شبكة ومنتديات صدى الحجاج - لو كل غلطة على الصاحب نسجلها ....

لو كل غلطه على الصاحب نسجلها *فقدت ثلثين من مجموعة اصحابي
لكن نطوف هذيك وذيك نأجلهـا * ولا اقول وش قال زيد اليوم بغيابي
اشيــل زلـة رفيقـي واتحملهـــا *ولا اركض ورا كل فارغة بمشعابي
اشوف واصد واسمع واتجاهلها *واحجد مدى غيض قلبي واملك اعصابي
وارجي عسى صاحب السيٌه يبدلها *الى شافني عن طريقه قافل بابـــي
ولا ترك الكلمه -حتى لو تحللهـا *تطلع بوجهين من سلبي الى ايـجابي
واللي يبي المشكله دايم يحصلها *ياصعب درب الوفا ياهون الانشـــابي
سيرت هل الطيب مهونها ومسهلها *لو انها بالعلوم ومسح الاشنــــابي
لكن تجي ساعة وتبين عللـــها *لا صار وقت اللزوم وحــــــزم قلابي
والهرجه اعرف عواقبها وكايلهـا *قدام تخطي هدفـــــها وانت بالنابي
والنفس مايعزها ياكود شايلها *ولا يطيب للناس من للنــــــفس ماطابي
وتلقى من الناس مثل اللي تعاملها *واليا اختلف شي تلقى منك الاســـــبابي
وقنعت النفس راس العز يكملها *اليـا حصل قوتها والســـتر بثيابي
وارزاق غيرك لغيرك لا تحايلها *لك ماكتب لك ولي ماخط بكــتابي
وكم واحد مايبين لو هو آكلهــا * بسدود بعض الرجال تضـــيع الرقابي
وشكواك للي ظروفك مايعدلها *صيحة خلا مالها فزاع وابنـــابي
وقيمتك مع نازل القيمة تنزلها *والحر يأثر عليه اللـــــي معه رابي
واختر ثيابك على قدك وفصلها *ترى ابليس اخرجه منها طوبى الاعــجابي
والكلمه اللي انت منها تستحي قلها *ترى اليا اخطى سنان الرمح ماصــــابي
واخر هديه لو الواجب معجلها *لو فايدتها لغيري ولـــي انا مااابي
معقلات الاركابي في مساهلهـا *وعندي خبر مايفك الوســـق مطلابي
ترى الاصايل ماعادن من سلايلها * نصيحة من شريف لكــــل عزابي
طول القصيده بلا معنى يمللها * واثبت على ماقلت من بعد التــــجرابي
امشي مع الناس وآخذ من دلايلها * وبضاعتي ماتجي مع كل جلابي
ويارب لطفك بروحي بوم تسألها *عن ماجرى في حــياتي وانته ادرابي
ويارب سترك ونفسي لا تفشلها * ليا جـ النهار الصعيب وقدٌم حســابي
والنفس في طاعت الرحمن ذللها * يعزها ذلها - فـي يوم الاحزابي
وتخف عنها الذنوب ولا تحـــملها * رحمتك يااقرب من اقرب كل الاقرابي
وصلاة ربي عد ما هل وابلهـا ** على نبـي تجنب كل مرتابي

منقوله