مدح الفتي
 

راشد الحمايدة 1:10pm Apr 23
‫مدح الفتى نفسه يجيب المناقيد
يسكت وتالي كل شيٍ يبيني
أرغب جلوسي عند من رايه يفيد
والمستفيد أبحث وراه أو يجيني
لاصار منعور ودليل وصنديد
هذاك لو جار الدهر ما يليني
ماكل من يرمي الهدف قال باصيد
أولا كل رجلٍ باللوازم يبيني
والبيت ما يبنا بليا عواميد
والدين مايقضيه عذر المديني
الحر ما ثارت عليه البواريد
لاشك صاده حيلة الصايديني
هواي لامن غرد الطير تغريد
في خايعٍ فيه العرب نازليني
فيه الشقارا والخزاما عراجيد
ريحة هواها ينعش الممحليني
هواي نجرٍ تالي الليل يافهيد
لجة ضلوعه تجذب الغايبيني
لاصار بالمجلس قرومٍ وأجاويد
والهرج راكد بالكلام الثميني
وهواي مشرافي على عالي الحيد
وأمد شوفي بالعصير المكيني
مدهال قرناسٍ غيورٍ على الصيد
صفقت جناحه مثل ضرب العريني
وهواي والله مبعدات العباريد
من لفض شاربها يجي العلم زيني
وهواي يوم الهواء فيه توكيد
شوف الجوازي قبل راسي يبيني
ما ذرتها واديرها مثل ماريد
بقدرة الله كنها في يميني
وهواي لاكثرت عيون الحواسيد
أبعد وخلي ديرة الحاسديني
وهواي أجنب عن جميع التقاليد
وعيش بالذكرى مع الأوليني
لاوأسفى لاشفت بعض المقاريد
جرعات من كاس الرداء شاربيني
دنيا الفتى ماهيب تنصاد وتصيد
إلاوكم غارت على الغافليني
إليا عطتك اليوم تفتل لك القيد
قيدٍ يجي في موعده يالفطيني
كم طقت أرقاب الرجال الصناديد
شمط اللحا فرسان غبر السنيني
كم زخرفت لمعطرات الأجاعيد
وخذت محاسن صافيات الجبيني
وكم لوعت قلب وكم نوحت سيد
يروي نهار الهوش حد السنيني‬