عزيزي رامي ....
اليوم وانا مروح من الجامعه صار معي نهفتين : وحده ضايقتني كثيييير ووحده بالزبط مش عارف شو الاحساس الي صابني ما بعرف هو انا ضحكت ولا انبسطت ولا حزنت ولا شو بالزبط مش عارف

اول شغله بس روحت ووقفت عند الباصات مثل ما بتعرف شيخ عرب على راس الدور على طول لا استنى ولا بطيخ بس انا شوي مؤدب بوقف جنب الدور وبستنى الباص يوقف عندي ويفتحلي الباب واطلع ..... استنى ... استنى ... اول باص .. ثاني باص ... وانها الشغله طناااااش .. وبطلنا ننفع ... وواحد شكله جديد بحكيلي عالدور يا اخ .. ( بعد خدمة اربعطعشر سنه ثانوي بتئولي اوم اوئف ) والمشكله انه شب من شبابنا الي لما انا كنت سنه اولى جامعه هو كان يتباطح عند المقصف بدو سندويش لبنه وكان لسه بوخذ باسم ورباب ... هذا الشب قال راح يتواسط الي عند هذا السمسار الجديد عشان يطلعلي وبحكيله هذا طفيلي قرابتي
انا عندها كبست معي وصرت اشوف الدنيا بنفتحي .. وازرق خنانه .. وابيض سماوي .... ويصيروا يترجوا فيي مشان الله اطلع وانا رافض .. وراسي ومية سيف الا اعمل مشكله .. الطامه الكبرى انه السمسار بوزن مني ومنك 3 حجمه عائلي .. يعني بقعدني على كتفه وبصير امرجح برجلي بالراحه وانا نازل فيه وبتحلف اله مثل الي عنجد ..... قول خلصت المشكله وحلوها الشباب .. واكل بهدله المسكين من مراقب الباصات .. عندها حسيت حالي انه الي زمان في الجامعه لما حكاله المراقب يازلمة هذا اقدم من مبنى الهندسه ومجمع الباصات هذا .. الجامعه بدها تصرفله قطعة ارض باسمه


الشغله الثانيه بعد ما طلعنا وقعدت في الباص ولا كاني عامل شي .. قعدت قدامي بنت فايعه كثييير عليم الله طول اظافرها متر ونص لكل بكسه .... اكيد بتعرفها كانت دايما تقعد في النت عند مشرف النت وبتطلع مسيرات كثيير وعلى ما اظن انها نصرانيه
المهم بعد ما قعدت بعد شوي طالت من شنتتها قرأن بس مو كامل .. مجموعة سور ..
وتفتح على سورة الكهف وتصير تقرأ فيها ... بيني وبينك برج في عقلي وقع
في جنبي قاعد علي .. دقرته بحكيليوا انت شايف الي انا شايفه ... تفاجأ
كبست معه قال يازلمة حراام مابصير تقرا وهي كاشفه عن راسها
انا خفت احكيلها ... صرت قي صرااع
خفت تكون اول مرة الها تمسك فيه القران او تكون نصرانيه وبدها تتعرف على القران .. خفت احكيلها تكبس معها شغله عكسيه وتبطل تقرا بالمرة ونكون سبب في كرهها للقران
بس وين .... علي ما استحى منها وحكالها ياصبيه مابصير تقراي قران وانتي هيك ...
اطلعت فيه وبنظرة شزرة رمقته اياها وقالتله ماشي ماشي ... وسكرت القران ورجعته ع الشنته
واعطيها نومة لما وصلت صويلح ونزلت وانا بفكر فيها ؟؟