الطريق إلى ضانا

الطريق إلى ضانا

الطريق إلى ضـا نـا

إعداد وتصوير

عبدالكريم أحمد الخلايله

ــ بدك تروح إلى ضانا في محافظة الطفيلــه ... ماشي ياعم ... جهز حالك من الفجر ، عشان نكسب الوقت ولطافة الطقس... توكلنا على اللــه... خذ معك كاميرا وماء بارد ... ولاتنسى تتفقد السياره من بنزين فل الفل ، وهوا العجلات لاتنساه ، وماء الروديتر....وكل إشي يلزمك للسفر... رايحين ننطلق من عند مدخل الجامعة الأردنية

ــ الآن نقرأ دعاء السفر ونقول ياااااااأللـــــه عليك الإتكال .

ـ رح أجيبك عن طريق الجامعة الأردنية ـ شارع المدينة المنورة ــ الدوار السابع ثم َّ

من الدوار السابع سنتجه إلى اليسار بإتجاه طريق المطار حتى نصل عند تقاطعهِ مع مرج الحمام

وهون رح نوخذ ع اليمين بإتجاه ناعور ورح نشوفها على يمينــَّا

ــ لا تخاف الطريق ممتازه ولو إنك شايف فيها منعطفات ونزول حاد لأنه رح نوصل للعدسية ونشوف المناظر الطبيعية الرائعة ، وبعدين نرتاح عند مسجد العدسية ونصلـِّي الظهر فيه .

ـــ ياه إسترحنا نص ساعة أظن بيكفـُّوا فشـِد لي حيلك خلـِّينا نمشي

ــــ شايف ياصاحبي ها الجبال وها الوديان وها الأشجار إشي بيخلي الواحد مبسوط ...... شوف ..شوف !! ها الشجرة ما أجملها ، هذه بينسمـِّيها " الشجرة الجميله " البونسيانا

ـــ الحمد لله الآن وصلنا مثلث الشونة ، يعني عداد السيارة رح يكون 50 كم ومن المثلث رح نستلم طريق البحر الميت

ـ طيب ويش بعد !!! خلي البحر على يمينك ودوس بنزين ..

ــ إمشي .. إمشي ... إمشي . ( وإذا تعبت أو بدك تتفرج ع البحر أحسن برضــه تستريح في أحد الباركات المجانية ، فيه ناس فيها بعملوا شاي وقهوه !!.

ـ ... طيب !!! أنظر إلى عداد سيارتك فإذا كان 87 كم فأنت الآن عند جسر الموجب . وظلك ماااااااااااااااااشييييييييييييييييييييييي ستجد على يمينك Parking ترابي ...( طبعا ً عداد سيارتك الآن 100 كم ) مش غلط إنزل من السياره وإشرب ماء بارد وإتفرج على شواطيء البحر بس دير بالك تنسى حالك .... هون البحر بجنن !!!!

ـــ إطـّلع على الجهة الشرقية من الشارع .. رح تشوف صخرة تعلو الجبل وهي على شكت إمرأة باللباس التقليدي لقوم لوط . ( تقول الحكايات الشعبية أن الصخرة هي زوجة لوط تجمدت على هذا الشكل : أوعك تصدق هاي سواليف فقط ... ).

ـ إرتحت الآن ؟! .. طيب شو عم بتساوي....؟ ! يالله شغـّل السياره ... وظلك داعس إلـْحين بيصير عداد السياره 105 كم ، إذن أنت الآن في منطقة " غور حديثه " أنظر مزارع على اليمين وعلى اليسار... وبعدين ظلك ماااااااااااااااشي ودير بالك من جمل يقطع الشارع أو غنم فخلـّي عيونك إمفتحه 24 قيراط .

ـ آآآآآآآآآآآآآآآآه صار عداد السياره 112 كم ، إذن إنته فين !!! والله ياخوي إنته على مفترق طرق واحد ع اليمين سيقودك إلى الكرك لكن طبعا ً إنته رايح ع الطفيله ، حتى تروح على ضانا ، .. إذن خليك مااااااااااااشي دوغري ستشاهد ع الطريق " منطقة غور عسال " ( 115 كم ) ثم ..... ياطويل العمر... ستشــــاهد " شركة ملح الصافي " على يمينك ... ( 116 كم ).

ـ خليك ماااااااشي دوغري ... لما يصير عداد السياره 125 كم ... صـُف ع اليمين وإستريح شـوي... لكن لاتنسى تتطلـع ع اليمين فستشـــــاهــــد" النصب التذكاري لشهداء الجيش العربي في معركة الكرامه " عام 1968 م في 21 آذار .... إستريح وإتفرج وخذلك صورة للذكرى . ( للعلم فاليهود دخلوا من هاي المنطقة لكن أبطال الجيش حصدوهم ).

ـ ياحبيبي الآن بدك تمشي 10 كم ... رح تشوف مفترق طرق هو على شكل Y الأول بيروح ع اليسار بس رح يوخذك إلى مقام سيدنا لوط ... إطلع إطلع فوووووق .... فوووووووووووووووووووووووق ..هناك ......هناك.....بعيد ..... بعيد على سفح الجبل ،.... صح.... بعيد .... بعيد

... شوي ...وكمان طريقه صعب لأنه مش معبّد وفيه خوف على سيارتك ..... لكن رح تشوف المقام..... بعييييييييييييييييييييييييييد وباللون الأبيض....مارح نطلع الجبل !!! إذن شو تسوي ألـْحين ... ما عليك إلا ّ تمشي ... وتمشي ع اليمين ... طاوعني ظلك ماااااااااشي ، أنظر إلى عداد سيارتك ..فإذا كان سجل 150 كم فأنت الآن في منطقة تسمى " فيفا "

ـ أيواااااااه ألْـحين هـدّي السرعــه لأنه عداد سيارتك صار 152 كم .. أمامك تلاقي طريقين على شكل T: الأول يروح دوغري على " وادي عربه " المؤدي إلى العقبة .... بس إنته بدك تروح على الطفيله وضانا !! إذن حتما َ ولابد ... لازم توخذ ع اليسار .. وإصعد رويدا ً رويدا مع طريق صاعدة ومنعطفات حاده ً بين هـا الجبال الشاهقة... ورح تشوف جبال أشكال وألوان : إشي أصفر و إشي أسود وإشي ترابي وإشي بنـّي ...

