قلاية البندورة على طريقة الطلاب العزابيه

قلاية البندورة على طريقة الطلاب العزابيه

القلاية لها مكانة خاصة عند العزابية مع انها زرعت في بطونهم ولكن تبقى لها مكانتها
اولا المقادير :-
طبعا الطلاب ما بهمهم المقادير بقدر مابتهمهم التكاليف اخر الاسبوع الكل والحمد لله بكون طفران وبصيروا يدورا هون ربع ليرة في المكتب, هناك نص فوق التلفزيون , مغسل بنطلون وناسي فيه ليرة على طول بسحبها عالمكوى ,اذا في في اذا مافي بيجي توارد الافكار عند الكل وبتفقوا ينزلوا على عمهم ابو انس المحسيري عشان يدينهم تكاليف الطبخة اقصد الوليمة الي بدو يتجمع عليها حوالي كذا نسمة
المهم شو بدكوا في طول السيرة في مشكلة هون مين بدو ينزل ياشباب على عمنا وحبيبنا
انا ما بنزل بدو مني ليرتين ونص
وانا ما بنزل كمان امبارح اخذت من عنده علبة جل وعلى اساس اليوم اجيبله المصاري
وانا والله بستحي لو تقطعني ما نزلت
ودب الخلاف في صفوف المسلمين وكادت القلاية تتفركش لولا الله ثم وجود واحد في السكن هذا طبعا بكون اله ست سبع طعشت سنة في الجامعة وقرفان الحياة طبعا الكل بحترمه كونه الشيخ فيهم وبحكمته وخبرته الطويلة في الملاعب بتقنصلو واحد يا حرام لساته طازة سنفور مسخم
شو رايك تنزل على ابو انس وتتدين من عنده كونه لسه مابعرف انك من شلتنا واذا بتنزل ياسيدي بنعفيك من الجلي وترتيب الغرفة ( طبعا على اساس انه الجلي راح ينجلى والغرفة اصلا انها مرتبة )
المسكين ما بكذب خبر وبحماس بقول بتمون على رقبتي انت (بده يثبت حاله من اولها انه زلمة واخو صاحبه)
قول بنزل وفعلا بجيب الاغراض ....... الاغراض الي همي بسمعهم في صحتين وعافية بقولوا عنها المقادير
ياويلي عالمقادير
عشرطعش كيلو بندورة
الزيت بكون واحد امه مدليليته ومعطيته لتر زيت زيتون واذا مافيي بخلوا المسكين يدينوه
طحشة بصل ( والهوش بولع مين يفرم البصل على اساس بحبوا وبخافوا الحبيبة تشم ريحة ايديهم)
خمسطعشر قرن فليفلة حارة من الي بسموها فليفلة يهودية لعنة الله على اليهود قولوا امين
ملح
بهارات ابصر لشو المهم بكونوا جايبنها ايام العز

واخر شي
اللحمة وهذي اكيد حسب الرغبة لانه في ناس بتضايق من سيرتها
الطريقة مافي اسهل منها
الكل بفوت عالمطبخ وكلهم بصيروا شفات
بحوسوا البصل وبرموا قرون الفليفلة مع البصل وبعدين برموا شوال البندورة
وما بتسمع فهالمطبخ الا " انا امي بشوفها بتعمل هيك لما نسوي هيك , شو رايك تخلي امك تيجي تعملها بدالنا , لو كثرت الميه , يازلمة هذي ما عليها ولا ذرة ملح ,نسينا نجيب خبز, .......... "
فجاءة الكل بنسحب بكون في مباراة ولا فيلم بروحوا يتابعوه وبنسوا القلاية عالغاز
واشطر واحد فيهم هاذ الي بكون بقرا طب او هندسة هو اول واحد بشم ريحة الحرق :log_ehdaa:
وبهيك بتنحرق الطبخة وبولع الغلاط بينهم
بس شو حرق ما حرق بتتاكل لو انها صايرة فحمة ,الجوع عاطل وبعد هيك كل واحد بيدور له على جنبية وبرتمي عليها وبصير يعج عالسكارة عج وكأنه ماكل خروف محشي
وصحتين وعافية
ملاحظة حتى تطلع معكوا قلاية طلاب يجب ان يبقى الاكل في نص الغرفة لما واحد يحن عليه ويرفعه
ويجب ان يبقى الجلي مكوم في المجلى على الاقل يومين
ودمتم

المصدر: شبكة ومنتديات صدى الحجاج