وانا صغيرة يعني بأيام المدرسة كانت عندي اكتر من هواية وكل وحدة فيهم كان الها دور في تكوين شخصيتي

كنت حب المطالعة كتير ،،، واكتر شي كنت حب إقرأه هو الروايات الأدبية العالمية والشعر وخصوصاً شعر الغزل وبالأخص شعر نزار قباني (من هون زاد حبي للرومانسيات)

ومن احب الهوايات على قلبي بهديك الفترة هو لعب الشطرنج ،،، لعبة تحفز العقل على الحركة والتفكير والتشغيل المستمر وتوقع ما لا يمكن توقعه (ومن هون عرفت اني ذكية ولماحة وعندي القدرة على فهم الشخص اللي قبالي)

هواية تالتة كنت حبها بس اجت بعد تخرجي من الكلية وهي المراسلة،، عرفت طريق المراسلة من خلال برنامج كان يبث على اذاعة المملكة الأردنية الهاشمية (قبل الـ fm) هاد البرنامج كان اسمه هواة التعارف مع عصام العمري سمعته وحبيته وبعتت عنواني للبرنامج وكونت من خلاله صداقات عبر الوطن العربي كامل وبرضه كونت صداقات في اكمن دولة اوروبية،،،،
ولسا محتفظة بكتير من هاي الصداقات ،،، ( من هون صرت اجتماعية كتير وبحب الناس والناس بتحبني وقدرت اعمل لنفسي جو ونكهة خاصة)

اما حالياً ،،، فهوايتي المفضلة هي بناتي ،،، قرة عيني ومهجة قلبي ،،، العناية فيهم بدها فن وتعلمت فن التربية وفن الطفولة وفن الأمومة وهاد الشي اللي بتمنى كل انسان يجربه بحياته ،، الاحساس الطفولي لما تلعب مع صغارك ....

هاي جزء من هوايات ريما الحندءة ،، في طبعا اشياءات تانية بس بحب احتفظ فيها لنفسي

حدثوني عنكم .............