نقاش ، جدال ، حوار ، مراء، مناظرة

نقاش ، جدال ، حوار ، مراء، مناظرة

بهالمنتديات العنكبوتيه بمرق بمواضيع كثيره بيصير فيها اختلاف بوجهات النظر
وغالبا غااااالبا بيدقوا الأعضاء ببعض للأسف ولا واحد تقريبا بيقبل يتنازل للثاني وان كان على خطأ ، عشان هيك فكرت انزل هالموضوع
يعني قرأت اكم موضوع حواليه وخليتهن بموضوع واحد ،
وبصراحه اكتشفت اني كمان مش كتير عندي ديمقراطيه بس العقل الخليلي يشتغل ببلّط عرأيّ
فحبيت افيد حالي واروووق ، وافيد غيري ان شاء الله .

النقاش .. والجدال ..المراء .. والحوار .. والمناظرة ؛
ولا واحد فينا ممكن يستطيع يكون موضوعي ميه ميه لا وبتحكي مع ناس مستعدين عادي يضلوا يجادلوا فيك للصبح ومصرين انهم همو الصح وانت ولا بتفهم بشلن
ومثل هيك ناس فعلا ممكن يغلبوك بجهلهم كما قال علي رضي الله عنه :
ما جادلت عالما الا وغلبته وما جادلت جاهلا الا وغلبني !
عشان هيك الواحد يختصرهم من البدايه ويتبع الآيه الكريمه :
وإذا خاطبهم الجاهلون قالوا سلاما .
كأفضل رد الهم ، سلاما !
وبما انو بنعيش هالمواقف كتير خلينا نعرف لمحه عنهم ،
عشان نحمي نفسنا انو نكون من نوعيات ناس احنا نفسنا بنحتقرها وبنستسخفها ،
خلينا نعرف متى ممكن نكون بنقاش هادف
ومتى بنكون على جهل وجدل عقيم
بالتالي نرفع من انفسنا لمستويات بنحب نكون ضمنها ،
يلا ؟
الجدال والمراء :
الجدال نوعين جدال للحق واثباته وجدال باطل ،
قال تعالى : وجادلهم بالتي هي أحسن .
فيكون حديث هادئ في سبيل الاصرار على حق وتوضيحه خالي من النزاع، النيه صافيه الغايه الاقناع بالحسنى بحجة قوية وفعلا النتيجه بتكون اقناع المستمع .
وقال صلى الله عليه وسلم : ما ضل قوم بعد هدى كانوا عليه إلا أتوا الجدال .
وقال تعالى : من الناس من يعجبك قوله في الحياة الدنيا ويشهد الله على ما في قلبه وهو الد الخصام .
اللي هوي المراء ،
اللي هو نوع من الجدال بكون غايته حب الظهور وانو يتشفى الواحد باللي بيجادله وهو كارهه وبيحسده ورافض اي حق الا كلامه هو

وغالبا للأسف نقاشات المنتديات هيك
ناس نازله تسبح للركب بالجدال عشان تكسح اللي قدامها فقط، هاي غايته من كلامه بتكون ، للأسف، وبيجيب ناس تدعم وجهة نظره صحاب الو عشان يبين انو قوي يعني
قال صلى الله عليه وسلم : أنا زعيم ببيت في ربض الجنة لمن ترك المراء وإن كان محقا وببيت في وسط الجنة لمن ترك الكذب وإن كان مازحا "
وقال تعالى : والذين هم عن اللغو معرضون .

الحـــــــوار :
هو تبادل الكلام بين طرفين أو أكثر بطريقة متكافئة بدون ما حد يستأثر واحد بالحكي على الثاني ، هادئ ما فيه اي خصومه وتعصب لرأي على أدب رفيع وأسلوب طيب .
قال تعالى : ادع إلى سبيل ربك بالحكمة والموعظة الحسنة وجادلهم بالتي هي أحسن .
الجدال والحوار الثنين كلام بين طرفين لكن الطريقه والغاية هي الفيصل فيهم
فالجدال مرفوض ومش مستحب الا ان كان مرتبط : بالحسنى
قال تعالى : وإذا سمعوا اللغو أعرضوا عنه وقالوا لنا أعمالنا ولكم أعمالكم سلام عليكم لا نبتغي الجاهلين .

