خلونا نفش غلنا في الكذب شوي

[Gladiator]

بلا اخبار بلا هم
هون عبي الخبر الي بدك اياه
كذب ولا صدق ما بهم
اصلا اذا بكون كذب بكون احسن ومثل ما قال المثل
كذب مسفط ولا صدق مخربط
بعيدا عن خريطة الطريق وبعيدا عن اوباما وشلته بعيد عن حزب الله وهوشاته وعن الحريري وجنبلاط وماردتيلا قصدي سنيورة
بعيد عن النفط الي قاعد بنزل واجرة الباصات مثل ما هي
بعيد عن العلف الي بعنا الحلال من وراهم الساعة بس نلاقي اكل لعيالنا بعدين بندور علف لحلالنا
بعيد عن التشكيلات الوزارية الي بطلنا نلحق عليها وبطلنا نحفظ اسمائهم
بعيد عن البورصة الي خربت بيوت العالم من قلة عقولهم

فوت وادفش الباب برجلك وحط رجل على رجل ولا تسلم اذا بدك واحكي الي بدك اياه اي خبر كذب هاتو هون كلنا راح نصدقه
بتحب تحكي عن انه الاردنيين بكرهوا المنسف كلنا بنصدقك
بدك تحكي انه الاردني اكثر الوجوه ابتساما كمان راح نصدقك
كل شي كذب وخرط اخرط ولا يهمك اي شي اشاعة هاتها هون واحنا بنروجها الك
عاجبك وزير وبدك تمدحه اخرط علينا وامدحه كيف مابدك
بدك تشكر بلديتكوا والاشغال على الطرق برضوا عنا هون في مش بس شكر في عزايم بتصير

اخبار في اخبار كلها اخبار منقول مش منقول كلها اخبار جديد مش جديد كلها اخبار خيالي مش خيالي كلها اخبار كابوي مش كابوي كلها اخبار كوميدي مش كوميدي كلها اخبار مكسيكي مش مكسيكي حلقة ولا 1000 حلقه كلها اخبار

وراح نعمل جائزة لأخرط خبر

فوت و سدر الدار الك

[نور]

شو يا احمد المواضيع الجامده دى جد اروع موضوع شفته ههههههههههه بكذب يلى بقى صدقنى
يقطع شرك احمد شو كل هذا اخى ما بقى الا الكذب ونفش غلنا فيه

[ريموه الروح]

يسلموا احمد عزيزي شو هالحكي اللي بياخد العئل يا سيدي نفسي امدح كل مواطن شريف يقود سيارته ع الطرق الخارجيه او الداخليه ونشكر الله بعمره ما رمالك زجاجة بيبسي فارغه واجيت قدام سيارتك والحمدلله لم تعمل حادث في ذاك الوقت .... ونشكر بدورنا المواطن الشريف اللي بس يكون الشارع نضيف وما بتشوفوه الا بقدرة قادر وقد امتلئ بالنفايات من هنا وهناك ...ونشكر البلديات اللي بعمرها ما قصرت مع اي اتصال او شكوى من اجل اصلاح شارع او وضع حاويه او مخالفة رمي الانقاذ... وما حننسى نشكر سلطة المياه الغاليه لما بتطلع عليك الفاتورة دبل ودبل والميه اصلاً ما بتوصل ع البيوت الا كل شهر مرة والبائي امطار بالشوارع...
ولا شو رايكم نشكر وزارة التربيه والتعليم ع الحوافز اللي مغرقيتنا فيها من ترفيعات وزيادة رواتب وتحديث مناهج وامتيازات لا تعد ولا تحصى لاهل التربيه والتعليم نشكر الله...
والله حاسه منكم حركة نذاله "مع العفو" ...شكلكم بدكم اياني اتحركش بالحكومه بس والله ما حزرتم ...لانه حكومتنا احلى واروع من هيك حكومه عمري ما شفت متلها
واحمد في المنتدى مو منيح "مو احنا بنكزب يا احمد" اكيد انت العسل كله في منتدانا وهادا كلام خارج التغطيه ههههههههههههههه
نفسي احكي كتير بس بخاف اعك يعني اخربط الكل بالكل
مع تحياتي احمد الغالي