ـ إنتبه المناظر توخذ العقل ... أحسن إشي تساويه .. إنك كل شوي تستريح وتتفرج وتوخذ صور .. هو ّ فيه أكثر من طريق توصلنا إلى ضانا لكن عشان المناظر خلينا نوخذ طريق " النمته " و " صنفحه " .

ـ طيب... وبعد ما طلعنا ها الطلوع الشديد وتفرجنا وصورنا وتعبنا ... رح ندخل بعض القرى الصغيرةعلى اليمين : مثل " النمتــه " و" صنفحـه " ، ودير بالك كمان مره فيه طرق ملتويه ووديان وطلوع وإنحدارات وشجر وسهـــول وغنـــم ومغــــــاير( وهون رح تشوف من بعيد مدينة الطفيله على يسارك (طبعا ًمابتشوفها كلها )

ــــ وحتى ماتغلط بالطريق أفظل إنك تسأل ......... وين الطريق إلى بلدة " العين البيضاء " .... ولما عداد سيارتك يسجل 183 كم فأنت الآن على مدخل " العين البيضاء "

....... إمشي ... إمشي .... مالك خايف ولا ّ تعبت... ظلك ماشي شوي شوي لأنه الشـــــــوارع مش واسعة وفيها ناس ودكاكين . ظلك ماشي ...................... وها الحين !!!!!!!!!!!!!!!

ـ رح تدخل شارع رومانسي جدا ً شجر ع الجانبين

...... وبعد شوي رح تشوف مسجد ومقام الصحابي " الحارث الأزدي " على يسار الشارع .

ـ أظن عداد سيارتك تقريبا ً سجل 191 كم ... إذن أنت على مدخل بلدة بصيرا عاصمة الآدوميين ق . م ... وستكون على يسارك بلدة " غرندل "

وعلى يمينك " بلدة بصيرا "... ولكن ظلك مااااااشي دوغري بإتجاه طريق القادسية .. أمامك شارع الشجر على الجنبين........ومزرعة

........ حوالي 6 كم ، وهون يا صاحبي غني مع حليمو " وإبتدى المشوار " فأنت على أول جبل يطل على " ضانا " !!!!!

ـ إرتاح .... خذ نفس ... وصور زي مابدك وإذا بدك تمشي إمشي فالشارع ممتاز وهون خلي سرعتك بطيئه جدا عشان تتمتع بالمناظر وتتوقف وتصور .... خذلك لفه .. وإختار المناطق المناسبه. وهي ! كثيرة ............. شايف إنه عن جد الجد إنه ضانا منطقة السحر والجمال

ـ آآآآآآآآآآآآآه لاتنسى عند العودة من نفس الطريق ، وعلى بعد 3 كم خذ على اليسار إلى

منطقة " لحظه " وشوف ها الطريق ما أجمله!!!!!!

، وإذا عندك رغبة خلينا نزور حدائق ومتنزه ونادي موظفي شركة الإسمنت ... ترى ياصاحبي هاي فرصة مابتتفوت !!

وبعدين خلينا نمشي حتى نوصل عند نبعة الماء نبع عين لحظه ،

وبعدين كمّل مشوارك عبر ها الطريق

إلى " برج ضانا "

وعندما توصله صف سيارتك بالموقف المخصص ، وإستأذن الموظف المسؤول ، وإصعد على أعلى البرج ، رح تشوف ضانا كلها وستشاهد المخيم الذي يقع في قاع ضانا .

ـ إذا عندك رغبة تنزل للمخيم إسأل الموظف عن موعد السياره المخصصة لنقل الزائرين للمخيم ، وإذا بدك تنام بالمخيم مافيه أي مانع ، لكن لازم تسأل عن الأكل وأجرة المبيت وعن موعد السياره.

ـــ أووووهـ أووووهـ صار وقت الغروب ... شوف منظر غروب الشمس في ضانا................... أي... والله والله إنه بيخلي الواحد ينسى كل إهمومه

. وهاي هي ّ " ضانا منطقة السحر والجمال " إتقرج وشوف وإنسى الدنيا !!!!! شوف ها المناظر على مد البصر.

ــــ آآآآآآآآآآآآآه مو تنسى تكتب تقرير وترفق معه الصور للمنتدى.. خلي غيرنا برضـــه يشوف ضانا منطقة السحر والجمال . وربنا يعطيك ألف عافيه ..... وهلأ إجا وقت الترويحة إلى عمان فيا صاحبي

شد الهمة ويالله بدنا نغني " كيف الهمه ؟ عالييييييييييييييييييييييه ".

ــــ الحمد لله على سلامتك ...... وروح سولف لكل الناس عن ها الرحلة الممتعــــه !!!

مع تحيات عبدالكريم الخلايلــه

المصدر: شبكة ومنتديات صدى الحجاج