تدرين وش الفرق بينك وبــــيني

تدرين وش الفرق بينك وبــــيني

السلام عليكم ورحمة الله وبركاته


تدرين وش الفرق بينك وبــــيني
اني وفيت الحب وأنتي غــدرتيه
صنت العهد وياك طول السنيني
ويا للأسف عهدك كذبتي وخنتيه
حبك ربا بأحشاي مثل الجـــنيني
وحبي طفل مغدور بيدك ذبحتيه
اذكرك لا غبتي بشوق وحــنيني
وذكري يبس بشفاك حتى نسيتيه
درب الوفا دربي كـــما تخبريني
ودرب الخيانة دربك اللي مشيتيه
أنا شريتك بالبهيض الثــــــميني
وأنتي شريتي في غرامي وبعتيه
يا بنت صدي وأرحلي وأتركيني
روحي لغيري خلك اللــي بغيتيه
ما أقولك حني علي وأرحميــني
ولا أطلبك تحيين عشـــق قتلتيه
اقسي علي جوري علي واظلميني
قلبي عساك الموت كانك رحمتيه
لا يدخل بقلبك حنين وتـــــجيني
خلك علي أقسى من اللي كرهتيه
وإن قلت لك كافي بـــــعد عذبيني
صبي عذابك فوق غدرك وزيديه
ما ودي أنسى طـــــعنتك ذكريني
ابغى أذوق المر واذكر ليـــــــاليه
يا خاينه اقسي علي عـــــــــلميني
وشلون أنا أقسى والزمن كيف اجاريه
وشلون أنا أكسر حاجز العطف فيني
واضحك على احساسي بعقلي وانسيه
عشان لا جـــــــارت عليك السنيني
وخانك هذاك اللي وفيتي وصنتيه
وصحى ضميرك بعد ما هو دفيني
وحفرتي الماضي بعد مــــا دفنتيه
وذكرتي اللي بالوفا لك يـــــــديني
وجيتي تبين ايدك تلامس ايـــــاديه
والله لأقسى مثل قســـــــوتك فيني
ولا يرحمك قلب جـــــريح ظلمتيه
ما أبغاك لو أنك نـــــدمت وتبيني
وبجرحك جرح طول عمرك تداويه
بعذبك واسقيك كــــــــــأس سخيني
كاس شربته منك ودي تــــــــذوقيه
سم تصوغه لين روحـــــــك تبيني
موتي عساك الموت بأسرع خطاويه
يرفض هــــــواك اليوم قلبي وعيني
ويرفضك حب جاك وأنتي رفضتيه
حتى خيالك بالكرى لــــــــو يجيني
باحرم عيوني من منــــامي واجافيه
وأقول لك رجــــــــعت ثاري وديني
ولا تزعلي يابنت حــــــقك واخذتيه
هذا عهد نفسي وهذا يـــــــــــميني
إن الوفا عهدي لمــــــن هو يوفيه
والله ما ينزل لقاعي جبيـــــــــــني
إلا لرب الخلق راسي أوطــــــــيه

للشاعر : رعد بن عبدالله ( سجين الهم
)
مع تحياتى

المصدر: شبكة ومنتديات صدى الحجاج