[دانا]

طيب رح احكي اللي بقلبي
حياتي من شهر وجر بتجنن ونفسيتي متل العسل .. البكى ولا بقرب مني

جامعتي بموت فيها وتخصصي طول عمري بحلم فيه وبحياتي ما فكرت اطلع مهندسة ( هندسة عمارة ) ابدا ولا بعض اصابعي ندم لاني اخترت الطب
الحياة ماشية وراي بتدز فيي لقدام وانا بتعزز ما بدي ... من كتر ما هالحياة حلوة معي

خلص بكفي اليوم برجعلك بعدين ابو حميد عشان اكمل كذب عليك هههههههههههههه

[ريما الحندءة]

والله يا احمد صايرة مواضيعك اقوى من القوة نفسها خزي العين عنك يا صهري العزيز

مبارح رحنا اشترينا الدهب لنور يا احمد وامك الله يخليها زادت على مهرها 2000 دينار كمان وقالت ما يغلى على نور شي
وقالت احمد راح يجيب غرفة النور من افخر محل ارابيسك بمصر وغرفةالضيوف تواصي من عُمان ما شاء الله عليك شو كريم ابو حميد

بس ما خبرتني الفيلا اللي بجبل عمان خلص تشطيبها ولا لسا؟؟؟

مبارح معتز جاب البي ام من الوكالة والشيك راح يوصلك اليوم مع ارامكس لا تنسى توقعه وترجعه للوكالة مشان تسجيل السيارة

صحيح ،،، ما عاد بدي العرس يكون بالفندق بدي ياه يالقصور الملكية اوكي اجراءاتك...

وشوفلنا شو صار بشحن فستان العرس تأخر كتير بدنا نلغي تعاملنا مع مخايط باريس خلص هاي اخر مرة

راجعتلك ....... :h5:

[سهر]

اليوم امتحان رياضيات تافه يعني بجيب 100 اكيييييد
ومعدلي اكيد 99.9 مشان العين بس

[اسرار]

:192[1]:
هههههههههههههههههههه
كزبك حلووووووووووووو شو حلو لما كنت شي كذبة بحياتك

احمد اتخرج من الجامعة واتعين مدير شركة وبدي يوظفيني مديرة العلاقات العامة عنده بس انا ما بدي لاني كثيييييييييييييييييييير مرتاحة بشغلي بالجامعة
والرئيس كشير بيحفز الموظفين وبيعطيهم حوافز معنوية ومادية اصلا احنا المادة ما بتهمنا ...... لانه المصاري وسخ ادين وما بتلزمنا والراتب بيظل في البنك ما بنستلمه نهائي وما بينفع والاسعار كثير منيحة والخضرة الفواكة بنتتوزع ببلاش ع الشعب والمواصلات مجانية والاواعي برضه ببلاش والخبز وكل شي يعني الاراتب ما في اله داعي بس مش عارف ليش بيعطونا اياه ...... وصحيحي مافي ديون علينا لا شعب ولا حكومة والميزانية مرتاحة ......
وانت يااحمد متجوز وعند ولد وبنت والمرة ما شاء الله عليها معيشتك بهنا ومرتاح ما شاء الله عليك ..... اللهم لا حسد ..... وكمان السيارات 3 صافة قدام الفيلا .... واحدة الك واحدة للمدام والثالثة للولاد والضيوف اذا في حدا بيجيكوا وانتوا حاليا مصيفين يوم بتركيا ويوم بشرم الشيخ...... يا عمي عيش لا تنسى الهداياااااااااااا

الدول العربية كلها كانها دولة واحدة مافي جوازات سفر بينها واليهود كلهم ماتوا وامريكا افقر دولة في العالم والاردن وفلسطين والسودان ببعثوا الها اغاثات وبطانيات ........


