شبكة ومنتديات صدى الحجاج

بما أنه بدء الختام
قلت أبتديها بحبة كلام
بس كلام في التمام
ناس هاتقول مختلف
وناس هاتقول شمام
الخلاصة هايفضل كلامي مجرد كلام
كلام شاب همام أو مجرد أي كلام.

ناس من ناس ، شعب منداس
بالعصاية والجباية والاستغماية
دخلوا بيوت أحسن ناس
ناس سرقت بنطلوني
جننوني جننوي فوق جنوني
قال إيه دي ضريبة دي أتاوة
دي مصيبة بنويبة يا حلاوة
وأهو أي كلام.

واحد بيسرق علشان الحاجة
وواحد حرامي ومش ناقصه حاجة
والحاجة بقت أساس لكل حاجة
حاجة للذاد ، سلطان عالعباد
والانسان بقرش في أي مزاد
حرامي الحاجة حرامي اسجنوه
وحرامي كل حاجة عم عمامي عظموه
وأهو برضه يعتبر أي كلام

طب خدوا دي هاتعجبكم افحصوها
الجيم بعد الميم قرروا ينقلوها
هي هي هي
أدي دقني لو فهمتوها
وأهو لسه أي كلام .

طب تعرف يابيه ياللي معايا
أنا إيه جوايا ؟
أنا مواطن من شعب الحضارة
متغاظ على بلادي المختارة
متغاظ من بلدي الغدارة
ولا يمكن من سكان العمارة ؟
حمار وجحش وحمارة
ولامؤاخذة سامحني ماهو أي كلام .

طب شفت الفرخة بتبيض حداية ؟؟
طب تعرف ثعلب قوم لف ورايا؟
طب تعرف القلعة والسرايا ؟
ولا أنت زي حالاتي
بتقول أديني في ديني وكفاية ؟
ياعمي دينك وديني يوم الدين نتكلم
أدينا على اسم الله بنتلم ومن الله بنتعلم
فكك بقه من حوار لا هايأخر ولا يقدم.
وده أكيد مش أي كلام .

هاتقولي مسلم ؟ هاقولك لا .
هاتقولي مسيحي ؟ هاقولك ااه .
بس تعرف يا ابن آدم ؟
أنا ابن آدم !!!!!!!!!!!!
أنا انسان ، وأنت كمان.
مالك ومالي ؟ وليه عاوز تاخد مالي ؟
اكمن بدايتنا كانت عمرية ؟
وماله ؟ أدينا النهاردة في عصر الأمريكية
أمريكا ، أوروبا ، أفغان ولا سعودية
فيها إيه يا بشر لو نفهم معني الانسانية ؟؟؟؟؟؟؟؟؟؟؟؟؟؟؟
يادي النيلة !! ، غصب عني مابقاش أي كلام .

خدوا أخر كلمتين والسلام
عاوز تعيش ؟ ، عاوز ومافيش ؟
بتشتري رغيف لايتاكل ولا يتحشيش؟
قالولك انسى بالحشيش؟
عايش في نجع العرج وبتسمع عن مارينا والعريش ؟
بتتضرب ولا تبكيش ؟
بتتسرق ولا تشتكيش ؟
قول لبتوع الكلام
وهروا جتتنا كلام في كلام
يعيش يعيش يعيش.
أو تعال رد معايا
برضه بلغتهم
أي كلام.