الا يـارب غفرانـك ليـا جينـاك فالميـعـاد
عرايا ماعلينـا الـلا الذنـوب وقلّـة الحيلـه
الا ياغافـر الـزلات يامفنـي ثمـود وعــاد
الا يامهلـك جنـود ابرهـه ومـدبّـرٍ فيـلـه
تجاوز عن خطايانا ليـا سـدّوا بنـا الالحـاد
نهار العدل يوم العبـد ينشـد وش محاصيلـه
نهار المرضعه تذهل عـن المولـود والميـلاد
وراع الذكـر تشفـع لـه صلواتـه وترتيلـه
انا البارح هواجيسي تتل القلـب جـاي وغـاد
كمـا تـل الفـراز اللـي مجـودةٍ محاحيـلـه
هواجيسٍ ليا همّيـت بالنـوم هجـدن مهجـاد
وسرّني مثل مسرى الكسير اللي سـرى ليلـه
افكّر وش تزودنـا مـن الدنيـا للاخـرى زاد
وحيـاة العبـد لاصـارت مهـب لله وشنهيلـه
وعن دروب الذنوب اللي تضيق ابنا متى المعواد
متى في طاعة الله ياقف المسلـم علـى حيلـه
متى تعمر صـلاة الفجـر بالراكـع وبالسجّـاد
متى نصمت فكر والنطـق تسبيحـه وتهليلـه
متى نجعل من الديـن لمنازلنـا عمـد واوتـاد
متى نسلم مـن الشيطـان وحيلـه ومحابيلـه
متى والله مدري لكـن الدنيـا صلـف وجهـاد
جهاد النفس والشيطـان والوقـت وغرابيلـه
يابخت اللي ليا استلهم ذنوبـه دمعتـه تنقـاد
ويسجـد خـوف مـن ربٍ مخاليقـه تصلّيلـه
الا ياخوان حنا كلبونـا مـن عـرب واجـواد
وديـن الله هـو دستورنـا ومعـدّل الميـلـه
وانا ماني منزّه واجتهـد فالنصـح والارشـاد
انا اخوكم واحط الذمب فـوق الذمـب واشيلـه
الا يـارب غفرانـك ليـا جينـاك فالميـعـاد
عرايا ماعلينـا الـلا الذنـوب وقلّـة الحيلـه