وشو احكي لك تاحكي الك يا ابو حميد :050xxx: اسكت يا زلمة خليها في تبنها

[المشتاق]

مبارح كان عندي عزومه وقالوا الشباب بدنا منسف .
في نفسي قلت الحمد لله اللي ما طلبوا اشي ثاني
رحت على الملحمة وقلتلوا كم كيلو اللحمه
قال : دينارين ونصف .. قلت : الله اكبر .. بعدها ما رخصت
شو بدكوا بطول السالفه رحت اشتريت ثلاث جاجات
بثلاثة دنانير .. ومريت كمان اشتريت رطل لبن بلدي بدينار ونص
وحكيت وهي خربانه خربانه خليني اشتري نص كيلو صنوبر
لانوا حد علمي رخيص وتفاجأت ان الكيلو بدينار وربع
المهم كل العزومة كلفتني تقريباً 5 دنانير ونص طبعا هذا
مع الكنافة والفواكه ...
على الساعة وحده وربع الا والتلفون بضرب
رديت .. والا فخري بحكي انوا اسماعيل بلع دزينة شفرات
وهي احنا في المستشفى مش عارفين شو نعمل ولا الدكاتره عارفين
طبعاً مسكت التلفون وحكيت مع قايد الجيش صاحبي وقلته انخاك والا انخى الذيب
قال : اخس يا الذيب .. قلت بدي طيارة على الطفيلة الان وبسرعة
زميلي بالع دزينة شفرات وبدنا ننقلوا على المدينة المنورة .. قصدي المدينة الطبية
وفعلا ما في ربع ساعة والا الطيارة في المستشفى .. حملنا اسماعيل وعلى
المدينة .. لما نزلنا والا في استقبالنا قايد الجيش ومدير المستشفى وحشد غفير من الجماهير
طبعا ما فضيت اسلم عليهم من اللخمة وعلى طول على غرفة العمليات
واصريت اني ادخل معاه ... رفض الدكتور طبعاً
بس المهم زرقت وفتت ... والا يا اخوان فوق الخمسين طبيب
واقفين فوق راس ماهر ... الي بخدر والي ماسك المقصات واللي واللي
اجت مني طله على الدكتور الجراح والا ماسك قطعة حديد مربعه وبمررها
على بطن ماهر .. اي اي والا اول شفره طلعت من ثمو والثانية والثالثة
سألت واحد في جنبي وشي قطعة الحديد اللي مع الدكتور
قال : هذه مغناطيس ... قلت سبحان الله
المهم طلعوا كل الشفرات .. ماظل غير نص شفره
فتحوا بطنوا وطلعوها ..
رن التلفون ... طلعت بره غرفة العمليات والا المره بتحكي
مطولين معازيمك حتى يجوا ... قلتلها اي معازيم
احنا في عنا عزومه ..
يتبع في العدد القادم

[ريما الحندءة]

رووووووووووووعة يا مشتااااااااااق من الاخر

احلى كزبة والله

[عهد]

:hhh18::hhh18::hhh18::hhh18::hhh18::hhh18::hhh18:: hhh18:
معديك أبو قنوة .... لا ليش الكذب ...... والله إنت مواضيعك بيضحكن ... بس أبو قنوه ... بيغذثن:hh17:

[ابو قنوة]

