذه :

(ايوة بغير)

لا انا نقصان ولا ضعفان
ولا مسطول ولا سكران
ولا زايغ من عيني الضيّ
ولا حد احسن مني في شيّ
بس بغير
واللي قالولك غيرة الراجل قِلّة ثقة او قلة فَهم
خَلْق حمير
غيرة الراجل نار في مَرَاجِل
نار بتنوّر مابتحرقش
واحنا صعايدة بنستحملش
شمسنا حامية وعِرْقنا حامي وطبعنا حامي
واللي تخلّي صعيدي يحبها
يبقى يا غُلْبها
اصلنا ناس على قد الطيبة
كلنا هيبة
والنسوان في بلادنا جواهر
طب لو عندك حتة ماس
حتخلّيها مداس للناس؟؟

ولا حتقفلي اوضة عليها بميت ترباس
يمكن حتى تأجري ليها جوزين حراس
يبقى انا لا انا جاهل ولا غافل
كل الفرق ما بيني وبينك اني صعيدي
ينعل ابو ده اليوم الاكحل
اللي لا ليه اخر ولا اول
اللي طلعت لقيتني صعيدي
لو كان بايدي
كنت اعملك هندي بريش
واقلب شعري كنيش كرابيش
والبس لك سلسلة متدلدلة خرزة وقلب
بس ازاي البس لك سلسلة ؟؟ هو انا كلب ؟؟
ثم العبرة ماهيش في اللبس
اصل المشكلة عَندك .. عٍندك ..
قلت حاسيبها وبكرة تحس
بعده تحس
بعده تحس
ده انا لو جبس كنت زعقت
ماشي صداقة وماشي زمالة
بس ماجَتْش على الرجالة
ماهي نسوان الدنيا كتير
وانا ما بقولش تخاصمي الناس
ولا تِتْحِجبي عن الرجالة
ولا تعتكفي وتسكني دير
بس يا ريت حبة تقدير
اني بحبك
واني بريدك
واني زرعت حياتي في ايدك
واني غزلت بنات الدنيا عقود على جيدك
واني تعبت من التفكير
واني بغير

المصدر: شبكة ومنتديات صدى الحجاج