المدارس بازت يا جدعان

المدارس بازت يا جدعان

مسا الخير او صباح الخير ما بتفرق المهم انه في خير
ومن وين بده يجي الخير طول ما .................. و....... بعملوا ........... و.......... ( انا بنسى دخلت في الموضوع على طول .. الاصل امهد واكتب مقدمه بعدين بدخل في الموضوع .. لا تواخذوني ملخوم وبعيد عنكم ولا رنديله .. اذا بتلاقوا اي رنديله امانه تعطوني اياها )

ايوان وين صرنا
صرنا عند مسا الخير او صباح الخير ما بتفرق المهم انه في خير وفي صبح وفي مسا
محسوبكم ابو زغيب فاصل النت على اساس اني بدي ادرس وخلص اتخرج
المهم بين كل فتره وفتره بدخل على الصدى اطلطل واوقف على الاطلال شوي... وهناك مزحه...وهناك طوشه مع ابو قنوة...صحيح اني بوكل منه اكمن قنوه على راسي بس بضل حبيبي وضرب الحبيب زبيب وهو بعرف كيف يشيطها ومتى يهديها .
وهناك اعتراض والدم للركب ...
وهناك ريماس نازله حضر في هالناس هي وابو معمر وشوي بفتح موضوع بلاقي حالي كاين اتزانخ على اسرار فعلا الله يعينها كيف كانت متحملتني وشوي اسرار وميسم بطلعوا من الشاشه وبضربوني ..
وبرجع بدخل على منتدى الاثاث ومنتدى الازياء واتهاوش انا وهبه مش مخليه اثاث في هالبلد الا وكاتبه عنه واحنا بنموت في حسرتنا لما نتفرج على المواضيع .. وما بلاقيها الا وهي زايغه مني ورايحه تكتب شوية دمار تدمرني بس مطيعه وبترد عالكلام ...
وام معتز بس خلفت وربنا قيمها بالسلامه نزلت بقوة ورجعت الاولي والتالي مواضيع وردود وهاي مش راح احكي عنها شي بيني وبينكم بدها تصير حماتي يكفيكوا شر الحموات ( ع راسي يا ام معتز بتأمريني بشي كيف رضاك عنا) ...
ولا حرف طول نهارها في المكتبه بتشتري كتب وياحرام المسكينه بتنزل من هالكتب مواضيع وماحدا فاهم شي وبدها تخلي كل الناس سعيده والله يا حرف اني مصدقك بس علي الطلاق من ذراعي اذا انا فاهم شي .. عارف العيب في مش في المواضيع بس كنت شوي شوي وصرت افهم واستفيد .. اشي منه
وقد ما كنت اطل من شباك فضفض وفش غلك الاقي دانا بتجلى يا حرام وايد فيها كاسه والايد الثانيه مواضيع الشباب وهمومهم ونازله تواسي في هذا وتمسح دمعة هذيك
وكنت ادفش الباب ع ابو معتز الاقيه مولع بابور وحاط عليه اكمن موضوع يستويوا على مهلهم وعينك ما تشوف الا النور ....
ومره سحبت فيش الكهربا للمنتدى قام علي خالد وشوي قام علي الحد كان بنزل برامج بحكيله لمين يا خالد بحكيلي للشباب الله وكيلك وللمنتدى المهم اعتذرت منه ورجعت الفيش ورجعت الكهربا على المنتدى ...
وشايفين اللمبه المكسوره الي على باب المنتدى هاي انا كسرتها عشان رامي الاخوث يتعرقل ويوقع على ثمه لما يدخل الصدى ذبحنا فلسفه ( الله لا يرده )
وفي لمبه ثانيه انكسرت في منتدى الشعر والخواطر بس والله مو انا الي كسرتها هاي المره هي انكسرت لحالها بتعرفوا ليش ؟؟؟
من ورا شعر ابو ريان هشام بطلت تتحمل اللمبه وانفجرت ..
وكنت اطلع على سطح الصدى وامشي شوي شوي ( اتسلبد .اتسلل . في اللغه الطفيليه ) ومين حزركم الاقي .. والاقي يا حفيظين السلامه ابو سلطان لابد (قاعد وعيونه هون وهون)وبحضر لعملية تفجير اكمن نكته ونهفه ...

وبس كنت اروح ادخل على الاسلامي ساعه لما يردوا علي ومن وراء حجاب و3 دقات على الباب وعيوني في الارض عشان اعطي فله او عهد موضوع طبعا لحتى ينزل الموضوع بده اسبوع تحت المراقبه والتأكد والتدقيق والتصحيح ...


