محتاج لي قلب عن همي يسليني
محتاج لي قلب يفهم لي معاناتي

محتاج كف على كتفي تهديني
لاجيت ضايع تجمع لي شتاتاتي

محتاج لي عين ترقبني تراعيني
تبكي اذا غبت وتدور محطاتي

محتاج كل شي بالدنيا يواسيني
مليت غربة وملتني مسافاتي

يكفي تناسيت حتى اقرب عناويني
يكفي مضى الوقت ماقررت غاياتي

مليت اكابر وهالدنيا تعنيني
يكفي تجاهلت حتى اكبر عذاباتي

مليت اجامل قدم رجل توديني
مليت اطيع الظنون تزيد مأساتي

مليت اجمع قصايد حزن تبكيني
مليت اردد على النجمة عباراتي

مليت اخفي على نفسي بكى عيني
مليت امرر على قلبي جراحاتي

اوراقي مبعثرة والوقت يغريني
اخاف اطيح بمتاهة من متاهاتي

مدري انا الصح ولا الصح مخطيني
مدري انا العلة اللي تزيد علاتي

محتاج اناظر لنفسي وامنع ايديني
عن طرف عيني وهذي هي معاناتي