طيب خذولكو هالخرطة من قاع الدست ..
الزمن 1955
صديقي ابو محمود بدو يدخل ابنه بالجيش ومش لاقي واسطة .. معلومكم الواسطة مهمة كثير ..المهم رحت معاه لعند جاري ابو العبد ..ابو العبد وكيل اول متقاعد من زمان بس اله كلمته في كل الدوائر ..دخلنا على ابو العبد سلام عليك السلام .. شرحنا الوضع والزلمة اتفهم الموضوع وقال بسيطة .. ناولني هالخلوي يا ولد .. عبد ابنه جاب الخلوي .. وطس مكالمة .. الو ابو شاكر العواف كيف حالك بدي اجي لعندك انا وجاري ابو قنوة .. ومعي ابو محمود ...الله محيك .. احنا ما عرفنا مين ابو شاكر المهم ركبنا عواية ابو العبد و وينك يالعبدلي ...طلع ابو شاكر .. هو نفسة الشريف زيد بن شاكر قايد الجيش ..سلام عليك السلام .... وهات يا معابطة ومباوسة بين ابو العبد وابو شاكر الله يرحمه .. قعدنا شوي وشرح ابو العبد الموضوع .. وافق ابو شاكر .. وقال لابو العبد بلكي تشوف سيدنا ابو عبد الله بلكي زودونا رواتب الجيش شوي .. ابو العبد ما كذب خبر مسك الخلوي .. وسلخ مكالمة .. الو ابو عبد الله .. تحياتي يا سيدنا ممكن نتشرف ونقابلك انا وابو شاكر وابو قنوة وابو محمود .. طال عمرك سيدي .. سكرلا ابو العبد الخط .. وركبنا عواية ابو العبد انا وابو العبد وابو محمود وابو شاكر ... و وينك يا بسمان .. دشنا باب القصر الملكي العامر بكل ترحاب واستقبال زين .. معلومكم ابو العبد مش هين .. يعني الكل بعرفه .. دخلنا على سيدنا الله يرحمه ..سلام عليك السلام .... واستقبلنا بكل ترحاب ... ابو العبد شرح الوضع لسيدنا .. وسيدنا قال ابشرو .. وصلتو الله حيكم ..قعدنا شوي .. ضرب تلفون ... وقام واحد من الديوان همس باذن سيدنا .. ابتسم سيدنا وقال ... انتو بتشرفو معاي على واشنطن علشان كلينتون عازمنا على بمناسبة عيد استقلال امريكيا .. المهم ركبنا الطيارة مع سيدنا .. انا وابو العبد وابو محمود .. وابو شاكر .. و وينك يا واشنطن ....سلام عليك السلام ... استقبلنا كلينتون وهيلاري في البيت الابيض .. وعمكو ابو العبد نازل سلالمات مع الامريكان .. معلومكو ابو العبد مش قليل .. يعني الكل بعرفو ..
والله ربع ساعة زمن .....واذا كسنجر وزير الخارجية ... بقول لكلينتون .. في تلفون من البابا وعازمنا كلنا على الفاتيكان لانه في احتفال كبير .. المهم ركبنا كلنا بمعية سيدنا انا وابو العبد وابو محمود وكلينتون وكسينجر وهيلاري .. و وينك يا الفاتيكان .. وصلنا هناك كان الاحتفال مبلش .... جلسنا في مقاعد كبار الشخصيات ..... شوي طلع ابو العبد على المنصة الرئيسية ..سلام عليك السلام .... وهات معابطة ومباوسة مع البابا .... .. ابو محمود اغمي عليه .... المهم رشو سطل ميه على وجه وصحي .. قالو له مالك يا زلمة .. شو صار .. ابو محمود بعد شوي قال .. يا جماعة الخير انا واقف وبجنبي واحد صيني .. بقول : اموت واعرف بس مين الي بسلم على ابو العبد ...

[حمزة مرايات]

احمد معك خبر انه نتائج التوجيهي طلعت اليوم :163[1]:

[اسرار]

ههههههههههههه
الله يقطع شركم كذابين نمرة واحد
ابو قنوة ومشتاق ما صدقتوا واحمد فتح الكم اياها
الله يجازيكم .......هههههههههههه
مشتاق شو اسم صاحبك اسماعيل ولا ماهررررررررررررررررر

[المشتاق]

قال كيف بدك تعرفي الكذبه ... قال من طولها
والله انك خطيره يا اسرار ... اسمه ابراهيم

[اسرار]

ههههههههههههههه
كيفني معك
مركزة ع الاخر صح
هههههههههههههههههه

[ابو قنوة]

ملح الرجال

[اسرار]

اتمنى انه ما يكون ملحكم
لانه من اكثر الصفات اللي تغضب المراة في الرجل الكذب

[المشتاق]

هذا مو كذب ... هذا خرط

[اسرار]

اخرطططططططططططططططط
يجعل لا حدا حوش:hh29:

[ابو قنوة]

هو خرط نعم .. ويسمى احيانا سحب افلام .. واحيانا اخرى سحب صواريخ .. واحيانا اخرى بنت اخرى يسمى فلم هندي ... وممكن يسمى نخع .. وممكن هشت.. وممكن ظراط على البلاط .. وممكن نفاق اجتماعي .. كله محصل بعضة .. الله لا يوطرز الكو على هيك افلام...