وانا بعدي في جو العلم والذي منه ومؤدب .. اسمع صوت انفجارات وتجارب افوت بسرعه اشوف شو صار الاقي ميس قاعده بتحضر موضوع علمي او طبي .. كنت اغار منها هالبنت مع انها اصغر مني بس عندها نفس للدراسه ...
وبعض مرات يجي على بالي اعملي لفه وفتله على البلدان العربيه وما اكذب خبر ووينك يا تونس او انيسه يعطوني هالتذاكر ويحكولي عن كل منطقه شو فيها وشو مش فيها ....

ارجع من هالسفره هلكان وتعبان ونفسي انام بس وين انام .. انام مين والناس نايمين .. هي شيراز بتخلي حدا ينام لعبه وحده من لعباتها بتخليك صاحي للصبح مع جنانها

وريماس خانوم ما بتصدق وتنجن وترمي جنانها علي ولا انا من وين جبت الخوثنه والصيصان الي في راسي كله من وراها ...

وكان في الله يرحمه الشهيد الطيار المتقاعد المعاق ابو راشد ..الله يسهل عليه هسه في السعوديه ربنا فتحها عليه .. كان ينزل مواضيع من وين بجيبها ما بعرف اذا من كلمه عمل موضوع اسمه انداااري .. اندااري عنك يا ابو راشد

وكل شي ولا انسى الاخوث المعتوه ابو الزوز يزن او النشمي البين يطسه هو الي كان يكشفني دايما وما شاء الله عليه كان دايما يصلح مواسير المي المكسوره للمنتدى

كان وكان وكان وكان
لبنه لبنه طوبه طوبه .. بنينا هالمنتدى .. وفديناه بعيوننا ..كان اكبر همنا نكون عيله وحده ..تساعدنا .. الي يكتب موضوع اليوم يستنى اكمن يوم عشان غيره يكتب
ويروح يعلق ويرد على المواضيع الثانيه ويناقش وتوصل بينا للسما ونرجع نتراضى ويتدخل فيها وجهاء الصدى على راسهم ابو معمر وشهم وهشام وابو المجد يا سلام عليك يا ابو المجد كامل

لوحة الاكثر مشاركه والله ما كنا نهتم الها اصلا ماكنا نعرفها
وفي خيارات في كتابة الردود .. كيف حالك إن شاء الله دائما بخير ؟ موفق بإذن الله ... لك مني أجمل تحية .
من جديد صرت اعرفها واقراها في الردود . ما بعرف هو ابو معمر كان يحب يتعبنا كان يخفيها ولا كانت موجوده اندااااااااااري

كان لو نقدر ندين بعض ردود ما كنا نقصر لانه الخلاصه مش في عدد المشاركات

يا ابو معمر الغالي مشان الله اطلب منك هالطلب والله بعرفك ما بتردني خايب وبتدلل عليك انا كثير سامحني
اطلب منك تزيد كل واحد 10000 مشاركه وتفكنا من هالقصه
ولا اقلك انسى حتى لو زدت راح يصير التنافس بينا انا 10001 وانت 10000 وهذاك 15000 وما بعرف مين عشرطعشر الف .. شو رايك تلغي المشاركات وتلغي معها خيارات الرد السريع المختصره
يا الله شو بتضايق وبقع وبطق في مكاني لما اشوف واحد تعبان وكاتب موضوع ويا حرام اصابعه ساخوا على الكيبورد وفي الاخير بيجي واحد على البارد المستريح بنقرة ماوس على موفق بأذن الله ... لك مني تحيه

مش عارف شو اكتب وشو اقول .. صحيح دخلاتي قليله على المنتدى بس شايف وكاشف الي بصير من بعض الناس
المواضيع هي هي والردود هي هي الشباب الي كانوا يتضايقوا من هالشغله لاحظت انهم مع الركب سايرون

احترامي لكم جميعا .. والقضيه بين ايديكم اضربوني بالنعال كما تشأوون او لا تشكروني .. او اشكروني .. ذلك لكم ولكن هذا هو الواقع
فاعذروا جهلي ان كنت اخطات .. وان اصبت فمن الله ورسوله


والسلام ختام ..
يوم الاحد بتاريخ 10\11\2009.. الساعه8:31
نقطه انتهى .

المصدر: شبكة ومنتديات صدى الحجاج