تفريغ لمكالمة هاتفية بين مسؤول حالي ومسؤول أمني سابق

تفريغ لمكالمة هاتفية بين مسؤول حالي ومسؤول أمني سابق

حصل على تفريغ حصري لمضمون مكالمة هاتفية أجراها مسؤول أمني سابق تطارده شبهات فساد واسع النطاق، مع مسؤول حالي في الدولة الأردنية، بعد ساعات قليلة من قرار السلطات الأردنية بمنع الأول من السفر عصر يوم الأربعاء الماضي، إذ يظهر حجم الإرتباك في التعابير التي إستخدمها المسؤول الأمني السابق، وقوة الحجة لدى المسؤول الحالي، الذي يظهر من خلال تصميمه على المواجهة، جدية إستثنائية لدى الدولة في مكافحة الفساد.

تاليا التفريغ الدقيق لنص المكالمة، دون أدنى تدخل من موقع أخبار بلدنا.

المسؤول السابق: مرحبا سيدي شو أخبارك طمنا عنك.

المسؤول الحالي: هلا الحمدلله.. بخير والله.

السابق: ما أكون أزعجتك.

الحالي: لا أبدا تفضل حكولي الشباب إنك طلبتني أكثر من مرة.. أنا بعتذر كنت بواجب برا المكتب.

السابق: الله يعطيك العافية.. كنت بدي أحطك بصورة إيلي صار اليوم معي.. معقوله رجل دولة مثلي يصير معه هيك.. لمصلحة مين هالمحرقة.

الحالي: أي محرقة.. مش فاهم.. فهمني.

السابق: اليوم أنا رجعت من المطار.. حاطين علي منع سفر.. رغم إنو قبل سنتين عملتو نفس الشي ورفعتوه وقلتو هذا اجراء إحترازي لن يتكرر.. أنا مش مصدق إنو بيصير معي هيك.

الحالي: يا باشا الإجراء مش ضدك فقط.. ولا هو شخصي أبدا.. أنا معلوماتي بتقول إنو في أكثر من 100 شخص إنحط عليهم هذا الإجراء.. ومنع السفر في كل قوانين الدنيا مش إدانة.. ليش معتبر الأمور شخصية.. في نيابة وتحقيقات ومحكمة وقضاء ملاذ كل بريء.. يعني جلالة سيدنا كان واضح وشفاف وانت بتعرف يا باشا كيف تم التطاول عليه وعلى زوجته أكثر من مرة.. بالعكس دافع عن نفسه.

السابق: إحنا جنود الملك.. ورجال النظام عيب يصير فيهم هيك.. أنا ما في شي ضدي أبدا.. وخدمت البلد بروحي ودماتي.. وما بكون كبش فدا.. وما عملت شي من راسي.

الحالي: يا باشا إنت بتدين نفسك وبتتناقض كيف ما في ضدك شي و كيف ما عملت شي من راسك.. خلي الأمور طبيعية.. والله لو أقلك الأسماء إيلي واقفه ع الدور لتعرف إنو القصة مش ضدك أبدا.. بدها شوية صبر باشا.. التعليمات إنو الكل يروح ع المحكمة والتحقيق.. إيلي بريء يرجع ع بيتو.. والمدان قدامه المحكمة يباطح فيها.

السابق: أنا شايف الأمور صفيت علي لحالي.. مفيش حرامية ثانيين.

الحالي: مشكلتك باشا إنك مفترض القصة شخصية وهالحكي مش صحيح.

السابق: لأ صحيح ونص.. واليوم المواقع معبيه ضدي وبتكتب بالإسم الصريح عني وعن عيلتي.

الحالي: روح ع المحكمه قاضيهم لأن ما بصير يتناولوا هاي القصة كون منع السفر مش إدانة.

السابق: أنا بعرف مين إيلي معبيهم علي.. ما بتوصل الأمور لهون.. أنا بأذيهم أذا بدي.

الحالي: والله يا باشا أنا إيلي بعرفوا إنو عدد كبير من المواقع هم صحابك وبتمون عليهم.. فيفترض تتصل فيهم وتشرح وجهة نظرك.. في واحد صاحب موقع حكالي إنك ما بتقصر معو أبدا.

السابق: شو قصدك ما فهمت.

الحالي: قصدي واضح.. لاتعتقد لحظة إنو الدوله غبية ومش عارفه شو بيصير.. إنت محول بيتك لشركة مونتاج بتغير أصوات الناس ع الموبايلات وبتحرفها.. وبتصور الصحفيين وهم عندك بالبيت وبعدين بتركب أصوات ثانية على الصور وبتستخدمها لإبتزازهم. وين رايح يا باشا.

السابق: أبدا هاالحكي مش صحيح.. معلوماتك كلها خطأ.

الحالي: يا سيدي حقك علينا ومثل ما بدك.

السابق: يعني (مقاطعة)

الحالي: بالنسبة لإتصالك أنا مش جهة قضائية حتى أساعدك.. وشو بقدر أساعدك أنا حاضر.. لكن يبدو إنك مش فاهمني حتى الآن.

السابق: أنا مذهول لأن رجال الدولة بيتعاملوا بهذا الشكل.. النظام في خطر وما رح يلاقي حدا يدافع عنو.

الحالي: خلوا النظام بحالوا وهو بألف خير.. بيكفي النظام يافطات ومظاهرات مدفوعة الأجر.. إذا في للنظام خطيئة فهي ثقته ببعض الأسماء.

السابق: كل تلميحاتك عبارة عن معلومات غلط بغلط.. أنا شايف الأمور من سيء الى أسوأ.

الحالي: الله يجيرنا ويحفظ هالبلد ويحفظ سيدنا.

السابق: يا سيدي آمين.. بس انت ما رديت علي أنا صرت طالب لقاء (المعلم) أكثر من مرة، وما في جواب.. خير إن شاء الله.

الحالي: أنا والله ما عندي جواب برضو.. بس لما (المعلم) ما يرد على مذكراتنا معناتو إنو مش حابب يشوف حدا.. (المعلم) كثير زعلان.. ومخذول ببعض الأسماء.. وعلى فكرة هو من العيد يمكن ما شاف أي مسؤول سابق.. يعني القصة برضو مش شخصية ضدك.

السابق: يا سيدي أنا أزعجتك شو نصيحتك للوضع الحالي.

الحالي: بدك تصبر وتكون مقتنع إنو ما في شيء شخصي أبدا.. القصة عامة وعنوان عريض لمكافحة الفساد.. ما في عبرة للأسماء أبدا.. كل شخص عليه شبهة فساد بدينار وحيد بدو يروح ع النيابة.. بلاش شخصنة الأمور ووجع الراس.. أنا إيلي بعرفو إنو في أسماء كبيرة جدا بدو يتحقق معها.. ورح تشوف بعينك.

السابق: الله يحمي هالبلد.. ويرحمنا.

الحالي: آمين.. وصدقني بالنسبة لطلبك تشوف الملعم إنو ما بإيدي شيء أبدا.. والقرار مش قراري أبدا.

السابق: خير إن شاء الله.. شكرا سيدي وتحياتي

الحالي: الله معك في أمان الله

اخبار بلدنا

المصدر: شبكة ومنتديات صدى الحجاج