[اسرار]

ههههههههههههههههههههه
مسميات رائعة للكذب :192[1]:

[Gladiator]

ابوي ابوي .. اعطوها وحمو الصاجه
الكذب ملح الرجال وعيب على الي بصدق
هههههههههههههههههههههههه
يقطع شركوا والله ابدعتوا عنجد ابداعات ساعه وانا بضحك مع انه ما الي نفس اضحك
يا هيك المعاونه يا بلاش
والله لو طلبتكوا في شغله محرزه ما ابدعتوا هالابداع

يلعن عيني فجرت هالمواهب هههههههههههههههههههههههه
هذا ما يسمى بترميز البطيخ والله ما انا عارف اسولف " بعمل حالي فهمان بس مش زابطه "
المهم ترميز شغله بس شو هي مش عارف

ما علينا

هسه في معي خبر طازه وبعدين بفند خرطاتكم واحد واحد يا ويلو ويا سواد ليله الي بكون مخربط في كذبته او بكون صادق فيها

المهم

قال بحكوا انه فلونزا الخنازير تمويه عشان ما ننتبه للقطط ونبطل نلاحقهن من حاوية لحاوية

[المشتاق]

فوز كتلة الوفاء برئاسة صبحي البدارين لغرفة تجارة الطفيلة

[Gladiator]

حكومتنا الرشيده .. احسن من الي فاتت

صح يا اخوان مش انتوا بتوافقوني الراي

[كامل السوالقة]

لسه ما شفنى خيرها من شرها بس ناويه على اشى

[العقرب]

يا خوان سمعتو اخر خبر فوز الفيصلي على برشلونة 10_0

:h7::h7:

[كامل السوالقة]

قدر ابوى اكبر من قدر ابوك

[rami]

ابو زغيب انت ما جبت اشي جديد قال خلينا نكذب شوي قال مهو كله كذب بكذب كل حياتنا كذب وكلامنا لبعض كذب بكذب لو قلت خلينا نصدق شوي هون الغرابة بعدين خليني اقلك هالشغله لما تحكي الصدق اتاكد مليون بالمية انه العالم رح تقول هاذ بكذب ف عشان هيك لا تغلب حالك وتكذب احكي الصدق والناس لحالها بتكذبه ما في داعي تغير وتحرف لانه كله رح يطلق عليه مسمى كذب وكل ما حاولت تقنعهم انه صدق بزيد تاكدهم انه كذب معادله واضحة.
ع كل حال كونه الموضوع لازم تكذب فانا رح اكذب هالكذبه يمكن تكون صدق بس انتو توخدوا انها كذب زي ما حكيت او ممكن تكون عنجد كذبه بغض النظر
بقولك انه .....
ولا بلاش بعدين بتفهمني غلط خليها لوقتها

[كامل السوالقة]

اخوتى
شفت اليوم واحد حكى الى حكايه عن ابوه وعمامه
سبعه اخوان ابوه معهم خيلهم وبواريدهم وجدى بدهم يتغدو عليه
قال ابوه الحقتا يا ولد
ولحقهم وجدهم مولعين نار بشو فى ضلت شجرة ذبح
اخوتى الي ما بعرف الذبح هى شجيره صغيره تبت بين الزرع لها ثلاث ورقات لا تتجاوز 3سم
وهههههههههههههههههههههههههههههههه
الله يستر

[Gladiator]

مبروك للفيصلي يا عقرب هاي شغله سهله بالنسبه للفيصلي هههههههههههه

[Gladiator]

ابو المجد .. فعلا الله يستر هههههههههههههه

[Gladiator]

تعال جاي انت يارامي

يا اخوث ما انا عارف الي بتحكي فيه ولانه الواقع كله كذب في كذب عشان هيك انا كتبت الموضوع عشان اكتب شي واقعي