الحوار والمناظرة :
المناظرة نوع من انواع الحوار ، بس المناظرة بتعتمد على الدقة العلمية وشروط منطقية اكثر من الحوار الحوار بيكون عفوي اكثر .
احنا بنشوف ناس نازله طخ ببعض ولا واحد فيهم معطي لا دليل ولا اي اشاره علميه وكأن راي الشخص الذاتي صار قانون علمي ولا قانون اجتماعي حتى
شو رأيكم نعرف شو أصول و آداب الحوار ؟
الأصول هي القواعد الثابته الرئيسيه التي تضبط مسار الشيء
الآداب هي الأخلاقيات التي على الاطراف المتقابله ان يتحلوا فيها

الأصول :
1/ الغايه من الحوار وجه الله تعالى باظهار حق ، مش الرغبه بالظهور والغلبه

2/ العلم يكون المتحاور على علم ومعرفه بالشي اللي بحكي فيه وشايف وعارف عنو الممكن والكافي
3/ تكافؤ الاطراف يعني متساويين تقريبا بالعلم والثقافه والفهم
عشان ما يغلب الجاهل العالم : لانو الجاهل حينزل سب ورشق حكي خارج مما يدفع بالعالم انو ما يرد عليه لانو العالم بيحترم حاله واخلاقه ومبادئه فبينسحب وبيظن الموجودين انو الجاهل غلبه للعالم
4/ تحديد موضوع النقاش وعدم الخروج عنه
5/ النتائج من الحوار بيكون معروف انها حتكون نسبية لانا مش انبياء احنا كلامنا صحيح مليون بالميه ! فرأيي صواب يحتمل الخطأ ورايك خطأ يحتمل الصواب من اجمل العبارات بهالخصوص .

الآداب :
1/ نضلش مصرين نخلي اللي امامنا يعترف انو غلط من اولها ولا من آخرها ، دايرين نخليه يعترف بالهزيمه
2/ نعطيه فرصه انو يتراجع عن غلطه
3/ نحاول نركز على المتفق عليه بدون خروج عن الموضوع ، ونوافق اللي بناقشه ببعض ارائه الطيبه مش ضروري نركز ع الخلاف .
4/ نختار الفاظ جميلة ونحكي بتهذيب بعيدا عن التوتر والمشاحنات ونحمي نفسنا واللي بيحاورنا انو ننخذل امام القارئ والناس اللي شايفينا .
5/ نعطيه فرصه انو يفكر ويتراجع بهدوء بعيد عن العجله حتى لو كان هو بيستفزنا وبيسوقنا انو نحتد نضل رايقين
6/ لا نتفشخر عليه ونتعالى حتى لو كنا غالبينه التواضع بيجذب الناس الك وبيحبب اللي بيراقبوك حتى بوجهة نظرك ومن تواضع لله رفعه
7/ نتجنب الاحكام المسبقه لانا مش قضاة على بعض ولا شرطه !!
8/ نستخدم صيغ مقربه للقلب بالتعامل مش صيغة الامر نحكي : ارجو يا ريت لو سمحت مش ، : اعمل هيك تعملش هيك .
9/ نحسن الاصغاء والاستماع للآخر تيكمل كلامه نحكي بدون ما نقاطع مثل الاتجاه المعاكس
10/ ما نناقش بهدف نغلب ونفوز ونبين للناس بنفهم دائما اللي امامنا ممكن يكون عنده اشي نتعلم منه وان كان على البساطه .
اذا كان اللي قدامنا عنيد وبيكابر ومتعصب نحاول نكون احسن منه بكل هدوء نحكي معاه قال صلى الله عليه وسلم :
من كظم غيظا وهو قادر على ان ينفذه دعاه الله على رؤوس الخلائق يوم القيامة حتى يخيره من الحور العين ما شاء .
قال عقبة بن عامر الجهني رضي الله عنه لقيت رسول الله صلى الله عليه وسلم فأخذت بيده فقلت : يا رسول الله أخبرني بفواضل الأعمال فقال : يا عقبة صل من قطعك واعط من حرمك واعرض عمن ظلمك .
يا جماعه الدفع بالتي هي احسن هي فرصه انو نرجع كمسلمين نحب بعض ونخاف على بعض
جعلني الله واياكم ممن نقول ونعمل .. وان يرزقنا حسن الخلق .. والعفو عن الناس

المصدر: شبكة ومنتديات صدى الحجاج