وبعدين يا حج انت وانا عارفين انه العالم بتكذب وكاشفينهم وانه الشي الطبيعي عندهم هو الكذب اما الصدق فراح يستغربوه


كلنا بنكذب وكذاب الي بحكيلك انا ما بكذب
بس وين الحماقه يا صديقي ... من الي بكذب كذبه وبصدقها وبفكر الي حواليه مصدقينه .. المهم شو بدك في طولة السيره
دعوها فهي مأمورة
وفعلا مثل ما حكيت عشان ما تكون غريب بين الناس لازم تكون كذاب
وحل عن وجهي هسه لانه والله ما بعرف شو قاعد انا بكتب وخايف هسه اخبص حل عني

[كامل السوالقة]

فتش فى جيابك هويتى معك حكولي

[Gladiator]

يييييييي الله يسامحك .. خذ انت مخربط كنت بدك تعطيني الشيك ابو 500000 وشكلك خربطت بينهم .. خذ

[كامل السوالقة]

الواحد ما معه عقل من كثر الصدق فى المنتدى وهذه هويت رامى معى منين جت ما بعرف والشك اخذه ابو معمر واعطاه الى ابو قنوه فى الغلط ورطنا مع الاولاد بدهم يشترو سياره وما فيه رصيد ساحب ابو قنوه مليون وخمسين دينار الي فى حسابى

[Gladiator]

الله يكون في عونك ابو قنوة سحيب لا تضلك تعطيه بطاقة الصراف

[كامل السوالقة]

انت شفت رامى اليوم فى العقبه بسوق
وانا فى عمان مين حكالك هذه الاحكايه يا احمد
:067:

[وريد]

ان الزرقاء
اصبحت العاصمة الثقافيه الأولى في الاردن ,,
و الشوارع كلها مقاهي أدبيه و صالونات مثقفين و قاصّين من انحاء المعموره ,,
و رح تتسمى الشوارع فيها بأسماء الفلاسفه و الادباء و العلماء يعني بدل ما يكون اسم الشارع ابو ساطور أو التنين الأحمر و ابو وشم بيصير اسمه شارع سقراط اوالفارابي او نيتشه
و كمان الفتوات رح تنقرض ’’ و الحفرتليه رح يشربو بايب
و ارباب السوابق و الصيع رح يلتهوا بمسابقات المطالعه و رح يكون لهم وكر خاص مزود بمجموعه لا بأس بها من الزخم المعرفي
و تمثال لبنى السريعه اللي بالرصيفه رح يتحول لمنبر أدبي مهم و يقام هناك عديد من المهرجانات
و الدعوه عامه
و
ح تبقى لمّه


:)

و كمان

[كامل السوالقة]

دموع
والله اشى من الاخر هيك سوق عكاض عن داركم بدوه يفتح
وانا صاحب مقهى النور والضياء
:male_iraq:

[وريد]

ههههه
صحيح
و ديوانية المتنبي رح تكون اول طلوع الهاشمي الشمالي
هاد في حالة اله طلعه !!

[هبة الرحمن]

سمعت انه ابو زغيب تخرج وبده يسافر بعد شهر:hhh6:

[Gladiator]

نسيتي با دموع سوق السكر في وسط البلد صاير فيه مبارزات شعريه
ومخيم شلنر صاير اكبر منتجع سياحي بالاضافه لشارع السعاده الي وسعوه وصار طابقين .. اما سوق الدقم فانسي موضوعه بجوز يفتتحوا فيه مطار .. اما الحاووز بديش احكيلك عنه كيف صايره شوارعه شو بتجنن كلها بلاط رخام .. نيالكو في هالزرقا وفي شوارعها

[كامل السوالقة]

الدنياء ليل والكذب حرام:hhh4::006:

[Gladiator]

هبه والله لاخلي البين يطسك .. منيح انه الموضوع كذب في كذب كان هشام صدق وفضحنا عند الحجه وصدقوا اني بدي اسافر
لا لا تردوا اشاعات ههههههههههه

[Gladiator]

هههههههه قولتك يا ابو المجد
يعني اختصر الليله وما اخرط ؟؟؟ هيك انت شايف ؟؟